திருத்தணி: முருகன் கோயிலில் திருப்படி திருவிழா கோலாகலம்..!! பக்தர்கள் நேர்த்திக்கடன்..!!

திருத்தணி அருள்மிகு சுப்ரமணிய சுவாமி கோயிலில் ஆண்டுதோறும் நடைபெறும் திருப்படி திருவிழா இன்று காலை வெகு விமரிசையாக தொடங்கியது. ஆங்கில புத்தாண்டு வரவேற்பை முன்னிட்டு நடைபெறும் இந்த விழாவில் லட்சக்கணக்கான பக்தர்கள் கலந்து கொண்டு முருகப்பெருமானை வழிபட்டனர்.

மேலும் கோயிலின் 365 படிகளை ஏறி நேர்த்திக்கடன் செலுத்தும் இந்த திருவிழா, பக்தர்களுக்கு ஆன்மீக அமைதியும், புத்துணர்ச்சியும் அளிக்கும் சிறப்பு நிகழ்வாக அமைந்தது. காலை 9:30 மணியளவில் சரவணப் பொய்கை அருகிலுள்ள மலையடிவாரத்தில் விழா தொடங்கியது. கோயில் நிர்வாகத்தினர் 365 படிகளிலும் கற்பூரம் ஏற்றி, தேங்காய் உடைத்து சிறப்பு பூஜை செய்தனர்.

அதுமட்டுமின்றி நூற்றுக்கணக்கான பஜனை கோஷ்டியினர் ஒவ்வொரு படியிலும் திருப்புகழ், தேவாரம், திருவாசகம் போன்ற பக்தி பாடல்களைப் பாடியபடி மலைக்கோயிலுக்கு சென்று மூலவரை வழிபட்டனர். குறிப்பாக, பெண் பக்தர்கள் ஒவ்வொரு படிக்கும் மஞ்சள் பூசி, குங்குமம் வைத்து, கற்பூரம் ஏற்றியவாறு ஏறி, தங்கள் நேர்த்திக்கடன்களை நிறைவேற்றினர்.

இதையும் படிங்க: திருத்தணி முருகன் கோவிலுக்கு ஆட்டோக்கள் செல்ல தடை..!! அதுவும் 3 நாட்கள்.. காரணம் இதுதான்..!!

இந்த 365 படிகள் ஆண்டின் 365 நாட்களையும் குறிக்கும் வகையில் அமைந்துள்ளன என்பது குறிப்பிடத்தக்கது. பக்தர்கள் திருப்புகழ் பாடல்களைப் பாடியபடி படிகளை ஏறிய காட்சி ஆன்மீக சூழலை உருவாக்கியது. காலை 11 மணியளவில் உற்சவர் முருகப்பெருமான் வள்ளி-தெய்வானை சமேதராக வெள்ளி மயில் வாகனத்தில் எழுந்தருளி மாடவீதியில் வீதியுலா வந்து பக்தர்களுக்கு அருள்பாலித்தார்.

இந்த வாகன ஊர்வலத்தில் ஆயிரக்கணக்கான பக்தர்கள் கலந்து கொண்டு "முருகா... முருகா..." என முழங்கினர். விழாவை முன்னிட்டு கோயில் நிர்வாகம் சார்பில் பக்தர்களுக்கு தேவையான அனைத்து ஏற்பாடுகளும் செய்யப்பட்டுள்ளன. நேற்று முதல் ஜனவரி 1 வரை மூன்று நாட்களுக்கு ஆட்டோ உள்ளிட்ட வாகனங்கள் மலைக்கோயிலுக்குள் செல்ல தடை விதிக்கப்பட்டுள்ளது.

வாகன நெரிசலைத் தவிர்க்க, மலையடிவாரத்திலிருந்து செட்டிகுளம் வரை கோயில் பேருந்துகள் இலவசமாக இயக்கப்படுகின்றன. மேலும், வளர்ச்சிப் பணிகள் காரணமாக ஏற்படும் இடநெருக்கடியை சமாளிக்க சிறப்பு நடவடிக்கைகள் எடுக்கப்பட்டுள்ளன. ஆங்கில புத்தாண்டை முன்னிட்டு இன்று இரவு முழுவதும் கோயில் நடை திறந்திருக்கும்.

நள்ளிரவு 12:01 மணிக்கு மூலவருக்கு சிறப்பு அலங்காரமும், தீபாராதனையும் நடைபெறும். பல்லாயிரக்கணக்கான பக்தர்கள் நான்கு மணி நேரம் காத்திருந்து சுவாமி தரிசனம் செய்வர் என எதிர்பார்க்கப்படுகிறது. மேலும் ஜனவரி 1 அன்று 24 மணி நேரம் கோயில் திறந்திருக்கும் என கோயில் நிர்வாகம் தெரிவித்துள்ளது.

இந்த விழா, பக்தர்களுக்கு புத்தாண்டில் புதிய தொடக்கத்தை அளிக்கும் ஆன்மீக நிகழ்வாக கருதப்படுகிறது. திருத்தணி முருகன் கோயில், அறுபடை வீடுகளில் ஒன்றாக திகழ்கிறது. இங்கு ஆண்டுதோறும் டிசம்பர் இறுதியில் நடைபெறும் இந்த திருப்படி திருவிழா, தமிழகத்தின் பல்வேறு பகுதிகளிலிருந்து பக்தர்களை ஈர்க்கிறது.

கொரோனா காலத்திற்குப் பிறகு இந்த ஆண்டு விழா முழு வீச்சில் நடைபெறுவது பக்தர்களிடையே உற்சாகத்தை ஏற்படுத்தியுள்ளது. பாதுகாப்பு, சுகாதார ஏற்பாடுகளுடன் விழா நடைபெறுவது குறிப்பிடத்தக்கது.

இதையும் படிங்க: சபரிமலையில் ஒலித்த "சாமியே சரணம் ஐயப்பா" கோஷம்..!! மார்கழி குளிரிலும் பக்தர்கள் திரண்டு தரிசனம்..!!