ஆடம்பர வாழ்க்கைக்கு ஆசைப்பட்டால் திருவோடு தான் மிச்சம்..! சமுத்திரக்கனியின் 'கார்மேனி செல்வம்' திரை விமர்சனம்..!

தமிழ் திரையுலகில் சமூக கருத்துக்களை மையமாகக் கொண்டு உருவாகும் படங்களுக்கு எப்போதும் தனி வரவேற்பு உண்டு. அந்த வரிசையில், இயக்குநர் ராம் சக்ரி இயக்கத்தில் வெளியாகியுள்ள கார்மேனி செல்வம் திரைப்படம், நடுத்தர வாழ்க்கையின் ஆசைகள், தேவைகள் மற்றும் அதனால் உருவாகும் சிக்கல்களை நுணுக்கமாக எடுத்துரைக்கும் முயற்சியாக அமைந்துள்ளது. இதில் சமுத்திரகனி, கௌதம் மேனன், லட்சுமி ப்ரியா உள்ளிட்டோர் முக்கிய கதாபாத்திரங்களில் நடித்துள்ளனர்.

படத்தின் கதைக்களம் மிகவும் எளிமையானதாய் தோன்றினாலும், அதன் பின்னணியில் உள்ள கருத்து மிகவும் ஆழமானது. சமுத்திரகனி ஒரு சாதாரண நடுத்தர குடும்பத்தை சேர்ந்தவர். தனது குடும்பத்துடன் அமைதியான வாழ்க்கையை நடத்தி வருகிறார். வாழ்க்கையில் பெரிதாக ஆடம்பர ஆசைகள் எதுவும் இல்லாமல், கிடைத்ததிலேயே திருப்தியுடன் வாழும் ஒரு மனிதர். அவர், கௌதம் மேனன் இயக்கும் கதாபாத்திரத்திற்கு கார் டிரைவராக பணியாற்றுகிறார்.

இந்நிலையில், கௌதம் மேனன் சில நாட்களுக்கு வெளியூருக்கு பயணம் செல்கிறார். அந்த நேரத்தில், அவருடைய காரை பயன்படுத்தி கால் டாக்ஸியாக மாற்றி, கூடுதல் வருமானம் ஈட்ட வேண்டும் என்ற எண்ணம் சமுத்திரகனிக்கு தோன்றுகிறது. ஆரம்பத்தில் அது ஒரு சாதாரண முயற்சியாக இருந்தாலும், படிப்படியாக அதிக பணம் கிடைக்கத் தொடங்கியதும், வாழ்க்கை முறையிலும் மாற்றம் ஏற்படுகிறது.

இதையும் படிங்க: காதலில் அடுத்தடுத்து தோல்வி.. கடுப்பில் ஸ்ருதி ஹாசன் எடுத்த அதிரடி முடிவு..! திருமணம் குறித்த தகவலால் ஷாக்கில் ரசிகர்கள்..!

இதுவரை கட்டுப்பாட்டுடன் வாழ்ந்தவர், மெதுவாக ஆடம்பர வாழ்க்கைக்கு அடிமையாகி விடுகிறார். தேவைக்கு அதிகமாக செலவு செய்ய ஆரம்பிக்கிறார். இதனால் அவருடைய குடும்ப வாழ்க்கையிலும் மாற்றங்கள் உருவாகின்றன. இத்தகைய மாற்றங்கள் எப்படி அவரை சிக்கல்களில் சிக்கவைக்கின்றன, அந்த சிக்கல்களிலிருந்து அவர் எப்படி மீண்டு வருகிறார் என்பதே படத்தின் மையக் கருத்தாகும்.

சமுத்திரகனி இந்த கதாபாத்திரத்தில் மிக இயல்பாக நடித்துள்ளார். ஒரு நடுத்தர குடும்ப மனிதனின் மனநிலையை, ஆசைகளின் ஏற்றத் தாழ்வுகளை, தவறுகளை உணர்ந்து திருந்தும் தருணங்களை அவர் மிக நம்பிக்கைக்குரிய முறையில் வெளிப்படுத்துகிறார். குறிப்பாக, ஆடம்பர வாழ்க்கை காரணமாக அவர் எதிர்கொள்ளும் பிரச்சனைகள் மற்றும் அதிலிருந்து மீள போராடும் காட்சிகள் மிகுந்த தாக்கத்தை ஏற்படுத்துகின்றன.

அவருக்கு இணையாக, குடும்ப பெண்ணாக லட்சுமி ப்ரியா சிறப்பாக நடித்துள்ளார். ஒரு நடுத்தர குடும்ப பெண் எப்படி யோசிப்பார், குடும்பத்தை எப்படி சமநிலைப்படுத்த முயற்சிப்பார் என்பதனை மிகவும் இயல்பாக அவர் வெளிப்படுத்துகிறார். அவரது நடிப்பு பல இடங்களில் மனதை தொட்டுச் செல்கிறது.

கௌதம் மேனன் தனது வழக்கமான அமைதியான நடிப்பால் கதைக்கு உறுதுணையாக உள்ளார். பெரிதாக ஆர்ப்பாட்டம் இல்லாமல், அளவான வெளிப்பாட்டின் மூலம் அவர் தனது கதாபாத்திரத்தை சிறப்பாக செய்துள்ளார். மேலும், அவரது மனைவியாக நடித்த அபிநயாவும் தனது இயல்பான நடிப்பால் கவனத்தை ஈர்க்கிறார்.

படத்தின் மிகப்பெரிய பலம் அதன் யதார்த்தமான அணுகுமுறை. இன்றைய நடுத்தர குடும்பங்கள் எதிர்கொள்ளும் பொருளாதார அழுத்தங்கள், “இருப்பதை விட அதிகம் வேண்டும்” என்ற மனநிலை, அதனால் உருவாகும் கடன் சுமைகள் போன்றவற்றை படம் மிகவும் நெருக்கமாக காட்டுகிறது. பணத்தின் அவசியம் என்ன, அதே நேரத்தில் அதன் மீது அளவுக்கு மீறிய ஆசை கொண்டால் என்ன விளைவுகள் ஏற்படும் என்பதையும் படம் வலியுறுத்துகிறது.

ஆனால், சில குறைகளும் படத்தில் காணப்படுகின்றன. இந்த வகை கதைகளை முன்பே விசு, வி. சேகர், டி. பி. கஜேந்திரன் போன்ற இயக்குநர்கள் காமெடியை கலந்து மிகவும் சுவாரஸ்யமாக எடுத்துள்ளனர். அதற்கு மாறாக, இந்த படம் முழுக்க முழுக்க சீரியஸ் டோனில் நகர்கிறது. இது சில இடங்களில் சோர்வை ஏற்படுத்தக்கூடும்.

மேலும், படத்தின் நீளம் சற்று அதிகமாக உணரப்படுகிறது. சில காட்சிகளை குறைத்திருந்தால், படத்தின் ஓட்டம் இன்னும் சுறுசுறுப்பாக இருந்திருக்கும். ஒளிப்பதிவு தரமானதாக இருந்தாலும், பாடல்கள் பெரிதாக நினைவில் நிற்கும் வகையில் இல்லை. பின்னணி இசை மட்டும் காட்சிகளுக்கு வலுவூட்டுகிறது.

மொத்தத்தில், கார்மேனி செல்வம் ஒரு சிந்திக்க வைக்கும் படம். சில குறைகள் இருந்தாலும், அது சொல்ல முயலும் சமூக கருத்து முக்கியமானது. நடுத்தர வாழ்க்கையின் உண்மைகளை நேர்மையாக பிரதிபலிக்கும் இந்த படம், குடும்பத்துடன் பார்க்கத்தக்க ஒரு அனுபவமாக திகழ்கிறது.

இதையும் படிங்க: ரசிகர்களின் மனம் கவர்ந்த 'டிமான்டி காலாணி 3'..! படப்பிடிப்பு நிறைவானதாக அறிவித்த படக்குழு..!