TTT படம் இன்னும் பாக்கலையா..!! அப்போ வரும் 7ம் தேதி போங்க..!! ஸ்பெஷல் பரிசு காத்திருக்கு..!!

நடிகர் ஜீவா நடிப்பில் வெளியாகி வெற்றி பெற்றிருக்கும் திரைப்படம் 'தலைவர் தம்பி தலைமையில்'. இது ஜீவாவின் 45-வது படமாகும். பொங்கல் பண்டிகையை ஒட்டி ஜனவரி 15, 2026 அன்று திரைக்கு வந்த இப்படம், வெளியான சில நாட்களிலேயே ரசிகர்களிடையே பெரும் வரவேற்பைப் பெற்றது. அரசியல் நையாண்டி கலந்த நகைச்சுவை அம்சங்கள் கொண்ட இந்தப் படம், குடும்பத்துடன் ரசிக்கும் வகையில் உருவாகியுள்ளது.

மலையாளத்தில் 'Falimy' படத்தை இயக்கி புகழ்பெற்ற இயக்குநர் நிதிஷ் சஹாதேவ் இப்படத்தை இயக்கியுள்ளார். 'ராவண கோட்டம்' படத்தை தயாரித்த புகழ்பெற்ற தயாரிப்பாளர் கண்ணன் ரவி இதை தயாரித்துள்ளார். படத்தில் ஜீவாவுடன் தம்பி ராமையா, இளவரசு, பிராத்தனா நாதன், ஜென்சன் திவாகர் உள்ளிட்ட பல முன்னணி நடிகர்கள் முக்கிய கதாபாத்திரங்களில் நடித்துள்ளனர்.

இதையும் படிங்க: வேலுண்டு வினையில்லை.. மயிலுண்டு பயமில்லை..! குடும்பத்துடன் திருச்செந்தூர் முருகனை தரிசனம் செய்த SK..!

இசையமைப்பாளர் விஷ்ணு விஜய் அளித்த இசை படத்திற்கு மேலும் சிறப்பு சேர்த்துள்ளது. வெளியீட்டுக்கு பிறகு திரையரங்குகளில் தொடர்ந்து வெற்றிகரமாக ஓடி வரும் இப்படம், ரசிகர்களின் அமோக ஆதரவால் 25-வது நாளை எட்டியுள்ளது. இதையொட்டி சமீபத்தில் சென்னையில் பிரம்மாண்டமான வெற்றி விழா நடைபெற்றது. விழாவில் படக்குழுவினர், நடிகர்கள் மகிழ்ச்சியுடன் தங்கள் உணர்வுகளைப் பகிர்ந்தனர்.

இந்நிலையில், ரசிகர்களின் அளவற்ற அன்புக்கும் ஆதரவுக்கும் நன்றி தெரிவிக்கும் வகையில் படக்குழு சிறப்பான அறிவிப்பு ஒன்றை வெளியிட்டுள்ளது. வரும் பிப்ரவரி 7-ஆம் தேதி (சனிக்கிழமை) சென்னை கோயம்பேட்டில் உள்ள ரோகிணி சில்வர் ஸ்கிரீன் திரையரங்கில் நடைபெறும் காட்சிகளில் 'தலைவர் தம்பி தலைமையில்' படத்தைப் பார்க்க வரும் ரசிகர்களுக்கு சிறப்பு பரிசு வழங்கப்பட உள்ளது. 

ஆண்களுக்கு வேட்டி-சட்டை செட், பெண்களுக்கு பட்டுப்புடவை இலவசமாக அளிக்கப்படும் என 'கண்ணன் ரவி க்ரூப்ஸ்' அதிகாரப்பூர்வமாக அறிவித்துள்ளது. இந்த அறிவிப்பு X தளத்தில் வெளியிடப்பட்டதும் ரசிகர்கள் மத்தியில் பெரும் உற்சாகத்தை ஏற்படுத்தியுள்ளது. பலரும் படக்குழுவின் இந்த அன்பான சலுகைக்கு பாராட்டு தெரிவித்து வருகின்றனர். படத்தின் வெற்றியை கொண்டாடும் வகையில் ரசிகர்களுக்கு புத்தாடை பரிசளிக்கும் இந்த முயற்சி, தமிழ் சினிமாவில் அரிதான ஒன்றாகவே பார்க்கப்படுகிறது.

தற்போது ரூ.25 கோடிக்கு மேல் வசூலித்துள்ள இப்படம், ஜீவாவின் கம்பேக் படமாகவும், குடும்ப ரசிகர்களின் விருப்பப் படமாகவும் திகழ்கிறது. இத்தகைய சிறப்பு நிகழ்வுகள் மூலம் ரசிகர்களுடனான பிணைப்பை மேலும் வலுப்படுத்தும் படக்குழுவின் முயற்சி பாராட்டத்தக்கது. பிப்ரவரி 7 அன்று ரோகிணி திரையரங்கிற்கு செல்லும் ரசிகர்கள் இந்த சலுகையை பயன்படுத்தி படத்தை மீண்டும் ரசிக்கலாம்.

இதையும் படிங்க: பப்பில் பாலியல் அத்துமீறலில் ஈடுபட்ட நபர்.. கோபத்தில் கொந்தளித்த நடிகை தீவி..!