காதலி கதையை முடித்துவிட்டு ஜெர்மனிக்கு தப்பிய இந்திய மாணவன்! ஏர்போர்ட்டில் மடக்கி பிடித்த போலீசார்!

வாஷிங்டன்: அமெரிக்காவில் தனது காதலியை கொலை செய்ததாக சந்தேகிக்கப்படும் இந்திய மாணவன், சம்பவத்துக்குப் பிறகு நாட்டை விட்டு வெளியேறி ஜெர்மனி சென்ற நிலையில், அந்நாட்டு விமான நிலையத்தில் அமெரிக்க அதிகாரிகளால் கைது செய்யப்பட்டதாக போலீசார் தெரிவித்துள்ளனர்.

அரிசோனா பல்கலைக்கழகத்திற்கு அருகிலுள்ள அடுக்குமாடி குடியிருப்பில் 19 வயதான ஜூலிசா ரூபி சலாசர் கடந்த ஆகஸ்ட் 6-ம் தேதி சடலமாக கண்டெடுக்கப்பட்டார். அவரது குடும்பத்தினர் அளித்த தகவலைத் தொடர்ந்து போலீசார் விசாரணையை தொடங்கினர். உடலில் காயங்கள் இருந்ததும், கழுத்து நெரிக்கப்பட்டிருக்கலாம் என்பதற்கான அறிகுறிகள் இருந்ததும் விசாரணையில் தெரியவந்ததாக கூறப்படுகிறது.

இதையடுத்து, சலாசரின் நண்பர்கள் மற்றும் தோழிகளிடம் போலீசார் விசாரணை மேற்கொண்டனர். அப்போது கிடைத்த தகவல்களின் அடிப்படையில், அவரது காதலனான இந்தியாவைச் சேர்ந்த வருண் பாட்சிகாரியிடம் விசாரணை நடத்த அதிகாரிகள் முடிவு செய்ததாக தெரிவிக்கப்பட்டுள்ளது.

இதையும் படிங்க: ஈரான் போருக்கு எண்ட் கார்டு? டிரம்ப் தயாரிக்கும் ரகசிய திட்டம்! அமெரிக்க ஊடகம் வெளியிட்ட பரபரப்பு தகவல்!

ஆனால், அதற்குள் வருண் டக்சன் நகரை விட்டு வெளியேறியதாக போலீசார் தெரிவித்துள்ளனர். அவர் முதலில் ஹூஸ்டன் நகருக்குச் சென்று, அங்கிருந்து விமானம் மூலம் ஜெர்மனியின் பெர்லின் நகருக்குச் சென்றதாக கூறப்படுகிறது. பின்னர் அங்கிருந்து இந்தியாவுக்கு செல்ல அவர் திட்டமிட்டிருந்ததாகவும் அதிகாரிகள் சந்தேகித்துள்ளனர்.

இதனிடையே, சலாசர் கொலை வழக்கில் வருணுக்கு எதிராக பிடிவாரண்ட் பிறப்பிக்கப்பட்டது. அந்த வாரண்டின் அடிப்படையில், அவர் ஜெர்மனியில் உள்ள விமான நிலையத்தில் அமெரிக்க அதிகாரிகளால் கைது செய்யப்பட்டதாக போலீசார் தெரிவித்துள்ளனர். தற்போது அவரை அரிசோனாவுக்கு அழைத்து வந்து வழக்கின் அடுத்தகட்ட விசாரணையை மேற்கொள்ள நடவடிக்கை எடுக்கப்பட்டு வருகிறது.

அரிசோனா பல்கலைக்கழகத்தில் பிசினஸ் அனலிட்டிக்ஸ் படித்து வந்த வருண், இந்த சம்பவத்துக்குப் பிறகு கல்வி நிறுவனத்தில் இருந்து நீக்கப்பட்டதாக கூறப்படுகிறது. மேலும், அவர் மீது ஏற்கனவே சில வழக்குகள் இருப்பதாகவும் தகவல்கள் வெளியாகியுள்ளன. அவை தொடர்பான விவரங்களையும் அதிகாரிகள் ஆய்வு செய்து வருவதாக கூறப்படுகிறது.

இந்நிலையில், சலாசரின் மரணம் தொடர்பான முழுமையான காரணம், சம்பவம் நடைபெற்ற சூழல் மற்றும் வருணுக்கு அதில் உள்ள தொடர்பு ஆகியவை குறித்து போலீசார் தொடர்ந்து விசாரணை நடத்தி வருகின்றனர். குற்றச்சாட்டு நிரூபிக்கப்படும் வரை வருண் சட்டப்படி குற்றமற்றவராகவே கருதப்படுவார்.

அமெரிக்காவில் தொடங்கிய கொலை வழக்கில், குற்றம் தொடர்பாக தேடப்பட்ட இந்திய மாணவன் ஜெர்மனியில் கைது செய்யப்பட்டிருப்பது இந்த வழக்கில் புதிய திருப்பமாக அமைந்துள்ளது.

இதையும் படிங்க: ஈரானை குறிவைக்கும் அமெரிக்கா - இஸ்ரேல்? உலகையே பதறவைக்கும் புதிய போர் திட்டம்!