"பாகிஸ்தான் ஆக்கிரமிப்பு காஷ்மீர் இந்தியாவின் பிரிக்க முடியாத பகுதி!" – ஐ.நா.வில் இந்தியா கடும் பதிலடி

பாகிஸ்தான் ஆக்கிரமிப்பு காஷ்மீரில் (PoK) மனித உரிமைகள் மற்றும் அடிப்படை சுதந்திரங்கள் தொடர்ந்து ஒடுக்கப்பட்டு வருவதாக இந்தியா, ஐக்கிய நாடுகள் சபை பாதுகாப்பு கவுன்சிலில் கடுமையாக குற்றம்சாட்டியுள்ளது. மேலும், ஜம்மு மற்றும் காஷ்மீர் இந்தியாவின் பிரிக்க முடியாத ஒருங்கிணைந்த பகுதியாகும் என்ற தனது நிலைப்பாட்டை மீண்டும் உறுதிப்படுத்தியுள்ளது.

ஐ.நா.வுக்கான இந்தியாவின் நிரந்தரப் பிரதிநிதி தூதர் பர்வதனேனி ஹரீஷ், பாதுகாப்பு கவுன்சில் கூட்டத்தில் பேசும்போது, பாகிஸ்தான் ஆக்கிரமிப்பு காஷ்மீரில் கருத்துச் சுதந்திரம், அடிப்படை உரிமைகள் மற்றும் ஜனநாயக மதிப்புகள் தொடர்ந்து ஒடுக்கப்பட்டு வருவதாக தெரிவித்தார். அங்கு மக்களின் அடிப்படை சுதந்திரங்கள் மறுக்கப்படுவதையும், மனித உரிமை மீறல்கள் நடைபெறுவதையும் உலக நாடுகள் கவனிக்க வேண்டும் என்றும் அவர் வலியுறுத்தினார்.

மேலும், எல்லை தாண்டிய பயங்கரவாதத்தை அரசு கொள்கையாக பாகிஸ்தான் கைவிடாத வரை, சிந்து நதி நீர் ஒப்பந்தம் தொடர்பாக எந்தவித அர்த்தமுள்ள ஒத்துழைப்பும் சாத்தியமில்லை என்றும் இந்தியா தெரிவித்தது. பயங்கரவாதத்தையும் அமைதிப் பேச்சுவார்த்தையையும் ஒரே நேரத்தில் முன்னெடுக்க முடியாது என்ற இந்தியாவின் நீண்டகால நிலைப்பாட்டையும் ஹரீஷ் மீண்டும் சுட்டிக்காட்டினார்.

இதையும் படிங்க: 16 ஆண்டுகளுக்கு பிறகு இந்தியா திரும்பும் லலித் மோடி... நீதிமன்ற தீர்ப்பால் பரபரப்பு திருப்பம்!

பாகிஸ்தான் சர்வதேச மேடைகளில் பொய்யான தகவல்களை பரப்புவதற்கு பதிலாக, தனது நாட்டில் நிலவும் உண்மையான பிரச்சினைகளுக்கு தீர்வு காண வேண்டும் என்றும் இந்தியா அறிவுறுத்தியது. உள்நாட்டில் அரசியல் ஆதாயம் பெறுவதற்காக தவறான தகவல்களை பரப்புவது சர்வதேச சமூகத்தை தவறாக வழிநடத்தும் முயற்சி என்றும் அவர் விமர்சித்தார்.

பாகிஸ்தானில் நடைபெறும் மனித உரிமை மீறல்கள் மற்றும் ஜனநாயகக் கட்டுப்பாடுகள் குறித்து சர்வதேச அமைப்புகள் போதிய கவனம் செலுத்தவில்லை என்றும் இந்தியா குற்றம்சாட்டியது. இதேபோன்ற சம்பவங்கள் வேறு நாடுகளில் நடந்தால் கடுமையான கண்டனங்கள் எழும் நிலையில், பாகிஸ்தானில் நடைபெறும் நிகழ்வுகள் பெரும்பாலும் கவனிக்கப்படாமல் இருப்பதாகவும் இந்தியா சுட்டிக்காட்டியது.

உரையின் இறுதியில், ஜம்மு மற்றும் காஷ்மீர் யூனியன் பிரதேசம் இந்தியாவின் ஒருங்கிணைந்த மற்றும் பிரிக்க முடியாத பகுதியாக இருந்தது, தற்போது உள்ளது, இனியும் அப்படியே இருக்கும் என்று பர்வதனேனி ஹரீஷ் திட்டவட்டமாக தெரிவித்தார். இது அரசியலமைப்பு மற்றும் சட்டப்பூர்வமான உண்மை என்றும், அதை பாகிஸ்தான் வேண்டுமென்றே புறக்கணித்து வருவதாகவும் அவர் கூறினார்.

இந்தியா மற்றும் பாகிஸ்தான் இடையேயான காஷ்மீர் விவகாரம் மீண்டும் சர்வதேச மேடையில் விவாதமாகியுள்ள நிலையில், ஐ.நா.வில் இந்தியா வெளியிட்ட இந்தக் கருத்துகள் இருநாடுகளின் தூதரக உறவுகளில் புதிய கவனத்தை ஏற்படுத்தியுள்ளன.

இதையும் படிங்க: டெல்லி போராட்டத்திற்கு பின்னணியில் அமெரிக்கா?... முன்கூட்டியே வெளியான எச்சரிக்கை.... பகீர் கிளப்பும் தகவல்கள்...!