இந்தோனேசியாவை உலுக்கிய நிலநடுக்கம்! பலி எண்ணிக்கை 38 ஆக உயர்வு: 50-க்கும் மேற்பட்டோர் காயம்!

இந்தோனேசியாவில் இன்று அதிகாலை ஏற்பட்ட சக்திவாய்ந்த நிலநடுக்கம் பெரும் அதிர்ச்சியை ஏற்படுத்தியுள்ளது. ரிக்டர் அளவில் 7.7 ஆக பதிவான இந்த நிலநடுக்கத்தில் இதுவரை 38 பேர் உயிரிழந்துள்ளதாக தகவல் வெளியாகியுள்ளது. மேலும், 50-க்கும் மேற்பட்டோர் காயமடைந்துள்ளனர்.

ஆசிய நாடான இந்தோனேசியா ஆயிரக்கணக்கான தீவுகளை உள்ளடக்கியது. அந்நாட்டின் பிரோல்ஸ் தீவை மையமாகக் கொண்டு இன்று அதிகாலை சக்திவாய்ந்த நிலநடுக்கம் ஏற்பட்டதாக தெரிவிக்கப்பட்டுள்ளது. நிலநடுக்கத்தின் அதிர்வு பல பகுதிகளில் உணரப்பட்டதாக கூறப்படுகிறது.

நிலநடுக்கம் ஏற்பட்ட சில நிமிடங்களிலேயே பல இடங்களில் மக்கள் வீடுகளை விட்டு வெளியேறி பாதுகாப்பான பகுதிகளுக்கு சென்றுள்ளனர். சக்திவாய்ந்த அதிர்வால் கட்டிடங்கள் சில இடிந்து விழுந்ததாகவும், பல கட்டிடங்கள் சேதமடைந்துள்ளதாகவும் தகவல்கள் வெளியாகியுள்ளன.

இதையும் படிங்க: திரும்பிய திசையெல்லாம் மரண ஓலம்...கொலம்பியாவை உலுக்கிய ரிக்டர் 7.4 நிலநடுக்கம்... 100க்கும் மேற்பட்டோர் பலி...!

முதற்கட்ட தகவல்களின்படி, இந்த நிலநடுக்கத்தில் 5 பேர் உயிரிழந்ததாக தெரிவிக்கப்பட்டிருந்தது. ஆனால், தொடர்ந்து நடைபெற்று வரும் மீட்பு மற்றும் தேடுதல் பணிகளின்போது இடிபாடுகளில் இருந்து மேலும் பலரின் உடல்கள் மீட்கப்பட்டதாக கூறப்படுகிறது. இதனால் உயிரிழந்தவர்களின் எண்ணிக்கை தற்போது 38 ஆக அதிகரித்துள்ளது.

மேலும், 50-க்கும் மேற்பட்டோர் காயமடைந்துள்ளனர். அவர்களில் சிலர் அருகிலுள்ள மருத்துவமனைகளில் அனுமதிக்கப்பட்டு சிகிச்சை பெற்று வருகின்றனர். இடிபாடுகளுக்குள் மேலும் சிலர் சிக்கியிருக்கலாம் என்ற அச்சம் நிலவுவதால், பலி எண்ணிக்கை மேலும் அதிகரிக்கக்கூடும் என அஞ்சப்படுகிறது.

நிலநடுக்கம் ஏற்பட்ட பகுதிகளில் மீட்புக் குழுவினர் தொடர்ந்து தீவிர தேடுதல் பணியில் ஈடுபட்டு வருகின்றனர். இடிந்து விழுந்த கட்டிடங்களின் இடிபாடுகளை அகற்றி, உயிருடன் இருப்பவர்களை மீட்கும் பணிகள் நடைபெற்று வருகின்றன. உள்ளூர் நிர்வாகமும் அவசரகால நடவடிக்கைகளை முடுக்கிவிட்டுள்ளது.

இந்தோனேசியா நிலநடுக்கம் மற்றும் எரிமலை செயல்பாடுகள் அதிகம் ஏற்படும் புவியியல் பகுதியில் அமைந்துள்ளதால், அங்கு இதுபோன்ற இயற்கைப் பேரிடர்கள் அவ்வப்போது ஏற்படுகின்றன. தற்போது ஏற்பட்டுள்ள 7.7 ரிக்டர் நிலநடுக்கத்தின் தாக்கம் குறித்து அதிகாரிகள் தொடர்ந்து மதிப்பீடு செய்து வருகின்றனர்.

நிலநடுக்கத்தால் ஏற்பட்ட உயிரிழப்புகள் மற்றும் சேதங்கள் குறித்த முழுமையான விவரங்கள் மீட்புப் பணிகள் நிறைவடைந்த பின்னரே தெரியவரும் என எதிர்பார்க்கப்படுகிறது.

இதையும் படிங்க: அதிகாலையிலேயே அதிர்ந்த பூமி... அலறியடித்துக் கொண்டு ஓடிய மக்கள்... மகாராஷ்டிராவில் நிலவரம் என்ன?