300 ஆண்டுகளுக்குப் பின் நெதர்லாந்திலிருந்து மீட்கப்பட்ட வரலாற்றுச் செப்பேடுகள் - பிரதமர் மோடியிடம் ஒப்படைப்பு!

சுமார் 300 ஆண்டுகளுக்கு முன்பு டச்சு அதிகாரி ஒருவரால் நெதர்லாந்துக்கு எடுத்துச் செல்லப்பட்ட வரலாற்றுச் சிறப்புமிக்க ‘ஆனைமங்கலம் சோழர்கால செப்பேடுகள்’ தற்போது அதிகாரப்பூர்வமாக மீட்கப்பட்டுப் பிரதமர் நரேந்திர மோடியிடம் ஒப்படைக்கப்பட்டுள்ளன. மாமன்னன் ராஜராஜ சோழன் நாகப்பட்டினத்தில் இருந்த புத்த விகாரத்திற்கு நிலம் தானமாக வழங்கியதை விவரிக்கும் மிக முக்கிய வரலாற்று ஆவணம் இது என்பது குறிப்பிடத்தக்கது.

இந்தியாவின் பழங்கால வரலாற்றுச் சின்னங்கள் மற்றும் திருடப்பட்ட கலைப் பொருட்களை வெளிநாடுகளில் இருந்து தூதரக ரீதியாக மீட்கும் பணிகள் தீவிரமாக நடந்து வரும் வேளையில், தமிழகத்தின் சோழர் காலப் பெருமையை உலகிற்குப் பறைசாற்றும் மாபெரும் வரலாற்றுப் பொக்கிஷம் ஒன்று இந்தியாவிற்குத் திரும்பியுள்ளது. கி.பி. 985 முதல் 1012 வரையிலான காலப்பகுதியைச் சேர்ந்த, 21 ஏடுகளைக் கொண்ட புகழ்பெற்ற ஆனைமங்கலம் செப்பேடுகள் (ஆனைமங்கலம் லெயிடென் செப்பேடுகள்) நெதர்லாந்து நாட்டிலிருந்து வெற்றிகரமாக மீட்கப்பட்டுப் பிரதமர் நரேந்திர மோடியிடம் டெல்லியில் ஒப்படைக்கப்பட்டுள்ளன.

இந்தச் செப்பேடுகளின் வரலாற்றுப் பின்னணி மிகவும் ஆச்சரியமளிக்கக் கூடியது. சுமார் 300 ஆண்டுகளுக்கு முன்பு இந்தியாவில் டச்சுக்காரர்களின் ஆதிக்கம் இருந்த காலத்தில், டச்சு அதிகாரி ஒருவரால் இந்தச் செப்பேடுகள் நெதர்லாந்து நாட்டிற்குத் திருடிச் செல்லப்பட்டன. மாமன்னன் ராஜராஜ சோழனின் ஆட்சிக் காலத்தில் செதுக்கப்பட்ட இந்த 21 செப்பேடுகளும், நாகப்பட்டினத்தில் கடல் கடந்த வணிகத் தொடர்புகளுக்காகக் கட்டப்பட்டிருந்த புகழ்பெற்ற புத்த விகாரத்திற்கு (சூடாமணி விகாரம்), ஆனைமங்கலம் என்ற கிராமத்தை ராஜராஜ சோழன் நிலமாகத் தானமாக வழங்கிய உன்னத வரலாற்றையும், அக்காலத்து நிர்வாக முறைகளையும் மிகத் துல்லியமாக விவரிக்கின்றன.

இதையும் படிங்க: உலகளவில் 3வது பெரிய ஸ்டார்ட்-அப் சூழலியலை கொண்ட நாடு இந்தியா..!! நெதர்லாந்தில் உணர்ச்சிபொங்க பேசிய பிரதமர் மோடி..!!

நெதர்லாந்தின் லெயிடென் பல்கலைக்கழக அருங்காட்சியகத்தில் இத்தனை காலம் வைக்கப்பட்டிருந்த இந்த சோழர் காலத்துச் சான்றுகளைத் தற்போதைய மத்திய அரசு மேற்கொண்ட தீவிரத் தூதரகப் பேச்சுவார்த்தைகள் மூலம் தாய்நாட்டிற்குத் திரும்பக் கொண்டு வந்துள்ளது. பிரதமர் மோடியிடம் ஒப்படைக்கப்பட்டுள்ள இந்தச் செப்பேடுகள் விரைவில் தமிழகப் தொல்லியல் துறை வசம் ஒப்படைக்கப்படும் எனத் தெரிகிறது.

இதையும் படிங்க: கான்வாய் வாகனங்கள் பாதியாக குறைப்பு..!! பிரதமர் மோடியின் எரிபொருள் சிக்கன நடவடிக்கை..!!