நடிகை லட்சுமி ராமகிரிஷ்ணனுக்கே இந்த நிலைமையா..! ரூ.3 லட்சம் கேட்டு மிரட்டிய கும்பலால் பரபரப்பு..!

தமிழ் சின்னத்திரை மற்றும் வெள்ளித்திரை உலகில், நேரடித்தன்மைக்கும் வெளிப்படையான பேச்சுக்கும் பெயர் பெற்றவர்களில் நடிகை லட்சுமி ராமகிருஷ்ணன் முக்கியமானவர். அவர் பேசும் ஒவ்வொரு விஷயமும் சர்ச்சையை ஏற்படுத்தினாலும், அதே நேரத்தில் கவனத்தையும் ஈர்க்காமல் இருப்பதில்லை.

அந்த வகையில், தற்போது அவர் வெளியிட்டுள்ள ஒரு சமூக வலைதள பதிவு, ரசிகர்கள் மட்டுமல்லாது பொதுமக்களிடையேயும் பெரும் அதிர்ச்சியையும் விவாதத்தையும் ஏற்படுத்தியுள்ளது. லட்சுமி ராமகிருஷ்ணன் என்ற பெயர் ஆரம்ப காலத்தில் ஒரு நடிகையாக மட்டுமே அறியப்பட்டாலும், “சொல்வதெல்லாம் உண்மை” என்ற நிகழ்ச்சி அவரை சின்னத்திரையின் தவிர்க்க முடியாத முகமாக மாற்றியது. குடும்ப பிரச்சினைகள், உறவுச் சிக்கல்கள், திருமண தகராறுகள் போன்றவற்றை நேரடியாக விவாதிக்கும் அந்த நிகழ்ச்சியின் மூலம், அவர் வீட்டுக்குள் பேசப்படும் நபராக மாறினார். அந்த நிகழ்ச்சியில் அவர் எடுத்த அணுகுமுறை, சிலருக்கு கடுமையாகவும், சிலருக்கு நியாயமாகவும் தோன்றியது.

ஆனால் ஒரே உண்மை என்னவென்றால், அந்த நிகழ்ச்சி லட்சுமி ராமகிருஷ்ணனின் அடையாளத்தை பல மடங்கு உயர்த்தியது. லட்சுமி ராமகிருஷ்ணன் வெறும் தொகுப்பாளர்தான் என்று நினைப்பது தவறு. அவர் ஒரு அனுபவம் வாய்ந்த நடிகை, சில படங்களில் இயக்குநராகவும் பணியாற்றியவர். தமிழ் மட்டுமல்லாது மலையாளம் உள்ளிட்ட பிற மொழி படங்களிலும் நடித்துள்ளார். வலுவான கதாபாத்திரங்களை தேர்வு செய்வதில் பெயர் பெற்றவர். சமீப காலங்களில், “குக் வித் கோமாளி” போன்ற பொழுதுபோக்கு நிகழ்ச்சிகளிலும் கலந்து கொண்டு, தனது வேறுபட்ட பக்கத்தையும் ரசிகர்களுக்கு காட்டினார்.

இதையும் படிங்க: சுதா கொங்கரா படம்-னா சும்மாவா..! sk-வின் 'பராசக்தி' பட உரிமையை பலகோடி கொடுத்து வாங்கிய ஓடிடி நிறுவனம்..!

அங்கு அவர் காட்டிய எளிமை மற்றும் நகைச்சுவை, பலருக்கு ஆச்சரியத்தை ஏற்படுத்தியது. இந்த சூழலில் லட்சுமி ராமகிருஷ்ணன், சமூக வலைதளங்களில் குறிப்பாக எக்ஸ் தளத்தில் மிகவும் ஆக்டிவாக இருக்கும் பிரபலங்களில் ஒருவர். அரசியல், சமூக பிரச்சினைகள், சினிமா, பெண்கள் உரிமை போன்ற பல விஷயங்களில் அவர் தனது கருத்துகளை வெளிப்படையாக பதிவு செய்வது வழக்கம். அதனாலேயே அவர் சில நேரங்களில் கடும் விமர்சனங்களையும், எதிர்ப்புகளையும் சந்தித்துள்ளார்.

இருந்தாலும், தனது கருத்துகளை சொல்லுவதில் அவர் ஒருபோதும் பின்வாங்கியதில்லை. இந்த நிலையில், லட்சுமி ராமகிருஷ்ணன் தனது எக்ஸ் பக்கத்தில் வெளியிட்ட ஒரு பதிவு, அனைவரையும் அதிர்ச்சியில் ஆழ்த்தியது. அந்த பதிவில், தன்னிடம் பணம் கேட்டு மிரட்டுவதாகவும், தனது இன்ஸ்டாகிராம் கணக்கு முடக்கப்பட்டுள்ளதாகவும் அவர் தெரிவித்துள்ளார். அந்த பதிவில் அவர் கூறியிருப்பதாவது, “என் இன்ஸ்டாகிராம் பக்கம் தற்போது முடக்கப்பட்டுள்ளது. அதை மீண்டும் பெற வேண்டும் என்றால் 3500 டாலர்கள் செலுத்த வேண்டும் என்று சிலர் மிரட்டுகிறார்கள்” என்பதாகும்.

3500 அமெரிக்க டாலர்கள் என்பது இந்திய ரூபாய் மதிப்பில் கணக்கிட்டால், மூன்று லட்சம் ரூபாயை விட அதிகமான தொகை. ஒரு சாதாரண பயனாளருக்கே இது பெரிய தொகையாக இருக்கும் நிலையில், ஒரு பிரபல நடிகையிடமே இவ்வாறு மிரட்டல் விடுப்பது பெரும் அதிர்ச்சியை ஏற்படுத்தியுள்ளது. சமூக வலைதளங்களில் தினசரி செயல்பட்டு வரும் பல பிரபலங்களுக்கு, இன்ஸ்டாகிராம் போன்ற தளங்கள் ஒரு முக்கியமான தொடர்பு ஊடகமாக மாறியுள்ளன. அந்த கணக்கு முடக்கப்பட்டால், அவர்களின் ரசிகர்கள், வேலை வாய்ப்புகள், விளம்பர ஒப்பந்தங்கள் அனைத்தும் பாதிக்கப்பட வாய்ப்பு உள்ளது.

லட்சுமி ராமகிருஷ்ணன் தனது பதிவில், தனது இன்ஸ்டாகிராம் கணக்கு எப்படி முடக்கப்பட்டது என்பதற்கான முழு விவரங்களை தெரிவிக்கவில்லை. ஆனால், கணக்கை மீண்டும் திறந்து தருவதாக கூறி பணம் கேட்பது, இது ஒரு திட்டமிட்ட சைபர் மோசடி என்பதற்கான அறிகுறியாகவே பார்க்கப்படுகிறது. சமீப காலங்களில், பல பிரபலங்களின் சமூக வலைதள கணக்குகள் ஹேக் செய்யப்பட்டு, பணம் கேட்டு மிரட்டும் சம்பவங்கள் அதிகரித்து வருகின்றன. சிலர் அதை உண்மை என நம்பி பணம் செலுத்தி ஏமாறிய சம்பவங்களும் உள்ளன. லட்சுமி ராமகிருஷ்ணன் பதிவை பார்த்த நெட்டிசன்கள் உடனடியாக அவருக்கு ஆலோசனைகளை வழங்க தொடங்கினர்.

“அந்த பணத்தை செலுத்த வேண்டாம்” “இது நிச்சயம் scam” “இன்ஸ்டாகிராம் அதிகாரப்பூர்வமாக ஒருபோதும் பணம் கேட்காது” என பலரும் கருத்து தெரிவித்துள்ளனர். சிலர், “உடனடியாக சைபர் கிரைம் போலீசில் புகார் கொடுக்க வேண்டும்” என்றும் அறிவுறுத்தியுள்ளனர். மேலும், “இன்ஸ்டாகிராம் ஹெல்ப் சென்டர் மூலமாக மட்டுமே கணக்கை மீட்டெடுக்க வேண்டும்” என்றும் பலர் கூறி வருகின்றனர். இந்த சம்பவம், “பிரபலங்களே இப்படி மிரட்டப்படுகிறார்கள் என்றால், சாதாரண பயனாளர்களின் நிலை என்ன?” என்ற கேள்வியை எழுப்பியுள்ளது.

சமூக வலைதளங்களில் நாம் பகிரும் தகவல்கள், புகைப்படங்கள், வீடியோக்கள் அனைத்தும் எவ்வளவு பாதுகாப்பாக உள்ளன என்ற சந்தேகத்தையும் இது ஏற்படுத்தியுள்ளது. ஒரு நடிகை வெளிப்படையாக இதை பகிர்ந்திருப்பது, இதுபோன்ற மோசடிகளுக்கு எதிரான ஒரு எச்சரிக்கையாகவும் பார்க்கப்படுகிறது.

இதையும் படிங்க: மறைந்த காமெடி நடிகர் விவேக் மனசுல இப்படி ஒரு சோகமா..! அவரது மனைவி கொடுத்த ஷாக்கிங் நியூஸ்..!