56வது இந்திய சர்வதேச திரைப்பட விழா..!! இந்தியன் பனோரமாவுக்கு 'ஆநிரை' குறும்படம் தேர்வு..!!

தமிழ் சினிமாவின் புகழ்பெற்ற இயக்குநரான இ.வி.கணேஷ்பாபு இயக்கத்தில் உருவாகியுள்ள ‘ஆநிரை’ என்ற குறும்படம், 56வது இந்திய சர்வதேச திரைப்பட விழாவின் (IFFI) இந்தியன் பனோரமா பிரிவில் தேர்வு செய்யப்பட்டுள்ளது. இந்த அறிவிப்பு தமிழ் திரையுலகில் பெரும் உற்சாகத்தை ஏற்படுத்தியுள்ளது.

இந்திய சர்வதேச திரைப்பட விழாவான IFFI ஆண்டுதோறும் கோவா மாநிலத்தில் நடைபெற்று வருகின்றன. கோவா சர்வதேச திரைப்பட விழா என்றும் அழைக்கப்படும் இந்த நிகழ்வு நவம்பர் அல்லது டிசம்பர் மாதங்களில் நடைபெறுவது வழக்கம். இந்த ஆண்டுக்கான 56வது இந்திய சர்வதேச திரைப்பட விழா கோவா தலைநகர் பனாஜியில் வரும் நவம்பர் 20 முதல் 28 வரை நடைபெறவுள்ளது. இந்த விழாவில், உலகம் முழுவதிலுமிருந்து சிறந்த திரைப்படங்கள் போட்டியிடும்.

இதையும் படிங்க: 'கும்கி' பட நடிகைக்கு பெரிய ரிலீஃப்..!! ஐ.டி. ஊழியர் கடத்தல் வழக்கு ரத்து.. கேரள ஐகோர்ட் அதிரடி..!!

‘ஆநிரை’யின் தேர்வு, உண்மைச் சம்பவங்களை அடிப்படையாகக் கொண்ட கதைகளுக்கு கிடைத்த அங்கீகாரமாக பார்க்கப்படுகிறது. ‘ஆநிரை’ குறும்படத்தின் கதை, ஒரு சாதாரண மனிதனின் வாழ்க்கைப் போராட்டத்தைச் சுற்றி அமைந்துள்ளது. அவன் வளர்த்து, பால் கறந்து அளந்து பராமரித்த பசு, பயனற்ற நிலைக்கு வந்துவிடுகிறது. அதை விற்க முயலும் போது ஏற்படும் இதயமற்ற போராட்டங்களே கதையின் மையம்.

இது உண்மை வாழ்க்கையைப் பிரதிபலிக்கும் வகையில் உருவாக்கப்பட்டுள்ளது. இயக்குநர் கணேஷ்பாபு, “உலகின் சிறந்த திரைப்படங்களுடன் எனது குறும்படத்தை பங்கேற்கச் செய்த நீதிபதிகளுக்கு நன்றி. உண்மைக் கதைகளை உலக அரங்கில் காட்ட விரும்புகிறோம்” என்று தெரிவித்துள்ளார். இந்தக் குறும்படத்தில் அர்ஜூனன் மாரியப்பன், அஞ்சனதமிழ்செல்வி, மீரா, கௌரிசங்கர், கமட்சிசுந்தரம், பி.செல்லதுரை, இயக்குநர் கணேஷ்பாபு உள்ளிட்டோர் நடித்துள்ளனர்.

இசையமைப்பாளராக ஸ்ரீகாந்த் தேவா பணியாற்றியுள்ளார், இவர் ஏற்கனவே கணேஷ்பாபு இயக்கிய குறும்படத்திற்கு தேசிய விருது பெற்றவர். ஒளிப்பதிவு பி.செல்லத்துரை, படத்தொகுப்பு டி.பன்னீர்செல்வம், ஒலியமைப்பு யுகெஐ அய்யப்பன் ஆகியோர் கையாண்டுள்ளனர். ஞானி கிரியேஷன்ஸ் ஜயந்தி தயாரிப்பில் உருவாகியுள்ள இப்படம், சிறிய அளவிலான படங்களுக்கும் சர்வதேச அங்கீகாரம் கிடைக்கும் என்பதற்கு சாட்சியாகத் திகழ்கிறது.

தமிழ் சினிமாவில் குறும்படங்கள் பெரும் பங்கு வகிக்கத் தொடங்கியுள்ள நிலையில், ‘ஆநிரை’யின் தேர்வு இளம் இயக்குநர்களுக்கு உத்வேகம் அளிக்கும். IFFI விழாவில் இந்தப் படம் திரையிடப்படும் போது, தமிழ் கலாச்சாரம் மற்றும் ஊரக வாழ்க்கையின் உண்மைத் தன்மை உலக அரங்கில் வெளிப்படும் என எதிர்பார்க்கப்படுகிறது.

இயக்குநர் கணேஷ்பாபு ஏற்கனவே பல குறும்படங்களை இயக்கி, தேசிய அளவில் கவனம் பெற்றவர். இந்தத் தேர்வு அவரது திறமைக்கு மேலும் ஒரு சான்றாக அமைந்துள்ளது. இந்த விழாவில் இந்தியன் பனோரமா பிரிவு, இந்தியத் திரைப்படங்களின் சிறப்பை உலகுக்கு அறிமுகப்படுத்தும் முக்கிய அங்கமாகும். ‘ஆநிரை’ போன்ற படங்கள், சமூக யதார்த்தங்களை எளிமையாகச் சித்தரிப்பதால், பார்வையாளர்களிடம் ஆழமான தாக்கத்தை ஏற்படுத்தும். தமிழ் திரையுலகம் இதை கொண்டாடி வருகிறது.

இதேபோல் இயக்குநர் ராஜ்குமார் பெரியசாமி இயக்கத்தில் சிவகார்த்திகேயன், சாய்பல்லவி ஆகியோர் நடிப்பில் வெளியான ’அமரன்’, நடிகர் அப்புக் குட்டியின் ‘பிறந்தநாள் வாழ்த்துகள்’ ஆகிய திரைப்படங்களும் தேர்வாகியுள்ளது என்பது குறிப்பிடத்தக்கது.

இதையும் படிங்க: பளபளக்கும் மேனியில்.. கலங்கடிக்கும் அழகில்.. கிளாமரின் உச்சத்தில் நடிகை ரகுல் ப்ரீத் சிங்..!