2025ம் ஆண்டின் மருத்துவத்துக்கான நோபல் பரிசு.. தட்டிச்சென்ற 3 பேர்..!! யார் அவர்கள்..??

உலக அளவில் மருத்துவம், இயற்பியல், வேதியியல், இலக்கியம், பொருளாதாரம், அமைதி ஆகிய துறைகளில் மகத்தான சாதனை படைப்பவர்களுக்கு ஆண்டுதோறும் நோபல் பரிசு வழங்கப்படுகிறது. ஒரு பதக்கம், சான்றிதழ் மற்றும் ரொக்கப்பரிசு அடங்கிய நோபல் பரிசு   ஆறு நாட்கள் அறிவிக்கப்படும். 2025-ம் ஆண்டுக்கான நோபல் பரிசு பெறுவோர் விவரங்கள் இன்று முதல் அறிவிக்கப்படுகின்றன. அதன்படி முதல் நாளான இன்று மருத்துவத்துக்கான நோபல் பரிசு அறிவிக்கப்பட்டுள்ளது.

கரோலின்ஸ்கா இன்ஸ்டிட்யூட்டின் நோபல் அசெம்பிளி இன்று, 2025 ஆண்டின் உடலியல் அல்லது மருத்துவத்துக்கான நோபல் பரிசை அமெரிக்காவைச் சேர்ந்த மேரி இ. பிரங்கோவ், ஃப்ரெட் ராம்ஸ்டெல் மற்றும் ஜப்பானைச் சேர்ந்த ஷிமோன் சகாகுச்சி ஆகிய மூவருக்கு வழங்குவதாக அறிவித்துள்ளது.

இதையும் படிங்க: டிரம்ப்பிற்கு நோபல் பரிசு இல்லையாம்..!! ஓ.. காரணம் இதுவா..??

இவர்கள் "பெரிஃபெரல் இம்யூன் டாலரன்ஸ்" தொடர்பான கண்டுபிடிப்புகளுக்காக, குறிப்பாக உடலின் சொந்த திசுக்களைத் தாக்காமல் இம்யூன் சிஸ்டத்தை கட்டுப்படுத்தும் ரெகுலேட்டரி டி செல்களை அடையாளம் கண்டதற்காக இப்பரிசைப் பெறுகின்றனர். இக்கண்டுபிடிப்புகள் இம்யூன் சிஸ்டத்தின் செயல்பாட்டைப் புரிந்துகொள்ள உதவியுள்ளன. பெரும்பாலான மக்களுக்கு ஆட்டோ இம்யூன் நோய்கள் ஏற்படாமல் இருப்பதற்கான காரணத்தை விளக்குகின்றன.

1995ஆம் ஆண்டு ஷிமோன் சகாகுச்சி ஒரு புதிய வகை இம்யூன் செல்களைக் கண்டுபிடித்தார், இது தைமஸ் (சென்ட்ரல் டாலரன்ஸ்) மூலம் மட்டுமே இம்யூன் டாலரன்ஸ் ஏற்படுகிறது என்ற பாரம்பரிய கருத்தை சவால் செய்தது. 2001இல் பிரங்கோவ் மற்றும் ராம்ஸ்டெல், ஃபாக்ஸ்பி3 ஜீன் மியூடேஷன் ஆட்டோ இம்யூன் நோய்களுக்கு வழிவகுக்கும் என்பதை எலிகள் மற்றும் மனிதர்களில் (ஐபெக்ஸ் சிண்ட்ரோம்) கண்டறிந்தனர். பின்னர் 2003இல் சகாகுச்சி, ஃபாக்ஸ்பி3ஐ ரெகுலேட்டரி டி செல்களின் வளர்ச்சியுடன் இணைத்தார். இவர்களின் பணி பெரிஃபெரல் டாலரன்ஸ் துறையைத் தொடங்கியது, இது புற்றுநோய், ஆட்டோ இம்யூன் நோய்கள் சிகிச்சைக்கு புதிய வழிகளைத் திறந்துள்ளது.

நோபல் கமிட்டி தலைவர் ஓலே காம்பே கூறுகையில், "இவர்களின் கண்டுபிடிப்புகள் இம்யூன் சிஸ்டத்தின் செயல்பாட்டைப் புரிந்துகொள்ளவும், ஆட்டோ இம்யூன் நோய்களைத் தடுக்கவும் முக்கியமானவை" என்றார். பரிசுத் தொகை 11 மில்லியன் ஸ்வீடிஷ் க்ரோனர், மூவருக்கும் சமமாகப் பகிர்ந்தளிக்கப்படும். மேரி பிரங்கோவ் சியாட்டிலின் இன்ஸ்டிடியூட் ஃபார் சிஸ்டம்ஸ் பயாலஜியில் பணியாற்றுகிறார், ராம்ஸ்டெல் சான் பிரான்சிஸ்கோவின் சோனோமா பயோதெரபியூடிக்ஸில் உள்ளார், சகாகுச்சி ஒசாகா யூனிவர்சிட்டியில் இருக்கிறார்.

இக்கண்டுபிடிப்புகள் மருத்துவ உலகில் புரட்சியை ஏற்படுத்தியுள்ளன. ஆட்டோ இம்யூன் நோய்களான ரூமாடாய்ட் ஆர்த்ரைடிஸ், டைப் 1 டயாபெடிஸ் போன்றவற்றுக்கு புதிய சிகிச்சை முறைகளை உருவாக்க உதவும். நோபல் பரிசு வருடாவருடம் அறிவியல் துறையின் சிறந்த பங்களிப்புகளை அங்கீகரிக்கிறது, இது 1901 முதல் தொடர்கிறது. இந்த ஆண்டு மருத்துவப் பிரிவு முதலில் அறிவிக்கப்பட்டது, அடுத்து இயற்பியல், வேதியியல் உள்ளிட்டவை வரும்.

இதையும் படிங்க: பத்திக்கிச்சு பீகார் தேர்தல் ஜுரம்!! முதற்கட்ட வேட்பாளர்களை அறிவித்தது ஆம் ஆத்மி!