இனி தனி கட்டுப்பாடு! இந்து சமய அறநிலையத்துறையில் தமிழக அரசு கொண்டுவந்த முக்கிய மாற்றம்!
தமிழ் வளர்ச்சி மற்றும் செய்தித் துறை செயலராக உள்ள ராஜாராமன், மறு உத்தரவு வரும் வரை இந்த புதிய இந்து சமய அறநிலையத்துறையின் செயலராக கூடுதல் பொறுப்பை கவனிப்பார் என அரசு அறிவித்துள்ளது.
by
சென்னை: தமிழக அரசின் தலைமைச் செயலகத்தில் ‘இந்து சமய அறநிலையத்துறை’ என்ற பெயரில் புதிய தனித்துறை உருவாக்கப்பட்டுள்ளதாக தமிழக அரசு அரசாணை வெளியிட்டுள்ளது. நிர்வாக வசதியை மேம்படுத்தவும், துறையின் பணிகளை விரைவுபடுத்தவும் இந்த நடவடிக்கை மேற்கொள்ளப்பட்டுள்ளதாக அரசாணையில் தெரிவிக்கப்பட்டுள்ளது.
தமிழக அரசின் பல்வேறு துறைகளின் நிர்வாகப் பணிகளை சீரமைக்கும் நடவடிக்கைகளின் ஒரு பகுதியாக இந்த புதிய துறை உருவாக்கப்பட்டுள்ளது. இதுவரை தனி ஆணையரகத்தின் கீழ் இயங்கி வந்த இந்து சமய அறநிலையத்துறை தொடர்பான நிர்வாக அமைப்பில் தற்போது மாற்றம் கொண்டுவரப்பட்டுள்ளது.
தமிழக அரசு தலைமைச் செயலர் சாய்குமார் வெளியிட்டுள்ள அரசாணையில், நிர்வாக வசதி மற்றும் பணிகளை மேலும் விரைவுபடுத்தும் நோக்கில் தலைமைச் செயலகத்தில் ‘இந்து சமய அறநிலையத்துறை’ என்ற புதிய தனித்துறையை உருவாக்க அரசு முடிவு செய்துள்ளதாக தெரிவிக்கப்பட்டுள்ளது.
இதையும் படிங்க: முதல்வர் விஜய் அரசு எடுத்த அதிரடி முடிவு? 55 ஆண்டுகளாக செயல்பட்ட மாநில திட்டக்குழுவின் அமைப்புக்கு மூடுவிழா!
இதன் தொடர்ச்சியாக, இதுவரை இயங்கி வந்த இந்து சமய அறநிலையத்துறை ஆணையரகம், இனி முழுமையாக இந்த புதிய துறையின் கட்டுப்பாட்டின் கீழ் கொண்டு வரப்படுகிறது. இதனால் அறநிலையத்துறை தொடர்பான நிர்வாகப் பணிகள் தலைமைச் செயலகத்தில் தனித்துறையின் வாயிலாக ஒருங்கிணைக்கப்படும் வகையில் அமைப்பு மாற்றப்பட்டுள்ளது.
புதிய துறை உருவாக்கப்பட்டுள்ளதைத் தொடர்ந்து, தமிழக அரசின் நிர்வாக விதிகள் மற்றும் தலைமைச் செயலக நடைமுறை விதிகளில் தேவையான திருத்தங்கள் மேற்கொள்ளப்பட உள்ளன. இதற்கான திருத்தங்களை மனித வள மேலாண்மைத் துறை தனியாக வெளியிடும் என அரசாணையில் கூறப்பட்டுள்ளது.
இதற்கிடையே, தமிழ் வளர்ச்சி மற்றும் செய்தித் துறை செயலராக உள்ள ராஜாராமன், மறு உத்தரவு வரும் வரை இந்த புதிய இந்து சமய அறநிலையத்துறையின் செயலராக கூடுதல் பொறுப்பை கவனிப்பார் என அரசு அறிவித்துள்ளது.
புதிய தனித்துறை உருவாக்கப்பட்டிருப்பது இந்து சமய அறநிலையத்துறை நிர்வாகத்தில் முக்கியமான அமைப்பு மாற்றமாக பார்க்கப்படுகிறது. கோவில் நிர்வாகம், அறநிலையத்துறை சார்ந்த பணிகள் உள்ளிட்டவற்றை மேலும் ஒருங்கிணைத்து விரைவாக செயல்படுத்துவதற்காக இந்த நடவடிக்கை எடுக்கப்பட்டுள்ளதாக அரசு தரப்பில் தெரிவிக்கப்பட்டுள்ளது.
புதிய துறையின் நிர்வாக செயல்பாடுகள் எவ்வாறு அமையப்போகின்றன, எதிர்காலத்தில் துறையின் பணிகளில் என்னென்ன மாற்றங்கள் ஏற்படும் என்பது தொடர்பான விவரங்கள் அடுத்தகட்ட அரசாணைகள் மற்றும் நிர்வாக உத்தரவுகள் மூலம் தெரியவரும் என எதிர்பார்க்கப்படுகிறது.
இதையும் படிங்க: புனித ஜார்ஜ் கோட்டைக்கு குட் பை? சென்னை பட்டினப்பாக்கத்தில் புதிய தலைமை செயலகம்! கிடைத்தது க்ரீன் சிக்னல்!
