தற்பெருமையின் உச்சம்! சொதப்பிய ட்ரம்ப்! கிண்டலடித்து சிரித்த தலைவர்கள்!! தேவையா இது?

அமெரிக்க அதிபர் டொனால்ட் டிரம்ப், அர்மீனியா-அசர்பைஜான் போர் நிறுத்த ஒப்பந்தத்தை தனது வெற்றியாகப் புகழ்ந்து, நோபல் பரிசுக்கு தகுதியானவர் என்று கூறி வருகிறார். ஆனால், அந்த நாடுகளின் பெயர்களைத் தவறாக உச்சரித்து, அர்மீனியாவை 'அல்பேனியா' என்று கூறிய அவரது பிழை, ஐரோப்பிய தலைவர்களிடம் கிண்டலுக்கு ஆளானது. 

டென்மார்க் தலைநகர் கோபன்ஹேகனில் நடந்த ஐரோப்பிய அரசியல் சமூக கூட்டத்தில், அல்பேனிய பிரதமர் எடி ரமா, பிரான்ஸ் அதிபர் இமானுவேல் மேக்ரான் மற்றும் அசர்பைஜான் அதிபர் இல்ஹாம் அலியேவ் ஆகியோர் இதைப் பற்றி கலகலப்பாகப் பேசி சிரித்த சம்பவம் வைரல் ஆகியுள்ளது.

அர்மீனியா-அசர்பைஜான் இடையே பல ஆண்டுகளாக நடந்த போரை, கடந்த ஆகஸ்ட் மாதம் வெள்ளை மாளிகையில் அமெரிக்க அதிபர் டிரம்ப் மத்தியஸ்தம் செய்து, இரு நாட்டு தலைவர்களான நிகோல் பஷினியன் மற்றும் இல்ஹாம் அலியேவை போர் நிறுத்த ஒப்பந்தத்தில் கையெழுத்திடச் செய்தார். இந்த ஒப்பந்தம், இரு நாடுகளும் தனி நாட்டு எல்லைகளை மதிக்கும் என உறுதியளித்து, 40 ஆண்டுகளுக்கும் மேலான மோதலை முடிவுக்கு கொண்டுவந்தது. 

இதையும் படிங்க: ஆபரேஷன் சிந்தூர்! 7 இந்திய விமானங்களை சுட்டு வீழ்த்தினோம்!! ஐ.நா சபையில் பாக்., பிரதமர் கொக்கரிப்பு!

 இதைத் தொடர்ந்து, பிரிட்டன் பிரதமர் கெய்ர் ஸ்டார்மருடன் செய்தியாளர்களை சந்தித்த டிரம்ப், "அபர்-பைஜான் மற்றும் அல்பேனியா இடையேயான போரை நான் நிறுத்தினேன்," என்று கூறினார். உண்மையில் அர்மீனியாவை அல்பேனியா என்றும், அசர்பைஜானை 'அபர்-பைஜான்' என்றும் தவறாக உச்சரித்தார்.  இது டிரம்பின் முதல் பிழையல்ல; ஃபாக்ஸ் நியூஸ் நேர்காணலிலும், கேம்போடியா-அர்மீனியா போர் என்று கற்பனைப் போர்களைப் பற்றி பேசியுள்ளார். 

இந்த போர் நிறுத்தத்தைத் தொடர்ந்து, டிரம்ப் நோபல் அமைதி பரிசுக்கு தகுதியானவர் என்று தன்னைப் புகழ்ந்து, "இந்தியா-பாகிஸ்தான் உள்பட 7 போர்களை நான் நிறுத்தினேன். பரிசு கொடுக்காவிட்டால் அது அமெரிக்காவை அவமதிப்பதாகும்," என்று கூறியுள்ளார். 

கோபன்ஹேகன் கூட்டத்தில், அல்பேனிய பிரதமர் எடி ரமா, பிரான்ஸ் அதிபர் மேக்ரானையும் அசர்பைஜான் அதிபர் அலியேவையும் சந்தித்தபோது, "நீங்கள் அல்பேனியா-அசர்பைஜான் இடையேயான போர் நிறுத்த ஒப்பந்தத்திற்கு வாழ்த்து தெரிவிக்கவில்லை. அதற்காக மன்னிப்பு கேட்க வேண்டும்," என்று கிண்டலடித்தார். 

 இதைக் கேட்ட மேக்ரான், "மன்னித்துவிடுங்கள்," என்று பதிலளித்தார். இதனைக் கேட்டு அலியேவ் உட்பட ஐரோப்பிய தலைவர்கள் கலகலவென சிரித்தனர்.  இந்த வீடியோ சமூக வலைதளங்களில் வைரலாகி, டிரம்பின் பிழையை உலகம் முழுவதும் பரபரப்பாக விவாதிக்கிறது.

இந்த சம்பவம், டிரம்பின் புவியியல் அறிவு குறித்த விமர்சனங்களை மீண்டும் எழுப்பியுள்ளது. அவர் இதற்கு முன்பும் அர்மீனியா-அல்பேனியா குழப்பத்தை சிலமுறை செய்துள்ளார்.  வெள்ளை மாளிகை, "டிரம்ப் உலக அமைதிக்கு அதிகம் செய்துள்ளார்," என பதிலளித்துள்ளது.  இந்த கிண்டல், அமெரிக்க-ஐரோப்பிய உறவுகளில் இலேசான பதற்றத்தை ஏற்படுத்தியுள்ளது, ஆனால் போர் நிறுத்த ஒப்பந்தத்தின் முக்கியத்துவத்தை மறுக்கவில்லை.

இதையும் படிங்க: இத்தனைக்கும் காரணம் இந்தியாவும், சீனாவும் தான்! ஐ.நா சபையில் புலம்பிய ட்ரம்ப்!