துபாயில் உக்ரைன் டிரோன் கிடங்கு தகர்ப்பு! ஈரான் ராணுவம் அதிரடி அறிவிப்பு!

மத்திய கிழக்கில் போர் மேகங்கள் சூழ்ந்துள்ள நிலையில், ஐக்கிய அரபு அமீரகத்தின் துபாய் நகரில் அமைந்துள்ள உக்ரைன் நாட்டின் டிரோன்-எதிர்ப்பு அமைப்புகளின் கிடங்கைத் தாக்கி அழித்துள்ளதாக ஈரான் ராணுவம் இன்று அதிகாரப்பூர்வமாக அறிவித்துள்ளது. உக்ரைன் அதிபர் வோலோடிமிர் ஜெலன்ஸ்கி அவர்கள் ஐக்கிய அரபு அமீரகத்திற்குத் திடீர் பயணம் மேற்கொண்டுள்ள சூழலில், இந்தத் தாக்குதல் நடத்தப்பட்டுள்ளது சர்வதேச அளவில் பெரும் பதற்றத்தை ஏற்படுத்தியுள்ளது.

ஈரான் மற்றும் அதன் ஆதரவுப் படைகளுக்கும், அமெரிக்கா-இஸ்ரேல் கூட்டணிக்கும் இடையே வளைகுடாப் பகுதியில் கடந்த சில வாரங்களாகத் தீவிரப் போர் நடைபெற்று வருகிறது. இந்த நிலையில், துபாயில் நடத்தப்பட்ட இந்தத் தாக்குதல் போரின் வீச்சை அடுத்தக் கட்டத்திற்கு நகர்த்தியுள்ளது.

துபாயில் இருந்த உக்ரைனின் டிரோன் கிடங்கு, உண்மையில் அமெரிக்கப் படைகளின் மறைவிடமாகச்  செயல்பட்டு வந்ததாக ஈரான் குற்றம் சாட்டியுள்ளது. அங்கிருந்து ஈரான் படைகளுக்கு எதிராக உக்ரைன் மற்றும் அமெரிக்காவின் நவீன டிரோன்-எதிர்ப்புத் தொழில்நுட்பங்கள் பயன்படுத்தப்பட்டதாகக் கூறப்படுகிறது. ஈரான் தனது ஏவுகணைகள் அல்லது டிரோன்கள் மூலம் இந்தக் கிடங்கைத் துல்லியமாகத் தாக்கி அழித்துள்ளதாகத் தெரிவித்துள்ளது.

இதையும் படிங்க: துபாய் போர் பதற்றம்! பத்திரமாக சென்னை திரும்பினார் நடிகர் அஜித்!

ஹோர்முஸ் ஜலசந்தி பகுதியில் கப்பல் போக்குவரத்து முடக்கப்பட்டுள்ள நிலையில், உக்ரைன் அதிபர் ஜெலன்ஸ்கி அமீரகத்திற்கு வந்துள்ளது ராணுவ ரீதியான ஒத்துழைப்பை நாடுவதற்காக இருக்கலாம் என எதிர்பார்க்கப்பட்டது. தற்போது அவர் தங்கியுள்ள நாட்டிலேயே இந்தத் தாக்குதல் நடந்துள்ளது உக்ரைன் மற்றும் அமெரிக்காவிற்கு விடுக்கப்பட்ட நேரடி எச்சரிக்கையாகப் பார்க்கப்படுகிறது.

இந்தச் சம்பவத்தைத் தொடர்ந்து, வளைகுடா நாடுகளில் உள்ள அமெரிக்கத் தளங்கள் மற்றும் தூதரகங்களில் பாதுகாப்பு பலப்படுத்தப்பட்டுள்ளது. துபாயில் ஏற்பட்டுள்ள இந்தப் பாதிப்பு உலகளாவிய எரிசக்தி விநியோகம் மற்றும் சர்வதேச உறவுகளில் மேலும் சிக்கல்களை உருவாக்கும் என அஞ்சப்படுகிறது.

இதையும் படிங்க: துபாயில் சிக்கினாரா அஜித்? ரசிகர்கள் கவலைக்கு முற்றுப்புள்ளி வைத்த ஏகே ரேசிங் டீம்!