பயிற்சி IPS பெண் அதிகாரிக்கு பாலியல் தொல்லை! வாட்ஸ்அப்பில் ஆபாச படங்கள்! அதிர்ந்தது போலீஸ் அகாடமி!
பயிற்சி ஐபிஎஸ் பெண் அதிகாரி அளித்த புகாரின் பேரில் போலீசார் நடத்திய முதற்கட்ட விசாரணையில் பெண் அதிகாரிக்கு பாலியல் தொல்லை கொடுத்தது தெரியவந்தது.
by
தெலங்கானா மாநிலம் ஹைதராபாத் அருகே உள்ள தேசிய போலீஸ் அகாடமியில் பயிற்சி பெற்று வரும் பெண் ஐபிஎஸ் அதிகாரி அளித்த பாலியல் தொல்லை புகார் பரபரப்பை ஏற்படுத்தியுள்ளது. புகாரின் அடிப்படையில் போலீசார் முதற்கட்ட விசாரணை மேற்கொண்டதில், குற்றச்சாட்டில் முகாந்திரம் இருப்பதாக தெரியவந்ததைத் தொடர்ந்து வழக்குப்பதிவு செய்து விசாரணையை தீவிரப்படுத்தியுள்ளனர்.
கர்நாடகாவைச் சேர்ந்த சுமார் 30 வயதுடைய பெண் அதிகாரி, தேசிய போலீஸ் அகாடமியில் ஐபிஎஸ் பயிற்சி பெற்று வருகிறார். அதே அகாடமியில் ஆந்திரப் பிரதேசத்தின் பிரகாசம் மாவட்டத்தைச் சேர்ந்த உதய கிருஷ்ணா ரெட்டி பயிற்சியாளராக பணியாற்றி வருகிறார். இவர் கடந்த மாதம் 23-ஆம் தேதி முதல் தொடர்ந்து பெண் அதிகாரிக்கு பல்வேறு வகைகளில் பாலியல் தொல்லை அளித்ததாக புகாரில் தெரிவிக்கப்பட்டுள்ளது.
புகாரின்படி, பெண் அதிகாரியின் வாட்ஸ்அப் எண்ணுக்கு ஆபாச படங்கள் அனுப்பியதுடன், அவரை மனரீதியாகவும் பாலியல் ரீதியாகவும் தொந்தரவு செய்ததாக கூறப்படுகிறது. மேலும், அகாடமியில் சக ஊழியர்கள் முன்னிலையில் அவமரியாதையான வார்த்தைகளை பயன்படுத்தி பேசியதாகவும், அவரது கண்ணியத்தை குலைக்கும் வகையில் வதந்திகளை பரப்பியதாகவும் குற்றம்சாட்டப்பட்டுள்ளது. இதனுடன், பெண் அதிகாரியின் செல்போனை அனுமதியின்றி எடுத்துப் பார்த்ததுடன், தனிப்பட்ட தகவல்களை அணுகியதாகவும் புகாரில் குறிப்பிடப்பட்டுள்ளது.
இதையும் படிங்க: ஐஏஎஸ், ஐபிஎஸ் அதிகாரிகளின் 2 ஆம் நாள் மாநாடு..! முதல்வர் விஜய் தலைமையில் முக்கிய ஆலோசனைகள்..!!
மேலும், அவரது தனிப்பட்ட வீடியோக்களை பதிவு செய்து, அவற்றை அவரது கணவருக்கு அனுப்பியதாகவும் குற்றச்சாட்டு எழுந்துள்ளது. இந்த சம்பவங்கள் தொடர்ச்சியாக நடந்ததால் மன உளைச்சலுக்கு ஆளான பெண் அதிகாரி, ஹைதராபாத் அட்டாப்பூர் காவல் நிலையத்தில் அதிகாரப்பூர்வமாக புகார் அளித்தார்.
புகாரைத் தொடர்ந்து போலீசார் முதற்கட்ட விசாரணை நடத்தினர். அதில், பெண் அதிகாரி கூறிய சில குற்றச்சாட்டுகளுக்கு ஆதாரங்கள் இருப்பதாக ஆரம்பகட்ட தகவல்கள் வெளியாகியுள்ளன. இதையடுத்து சம்பந்தப்பட்ட பயிற்சியாளர் மீது வழக்குப்பதிவு செய்யப்பட்டு, டிஜிட்டல் ஆதாரங்கள், செல்போன் தகவல்கள் மற்றும் சாட்சியங்களின் அடிப்படையில் விரிவான விசாரணை நடைபெற்று வருகிறது.
தேசிய அளவில் ஐபிஎஸ் அதிகாரிகள் பயிற்சி பெறும் முக்கிய கல்வி நிறுவனத்தில் இந்த சம்பவம் நடைபெற்றிருப்பது கவனத்தை ஈர்த்துள்ளது. இருப்பினும், விசாரணை இன்னும் நடைபெற்று வருவதால், குற்றச்சாட்டுகள் நீதிமன்றத்தில் நிரூபிக்கப்படும் வரை அவை குற்றச்சாட்டுகளாகவே கருதப்படுகின்றன. சம்பவம் தொடர்பாக அகாடமி நிர்வாகமும் தனிப்பட்ட விசாரணை மேற்கொள்ளுமா என்பது குறித்து எதிர்பார்ப்பு நிலவுகிறது.
இதையும் படிங்க: எல்லையை விரிவு செய்த பவன் கல்யாண்! தெலுங்கானா அரசியலில் ஜனசேனா என்ட்ரி!!
