ஓசூர் அருகே அதிர்ச்சி சம்பவம்.. 8 வயது சிறுமிக்கு நேர்ந்த கொடூரம்.. குற்றவாளியை தேடும் பணியில் 3 தனிப்படைகள்!

கிருஷ்ணகிரி மாவட்டம் ஓசூர் அருகே தேன்கனிக்கோட்டை பகுதியில் நடந்த கொடூரச் சம்பவம் பரபரப்பை ஏற்படுத்தியுள்ளது. மலைக்கிராமத்தைச் சேர்ந்த 8 வயது சிறுமி, உள்ளூர் ஊராட்சி ஒன்றியத் தொடக்கப்பள்ளியில் நான்காம் வகுப்பு படித்து வருகிறார். செவ்வாய்க்கிழமை மாலை பள்ளி முடிந்ததும் வீடு திரும்பும் வழியில் தனியாக நடந்து சென்று கொண்டிருந்தபோது, அடையாளம் தெரியாத ஒரு நபர் அவரைத் தாக்கி வாயை மூடி, அருகிலுள்ள காட்டுப்பகுதிக்குள் தூக்கிச் சென்று பாலியல் வன்கொடுமைக்கு உள்ளாக்கியுள்ளார்.

சம்பவம் குறித்து சிறுமி குடும்பத்தினரிடம் தெரிவித்ததை அடுத்து, உறவினர் ஒருவர் குழந்தை உதவி எண் 1098-க்கு அழைப்பு விடுத்தார். உடனடியாக 108 ஆம்புலன்ஸ் மூலம் தேன்கனிக்கோட்டை ஆரம்ப சுகாதார நிலையத்திற்கு அழைத்துச் செல்லப்பட்ட சிறுமி, பின்னர் கிருஷ்ணகிரி அரசு மருத்துவக் கல்லூரி மருத்துவமனையில் அனுமதிக்கப்பட்டு தீவிர சிகிச்சை பெற்று வருகிறார். அவரது நிலை குறித்து மருத்துவர்கள் கண்காணித்து வருகின்றனர்.

சிறுமியின் பெற்றோர் அளித்த புகாரின் அடிப்படையில், தேன்கனிக்கோட்டை அனைத்து மகளிர் காவல் நிலையம் வழக்குப் பதிவு செய்துள்ளது. குற்றவாளியைக் கண்டுபிடிக்க மாவட்ட காவல் கண்காணிப்பாளர் தலைமையில் மூன்று தனிப்படைகள் அமைக்கப்பட்டு தீவிர தேடல் நடத்தப்பட்டு வருகிறது. குற்ற நடைபெற்ற இடத்திற்கு மேற்பார்வையாளர் நேரில் சென்று ஆய்வு செய்துள்ளார். 

இதையும் படிங்க: மேகதாது அணை விவகாரம்! தமிழக-கர்நாடக எல்லையில் பேருந்துகள் திடீர் நிறுத்தம்! போலீசார் குவிப்பு!

மாவட்ட ஆட்சியரும் இச்சம்பவம் குறித்து கவனம் செலுத்தி வருகிறார்.போக்சோ சட்டத்தின் கீழ் கடும் நடவடிக்கை எடுத்து குற்றவாளியை உடனடியாக கைது செய்ய வேண்டும் என உள்ளூர் மக்கள், சமூக அமைப்புகள் உள்ளிட்ட பல்வேறு தரப்பினரும் வலியுறுத்தி வருகின்றனர். குழந்தைகள் பாதுகாப்பு மற்றும் பள்ளிக்குச் செல்லும் மாணவர்களின் பாதுகாப்பு குறித்து விழிப்புணர்வு ஏற்படுத்த வேண்டும் என்ற குரல்களும் எழுந்துள்ளன. காவல்துறை விசாரணை தொடர்ந்து நடைபெற்று வருகிறது.

இதையும் படிங்க: “ஆடு நனைகிறதே என ஓநாய் வருத்தப்பட வேண்டாம்...” - நிர்மல் குமாரை வெளுத்து வாங்கிய திமுக மார்க்கண்டேயன்...!