காலையில் குறைந்த தங்கம் விலை! மதியமே எகிறியது! ஒரே நாளில் 2 முறை விலை மாற்றம்! மக்கள் ஷாக்!

சென்னையில் தங்கம் வாங்க திட்டமிட்டிருந்தவர்களுக்கு இன்று காலை மகிழ்ச்சி அளித்த தங்க விலை, சில மணி நேரங்களிலேயே மீண்டும் உயர்ந்ததால் நகை வாங்க வந்தவர்கள் குழப்பமடைந்தனர். ஒரே நாளில் தங்கம் முதலில் கடுமையாக சரிந்து, பின்னர் மீண்டும் உயர்ந்திருப்பது நகை வியாபாரிகளும், முதலீட்டாளர்களும் உன்னிப்பாக கவனிக்கும் விஷயமாக மாறியுள்ளது.

இன்று (ஜூன் 30) காலை 22 காரட் ஆபரண தங்கத்தின் விலை சவரனுக்கு 2,160 ரூபாய் குறைந்து, ஒரு சவரன் ரூ.1,04,240-க்கும் விற்பனையானது. அதேபோல், ஒரு கிராம் தங்கம் 270 ரூபாய் சரிந்து ரூ.13,030-க்கு விற்பனையாகியது. இதனால் தங்கம் வாங்க காத்திருந்த பொதுமக்கள் உற்சாகமடைந்தனர்.

ஆனால், இந்த சரிவு நீண்ட நேரம் நீடிக்கவில்லை. மதிய வர்த்தகத்தில் தங்கம் மீண்டும் விலை உயர்வை சந்தித்தது. சவரனுக்கு 1,360 ரூபாய் அதிகரித்து ரூ.1,05,600-க்கும், ஒரு கிராமுக்கு 170 ரூபாய் உயர்ந்து ரூ.13,200-க்கும் விற்பனை செய்யப்பட்டது. இதனால் காலை விலையை நம்பி வாங்க காத்திருந்தவர்கள் மீண்டும் அதிக தொகை செலுத்த வேண்டிய நிலை ஏற்பட்டது.

இதையும் படிங்க: போடு தகிட.. தகிட..!! தடாலடியாக குறைந்த தங்கம், வெள்ளி விலை..!! குஷியில் நகைப்பிரியர்கள்..!!

கடந்த சில நாட்களாக தமிழகத்தில் தங்கத்தின் விலை தொடர்ந்து ஏற்றம், இறக்கம் கண்டு வருகிறது. கடந்த சனிக்கிழமை 22 காரட் ஆபரண தங்கம் ஒரு கிராம் ரூ.13,370-க்கும், ஒரு சவரன் ரூ.1,06,960-க்கும் விற்பனையானது. ஞாயிற்றுக்கிழமை தங்க சந்தைக்கு விடுமுறை என்பதால் அதே விலையே தொடர்ந்தது. நேற்று (ஜூன் 29) ஒரு கிராம் தங்கம் ரூ.70 குறைந்து ரூ.13,300-க்கும், சவரன் ரூ.560 குறைந்து ரூ.1,06,400-க்கும் விற்பனையானது.

வெள்ளி விலையிலும் இன்று அதிரடி மாற்றம் காணப்பட்டது. காலை ஒரு கிலோ வெள்ளி ரூ.5,000 குறைந்து ரூ.2,40,000-க்கும், ஒரு கிராம் ரூ.240-க்கும் விற்பனையானது. ஆனால் மதியத்தில் வெள்ளி விலை மீண்டும் உயர்ந்து, ஒரு கிலோ ரூ.2,45,000-க்கும், ஒரு கிராம் ரூ.245-க்கும் விற்பனை செய்யப்பட்டது.

ஒரே நாளில் தங்கம் மற்றும் வெள்ளி விலையில் ஏற்பட்ட இந்த திடீர் ஏற்ற, இறக்கங்கள் காரணமாக முதலீட்டாளர்கள் மற்றும் நகை வாங்க திட்டமிட்டுள்ள பொதுமக்கள் சந்தை நிலவரத்தை தொடர்ந்து கவனித்து வருகின்றனர். சர்வதேச சந்தை போக்கு மற்றும் உள்நாட்டு தேவையைப் பொறுத்து அடுத்த சில நாட்களிலும் விலையில் மாற்றம் ஏற்பட வாய்ப்புள்ளதாக வணிக வட்டாரங்கள் தெரிவிக்கின்றன.

இதையும் படிங்க: தங்கம் விலை தடாலடி குறைவு..!! ஒரு லட்சத்தை நெருங்கும் ஒரு சவரன்..!!