வாராஹி அம்மனுக்கு சிறப்பு அபிஷேகம்..!! தஞ்சை பெரிய கோவிலில் குவிந்த பக்தர்கள்..!!

தஞ்சாவூரில் அமைந்துள்ள உலகப் புகழ்பெற்ற அருள்மிகு பெருவுடையார் திருக்கோயிலில் (தஞ்சை பெரிய கோவில்) நடைபெற்று வரும் ஆஷாட நவராத்திரி விழா பக்தி உணர்வுடன் சிறப்பாக நடைபெற்று வருகிறது. இவ்விழாவின் முக்கிய அம்சமாக, கோயிலில் தனிச் சன்னதியில் அருள்பாலிக்கும் மஹாவாராஹி அம்மனுக்கு சிறப்பு வழிபாடுகள் மற்றும் அபிஷேகங்கள் நடைபெற்றன. இந்த நிகழ்வில் ஏராளமான பக்தர்கள் கலந்து கொண்டு அம்மனை தரிசித்து அருளாசி பெற்றனர்.

தஞ்சை பெரிய கோவிலில் உள்ள மஹாவாராஹி அம்மனுக்கே ஆண்டுதோறும் ஆஷாட நவராத்திரி விழா தனிச்சிறப்புடன் நடத்தப்படுவது குறிப்பிடத்தக்கது. பத்து நாட்கள் நடைபெறும் இந்த விழா கடந்த 13-ஆம் தேதி மகா கணபதி ஹோமத்துடன் தொடங்கியது. விழா நாட்களில் தினமும் சிறப்பு பூஜைகள், யாகங்கள் மற்றும் ஆன்மிக நிகழ்ச்சிகள் நடைபெற்று வருகின்றன.

இன்றைய வழிபாட்டின் போது, மஹாவாராஹி அம்மனுக்கு பால், தயிர், சந்தனம், இளநீர், தேன், பஞ்சாமிர்தம் உள்ளிட்ட பல்வேறு திரவியங்களைக் கொண்டு சிறப்பு அபிஷேகம் நடைபெற்றது. அதற்கு முன்பாக வேத மந்திரங்கள் முழங்க யாகசாலையில் சிறப்பு யாகம் நடத்தப்பட்டு, யாகத்தில் புனிதப்படுத்தப்பட்ட தீர்த்தம் அம்மனுக்கு அபிஷேகம் செய்யப்பட்டது. பின்னர் மகா தீபாராதனை நடைபெற்றது. அப்போது திரண்டிருந்த பக்தர்கள் பக்தி பரவசத்துடன் அம்மனை வழிபட்டு தரிசனம் செய்தனர்.

இதையும் படிங்க: இன்றைய ராசிபலன் (11-07-2026)..!! இந்த ராசிக்காரர்களுக்கு இன்று காதலில் ஆழமான பிணைப்பு..!!

ஆஷாட நவராத்திரி விழாவின் ஒவ்வொரு நாளிலும் மஹாவாராஹி அம்மன் வெவ்வேறு அலங்காரங்களில் பக்தர்களுக்கு அருள்பாலித்து வருகிறார். இன்று இனிப்பு அலங்காரத்தில் அம்மன் எழுந்தருளி பக்தர்களுக்கு காட்சியளிக்கிறார். இந்த அலங்காரத்தை காண ஏராளமானோர் கோயிலுக்கு வருகை தந்தனர்.

விழாவை முன்னிட்டு தினமும் ஆன்மிக மற்றும் கலாசார நிகழ்ச்சிகளும் நடத்தப்பட்டு வருகின்றன. அதன் ஒரு பகுதியாக, பெரியகோவில் வளாகத்தில் பரதநாட்டிய கலை நிகழ்ச்சிகள் நடைபெற உள்ளன. ஆன்மிகமும், தமிழர் பண்பாட்டும் இணையும் இவ்விழா, பக்தர்கள் மற்றும் கலை ஆர்வலர்களின் பெரும் வரவேற்பைப் பெற்று சிறப்பாக நடைபெற்று வருகிறது.