மதுபான பாரில் தகராறு! சென்னையில் இளம்பெண் கார் ஏற்றிக்கொலை!! கதறி அழும் பெற்றோர்!

சென்னையின் கோயம்பேடு பகுதியில் உள்ள மதுபான பாரில் ஏற்பட்ட தகராறு, இளம்பெண் உயிரிழப்பில் முடிந்த சம்பவம் பெரும் அதிர்ச்சியையும் பரபரப்பையும் ஏற்படுத்தியுள்ளது. இந்த சம்பவத்தில் இலங்கைத் தமிழரான யாசினி என்ற இளம்பெண் உயிரிழந்த நிலையில், காவல்துறை தீவிர விசாரணையை மேற்கொண்டு வருகிறது.

காவல்துறை தரப்பில் கிடைத்த தகவலின்படி, கோயம்பேடு பகுதியில் உள்ள ஒரு பாரில் சிலர் நடனமாடிக் கொண்டிருந்தபோது இருதரப்பினருக்கு இடையே வாக்குவாதம் ஏற்பட்டதாக கூறப்படுகிறது. ஆரம்பத்தில் சாதாரண தகராறாக தொடங்கிய இந்த மோதல் பின்னர் தீவிரமடைந்ததாக தகவல்கள் தெரிவிக்கின்றன.

தகராறுக்கு பிறகு யாசினி மற்றும் அவருடன் இருந்த ஒருவர் இருசக்கர வாகனத்தில் அங்கிருந்து புறப்பட்டுச் சென்றுள்ளனர். அப்போது பாரில் ஏற்பட்ட பிரச்னையில் தொடர்புடையதாகக் கூறப்படும் மற்றொரு தரப்பினர் காரில் பின்தொடர்ந்து வந்து, அவர்கள் சென்ற இருசக்கர வாகனத்தின் மீது மோதியதாக கூறப்படுகிறது. இந்த மோதி தாக்கிய சம்பவத்தில் யாசினி சம்பவ இடத்திலேயே உயிரிழந்தார்.

இதையும் படிங்க: பாலியல் புகாரில் சிக்கிய வளசரவாக்கம் டாக்டர் விபரீத முடிவு! மன உளைச்சலால் உயிரை மாய்த்துக் கொண்ட சோகம்!

அவருடன் பயணித்த மற்றொரு நபர் பலத்த காயமடைந்த நிலையில் மீட்கப்பட்டு அருகிலுள்ள மருத்துவமனையில் அனுமதிக்கப்பட்டுள்ளார். அவருக்கு தொடர்ந்து சிகிச்சை அளிக்கப்பட்டு வருவதாக கூறப்படுகிறது.

சம்பவம் குறித்து தகவல் கிடைத்ததும் காவல்துறையினர் உடனடியாக சம்பவ இடத்திற்கு விரைந்து சென்று விசாரணையை தொடங்கினர். முதற்கட்டமாக அப்பகுதியில் உள்ள கண்காணிப்பு கேமரா காட்சிகள் சேகரிக்கப்பட்டு ஆய்வு செய்யப்பட்டன. அதனைத் தொடர்ந்து இந்த வழக்கில் தொடர்புடையதாக சந்தேகிக்கப்படும் பாலகுரு என்ற இளைஞரை காவல்துறையினர் கைது செய்துள்ளனர்.

விசாரணையில், சம்பவம் நடந்தபோது காரில் மொத்தம் ஆறு பேர் இருந்ததாக தெரியவந்துள்ளது. தற்போது தலைமறைவாக உள்ள மற்ற நபர்களை அடையாளம் கண்டு பிடிக்க தனிப்படை அமைத்து தேடுதல் வேட்டை நடத்தப்பட்டு வருகிறது.

இதற்கிடையில், உயிரிழந்த யாசினியின் தாயார் கதறி அழும் காட்சிகள் சமூக வலைதளங்களில் பரவி பலரையும் சோகத்தில் ஆழ்த்தியுள்ளது. ஒரு சாதாரண தகராறு உயிர்ப்பலி வாங்கிய இந்த சம்பவம் சென்னை முழுவதும் அதிர்ச்சியை ஏற்படுத்தியுள்ள நிலையில், குற்றவாளிகள் அனைவரையும் விரைவில் கைது செய்ய வேண்டும் என்ற கோரிக்கையும் வலுத்து வருகிறது.

இதையும் படிங்க: சென்னையில் மட்டும் 7 அமைச்சர்கள்!! தலைநகரில் தனிகவனம் செலுத்தும் விஜய்! பின்னணி இதோ!