திருப்பதி ஸ்ரீ சிட்டியில் பயங்கரம்! மருந்து தொழிற்சாலையில் பாய்லர் வெடிப்பு; 4 பேர் பலி!
காயமடைந்த மேலும் சில தொழிலாளர்களுக்கு மருத்துவமனையில் தீவிர சிகிச்சை அளிக்கப்பட்டு வருகிறது. அவர்களின் நிலை குறித்த முழுமையான தகவல்கள் அதிகாரப்பூர்வமாக வெளியாகவில்லை.
by
ஆந்திர மாநிலம் திருப்பதி மாவட்டம் ஸ்ரீ சிட்டி தொழிற்பூங்காவில் உள்ள மருந்து தயாரிப்பு தொழிற்சாலையில் ஏற்பட்ட பயங்கர பாய்லர் வெடிப்பு சம்பவத்தில் 4 தொழிலாளர்கள் உயிரிழந்த சம்பவம் பெரும் அதிர்ச்சியை ஏற்படுத்தியுள்ளது. மேலும் பலர் படுகாயமடைந்துள்ளதாகவும், அவர்களுக்கு மருத்துவமனையில் தீவிர சிகிச்சை அளிக்கப்பட்டு வருவதாகவும் தகவல் வெளியாகியுள்ளது.
ஸ்ரீ சிட்டி தொழிற்பூங்காவில் செயல்பட்டு வரும் டில் ஹெல்த் கேர் நிறுவனத்தில் வழக்கம்போல் தொழிலாளர்கள் பணியில் ஈடுபட்டிருந்தனர். அப்போது தொழிற்சாலையில் திடீரென பாய்லர் பயங்கர சத்தத்துடன் வெடித்ததாக கூறப்படுகிறது. இந்த வெடிப்பின் தாக்கத்தில் தொழிற்சாலையின் ஒரு பகுதியில் இருந்த தொழிலாளர்கள் பலர் காயமடைந்தனர்.
வெடிப்பு சத்தம் கேட்டதும் தொழிற்சாலை வளாகத்தில் பரபரப்பு ஏற்பட்டது. உடனடியாக போலீசாருக்கும் தீயணைப்புத்துறையினருக்கும் தகவல் தெரிவிக்கப்பட்டது. சம்பவ இடத்திற்கு விரைந்து வந்த தீயணைப்பு வீரர்கள் மற்றும் மீட்புக்குழுவினர், தொழிற்சாலைக்குள் சிக்கியிருந்தவர்களை மீட்கும் பணியில் ஈடுபட்டனர்.
இதையும் படிங்க: திருமலை திருப்பதி ஏழுமலையான் கோயிலில் துர்கா ஸ்டாலின் சாமி தரிசனம்! வேத ஆசீர்வாதம் பெற்றார்!
இந்த மீட்பு நடவடிக்கையின்போது, வெடிப்பு நிகழ்ந்த பகுதியில் இருந்து 3 தொழிலாளர்களின் உடல்கள் மீட்கப்பட்டதாக அதிகாரிகள் தெரிவித்துள்ளனர். மேலும் படுகாயமடைந்த தொழிலாளர்கள் உடனடியாக அருகிலுள்ள மருத்துவமனைக்கு அனுப்பி வைக்கப்பட்டனர். அவர்களில் சிகிச்சை பலனின்றி மேலும் ஒருவர் உயிரிழந்தார். இதனால் இந்த விபத்தில் உயிரிழந்தவர்களின் எண்ணிக்கை 4 ஆக உயர்ந்துள்ளது.
இதனிடையே, காயமடைந்த மேலும் சில தொழிலாளர்களுக்கு மருத்துவமனையில் தீவிர சிகிச்சை அளிக்கப்பட்டு வருகிறது. அவர்களின் நிலை குறித்த முழுமையான தகவல்கள் அதிகாரப்பூர்வமாக வெளியாகவில்லை.
இந்த பயங்கர விபத்து குறித்து போலீசார் மற்றும் சம்பந்தப்பட்ட தொழிற்சாலை பாதுகாப்புத்துறை அதிகாரிகள் விசாரணை நடத்தி வருகின்றனர். பாய்லர் வெடித்ததற்கான காரணம் என்ன, தொழிற்சாலையில் பாதுகாப்பு விதிமுறைகள் முறையாக பின்பற்றப்பட்டனவா, தொழில்நுட்பக் கோளாறு ஏதேனும் ஏற்பட்டதா என்பது உள்ளிட்ட பல்வேறு கோணங்களில் விசாரணை நடைபெற்று வருகிறது.
ஸ்ரீ சிட்டி தொழிற்பூங்காவில் நடந்த இந்த சம்பவம் அப்பகுதியில் பெரும் அதிர்ச்சியையும் பரபரப்பையும் ஏற்படுத்தியுள்ளது
இதையும் படிங்க: திருப்பதி செல்ல திட்டமா? டிசம்பர் தரிசனத்துக்கான ஆன்லைன் முன்பதிவு தேதிகள் அறிவிப்பு! பக்தர்கள் தவறவிடக்கூடாத முக்கிய தகவல்கள்!
