எங்கள் தந்தையை கொல்ல முயற்சி நடக்கிறது! இம்ரான் கான் மகன்களின் பரபரப்பு குற்றச்சாட்டு!

பாகிஸ்தான் முன்னாள் பிரதமர் இம்ரான் கானை சிறையிலேயே வைத்து கொல்ல முயற்சி நடப்பதாக அவரது மகன்கள் சுலைமான் கான் மற்றும் காசிம் கான் குற்றம்சாட்டியுள்ளனர். இந்த பரபரப்பு குற்றச்சாட்டை பாகிஸ்தான் அரசு மறுத்துள்ள நிலையில், இம்ரான் கானின் உடல்நிலை தொடர்பான விவகாரம் மீண்டும் சர்ச்சையை ஏற்படுத்தியுள்ளது.

பாகிஸ்தான் தெஹ்ரீக்-இ-இன்சாப் கட்சியின் தலைவரான இம்ரான் கான், பல்வேறு வழக்குகளில் தண்டனை பெற்றதை தொடர்ந்து 2023ஆம் ஆண்டு முதல் ராவல்பிண்டியில் உள்ள அடியாலா சிறையில் அடைக்கப்பட்டுள்ளார். சமீப காலமாக அவருக்கு கண் பார்வை தொடர்பான பிரச்சினையும் கடுமையான மன அழுத்தமும் இருப்பதாக அவரது குடும்பத்தினர் தொடர்ந்து தெரிவித்து வருகின்றனர்.

இம்ரான் கானுக்கு உரிய மருத்துவ சிகிச்சை வழங்குவது தொடர்பாக பாகிஸ்தான் உச்ச நீதிமன்றமும் உத்தரவிட்டிருந்ததாக கூறப்படுகிறது. இதையடுத்து மருத்துவ பரிசோதனைக்காக அவர் அழைத்துச் செல்லப்பட்ட நிலையில், சில மணி நேரங்களிலேயே மீண்டும் சிறைக்கு கொண்டு செல்லப்பட்டதாக அவரது மகன்கள் தெரிவித்துள்ளனர்.

இதையும் படிங்க: இம்ரான் கானுக்காக களமிறங்கிய 21 முன்னாள் கேப்டன்கள்! ஷெபாஸ் ஷெரீபுக்கு பறந்த பரபரப்பு கடிதம்!!

தனியார் செய்தி நிறுவனத்துக்கு அளித்த பேட்டியில் அவர்கள், உச்ச நீதிமன்ற உத்தரவுப்படி தங்களது தந்தையை தனியார் மருத்துவமனைக்கு அழைத்துச் செல்லவில்லை என்றும், அரசு மருத்துவமனைக்கு அழைத்துச் சென்று மீண்டும் சிறையில் அடைத்துவிட்டதாகவும் கூறினர்.

மேலும், இம்ரான் கானின் கண்ணில் கட்டு போடப்பட்டிருப்பதாகவும், அவர் மிகுந்த மன அழுத்தத்தில் இருப்பதாகவும் தெரிவித்தனர்.

இதனைத் தொடர்ந்து, “சிறையிலேயே வைத்து அவரை கொல்ல வெளிப்படையாக முயற்சி நடக்கிறது” என்று அவரது மகன்கள் கடுமையான குற்றச்சாட்டை முன்வைத்துள்ளனர். ஆனால், இந்த குற்றச்சாட்டை பாகிஸ்தான் அரசு திட்டவட்டமாக மறுத்துள்ளது.

தண்டனை பெற்ற கைதியாக இருந்தாலும் இம்ரான் கானுக்கு தேவையான மருத்துவ பரிசோதனைகள் மற்றும் புத்தகங்கள் உள்ளிட்ட அடிப்படை வசதிகள் வழங்கப்பட்டு வருவதாக அதிகாரிகள் தெரிவித்துள்ளனர். இதனால் இம்ரான் கானின் மகன்கள் கூறும் குற்றச்சாட்டுக்கும் அரசின் விளக்கத்துக்கும் இடையே கடும் முரண்பாடு ஏற்பட்டுள்ளது.

இதற்கிடையே, இந்திய கிரிக்கெட் அணியின் முன்னாள் வீரர்களான சுனில் கவாஸ்கர், கபில் தேவ் உள்ளிட்டோரும் இம்ரான் கானுக்கு முறையான மருத்துவ உதவிகள் கிடைக்க வேண்டும் எனக் கோரிக்கை விடுத்துள்ளதாக தகவல்கள் வெளியாகியுள்ளன.

இம்ரான் கானின் உடல்நிலை, சிறையில் அவருக்கு வழங்கப்படும் மருத்துவ வசதிகள் மற்றும் அவரது உயிருக்கு உண்மையில் அச்சுறுத்தல் உள்ளதா என்பது தொடர்பாக தொடர்ந்து கேள்விகள் எழுந்துள்ளன. அவரது மகன்களின் குற்றச்சாட்டு சர்வதேச அளவில் கவனத்தை ஈர்த்துள்ள நிலையில், பாகிஸ்தான் அரசின் அடுத்தகட்ட நடவடிக்கைகள் மீது எதிர்பார்ப்பு ஏற்பட்டுள்ளது.

இதையும் படிங்க: நள்ளிரவில் மருத்துவமனைக்கு அழைத்துச் செல்லப்பட்ட இம்ரான் கான்! உடல்நலக் கவலை! வெளியானது முக்கிய தகவல்!