8 மாத கால விண்வெளி பயணம்! தயாராகிறார் அனில் மேனன்! இந்திய வம்சாவளியைச் சேர்ந்த நாசா விண்வெளி வீரர்!
இந்திய வம்சாவளியைச் சேர்ந்த நாசா விண்வெளி வீரர் அனில் மேனன் 8 மாத கால சர்வதேச விண்வெளி நிலைய பயணத்திற்குத் தயாராகிறார்.
by
ஜூலை 14-ம் தேதி சர்வதேச விண்வெளி நிலையத்துக்கு (ISS) பயணம் மேற்கொள்ளும் இந்திய வம்சாவளியைச் சேர்ந்த நாசா விண்வெளி வீரர் அனில் மேனன், தனது முதல் நீண்டகால விண்வெளிப் பயணத்துக்கு தயாராகி வருகிறார். 49 வயதான அனில் மேனன், ரஷ்ய விண்வெளி வீரர்களான பியோதர் துப்ரோவ் மற்றும் அன்னா கிகினா ஆகியோருடன் கஜகஸ்தானில் உள்ள பைக்கோனூர் விண்வெளி ஏவுதளத்தில் இருந்து ரோஸ்கோஸ்மோஸ் சோயுஸ் எம்எஸ்-29 விண்கலம் மூலம் புறப்பட உள்ளார்.
மினியாபோலிஸில் இந்திய மற்றும் உக்ரைன் வம்சாவளிப் பெற்றோருக்கு பிறந்த அனில் மேனன், அவசர மருத்துவ நிபுணராக பணியாற்றியவர். அமெரிக்க விமானப்படையில் பணியாற்றியபோது ஆப்கானிஸ்தான் உள்ளிட்ட பல இடங்களுக்கு சென்று பணியாற்றிய அனுபவம் கொண்டவர். எவரெஸ்ட் மலையேறுபவர்களுக்கு மருத்துவ உதவி அளித்துள்ளார். இந்தியாவில் ரோட்டரி தூதராக ஒரு ஆண்டு தங்கி போலியோ தடுப்பூசி பணிகளுக்கு பங்களிப்பு செய்துள்ளார்.
2014-ம் ஆண்டு நாசாவில் விமான அறுவை சிகிச்சை நிபுணராக சேர்ந்த அனில், பின்னர் ஸ்பேஸ்எக்ஸ் நிறுவனத்துக்கு மாறினார். அங்கு நிறுவனத்தின் மருத்துவத் திட்டத்தை உருவாக்கினார். 2021-ம் ஆண்டு நாசா விண்வெளி வீரராக தேர்ந்தெடுக்கப்பட்ட அவர், இரண்டு ஆண்டு பயிற்சியை முடித்துள்ளார். இப்போது 8 மாதங்கள் சர்வதேச விண்வெளி நிலையத்தில் தங்கி பல்வேறு ஆராய்ச்சிகளை மேற்கொள்ள உள்ளார்.
இதையும் படிங்க: கரூர்ல நடந்தது என்ன? உதவியது யார்? ஓடியது யார்?! முதல்வர் விஜய்க்கு செந்தில்பாலாஜி பதிலடி!
விண்வெளிப் பயணத்தின்போது நீண்ட காலம் விண்வெளியில் தங்குவதால் மனித உடலில் ஏற்படும் மாற்றங்களை ஆய்வு செய்வார். எதிர்கால விண்வெளிப் பயணங்களுக்கு செயற்கை நுண்ணறிவை (AI) பயன்படுத்தி மருத்துவ உதவி அளிக்கும் தொழில்நுட்பத்தை உருவாக்கும் ஆராய்ச்சியிலும் ஈடுபட உள்ளார்.
அனில் மேனனின் மனைவி அன்னா மேனனும் (இயற்பெயர் வில்ஹெல்ம்) ஒரு விண்வெளி வீராங்கனை ஆவார். அவர் 2024 செப்டம்பரில் ஸ்பேஸ்எக்ஸ் போலாரிஸ் டான் திட்டத்தில் பங்கேற்று ஐந்து நாட்கள் விண்வெளியில் சென்றிருந்தார். இந்திய வம்சாவளியைச் சேர்ந்த அனில் மேனனின் இந்தப் பயணம் இந்தியர்கள் மத்தியில் பெரும் உற்சாகத்தை ஏற்படுத்தியுள்ளது.
இந்தியாவின் விண்வெளித் துறை வளர்ச்சியில் அனில் மேனன் போன்ற இந்திய வம்சாவளியினர் பங்கேற்பது பெருமைக்குரியது. அவரது பயணம் வெற்றிகரமாக அமைய வாழ்த்துக்கள் பலரிடமிருந்தும் குவிந்து வருகின்றன.
இதையும் படிங்க: சொத்து, அரசு வேலைதான் முக்கியம்!! அம்மாவையே கூலிப்படை ஏவி கொன்ற மகள் கைது!!
