உச்ச தலைவரை தாக்குவது இதற்கு சமம்..!! அமெரிக்காவுக்கு ஈரான் அதிபர் பகிரங்க எச்சரிக்கை..!!

ஈரானில் கடுமையான பொருளாதார நெருக்கடி மற்றும் விலைவாசி உயர்வு காரணமாக, பொதுமக்களும் வியாபாரிகளும் ஆத்திரமடைந்து, தெஹ்ரான் உள்ளிட்ட முக்கிய நகரங்களில் கடந்த சில வாரங்களாக தொடர்ச்சியான போராட்டங்களை நடத்தி வருகின்றனர். இந்த போராட்டங்களை கட்டுப்படுத்த முயன்ற காவல்துறையினருக்கும், போராட்டக்காரர்களுக்கும் இடையே கடும் மோதல்கள் ஏற்பட்டுள்ளன.

நாடு முழுவதும் பரவிய இந்த எதிர்ப்பு அலைகளில், இதுவரை சுமார் 5,000 பேர் உயிரிழந்துள்ளனர். இதில் 500 பாதுகாப்புப் படையினரும் அடங்குவர். போராட்டத்தில் ஈடுபட்ட பலரை கைது செய்த ஈரான் அரசு, அவர்களுக்கு மரண தண்டனை விதித்து வருகிறது. இந்த நடவடிக்கைகளுக்கு உலக நாடுகள் பலவும் கடும் கண்டனங்களை பதிவு செய்து வருகின்றன.

இந்த சூழலில், அமெரிக்க அதிபர் டொனால்ட் டிரம்ப் அளித்த சமீபத்திய பேட்டியில், ஈரான் விவகாரம் குறித்து கருத்து தெரிவித்தார். "ஈரானுக்கு புதிய தலைமை தேவைப்படும் காலம் வந்துவிட்டது. அவர்கள் 800-க்கும் மேற்பட்டோரின் மரண தண்டனைகளை ரத்து செய்துள்ளனர். இதை நான் மிகுந்த மரியாதையுடன் பார்க்கிறேன். இதனால், அமெரிக்காவின் தலையீட்டில் சிறிது தாமதம் ஏற்பட்டுள்ளது. இருப்பினும், போராட்டக்காரர்கள் தொடர்ந்து கொல்லப்படுவதோ அல்லது தூக்கிலிடப்படுவதோ நடந்தால், அமெரிக்கா தலையிடும் வாய்ப்பு உள்ளது," என்று அவர் கூறினார்.

இதையும் படிங்க: கிரீன்லாந்து டென்மார்க்கிற்கே சொந்தம்! அமெரிக்காவின் ஆதிக்க முயற்சிக்கு ரஷ்யா முட்டுக்கட்டை!

டிரம்பின் இந்த கருத்துக்கு பதிலளித்த ஈரான் உச்ச தலைவர் அயதுல்லா அலி கமேனி, அமெரிக்க அதிபரை "ஒரு குற்றவாளி" என்று கடுமையாக சாடியுள்ளார். மேலும், ஈரானில் ஏற்பட்ட பல ஆயிரம் உயிரிழப்புகளுக்கு, அமெரிக்கா மற்றும் இஸ்ரேலுடன் தொடர்புடைய பயங்கரவாதிகளும், கலகக்காரர்களுமே காரணம் என்று அவர் குற்றம்சாட்டினார்.

இதற்கிடையே, ஈரான் அதிபர் பெஷேஷ்கியன் தனது எக்ஸ் (முன்பு ட்விட்டர்) வலைதளப் பதிவில், இந்த விவகாரம் தொடர்பாக கடுமையான எச்சரிக்கை விடுத்துள்ளார். "எந்தவொரு அநீதியான ஆக்கிரமிப்புக்கும் ஈரானின் பதிலடி மிகக் கடுமையானதாகவும், வருந்தத்தக்க வகையிலும் இருக்கும். உச்ச தலைவர் அயதுல்லா அலி கமேனி மீதான எந்தத் தாக்குதலும், ஈரான் நாட்டுக்கு எதிரான முழுமையான போருக்கு சமமானது. ஈரானின் பொருளாதார சவால்களுக்கு அமெரிக்காவும் அதன் கூட்டாளி நாடுகளுமே முதன்மைக் காரணம். நீண்டகால விரோதப்போக்கும், மனிதாபிமானமற்ற பொருளாதாரத் தடைகளும், ஈரானிய மக்களின் துன்பங்களுக்கு முக்கியக் காரணிகளாக உள்ளன," என்று அவர் தெரிவித்துள்ளார்.

இந்த போராட்டங்கள் ஈரானின் உள்நாட்டு அரசியலை பெரிதும் பாதித்துள்ளன. பொருளாதாரத் தடைகள் மற்றும் உலக அரங்கில் அதிகரிக்கும் பதற்றம் காரணமாக, ஈரான் அரசு போராட்டங்களை கடுமையாக அடக்க முயல்கிறது. அதேநேரம், சர்வதேச சமூகம் இந்த விவகாரத்தில் கவனம் செலுத்தி வருகிறது.

அமெரிக்காவின் சாத்தியமான தலையீடு, மத்திய கிழக்கு பிராந்தியத்தில் புதிய பதற்றங்களை உருவாக்கலாம் என அச்சம் எழுந்துள்ளது. போராட்டக்காரர்களின் கோரிக்கைகள் பொருளாதார சீர்திருத்தங்கள் மற்றும் அரசியல் சுதந்திரத்தை மையமாகக் கொண்டுள்ளன. இதுவரை நடந்த மோதல்களில் பலர் காயமடைந்துள்ளனர், மேலும் போராட்டங்கள் தொடரும் என எதிர்பார்க்கப்படுகிறது.

இதையும் படிங்க: மெலிஸ்சா புயலால் சிதைந்த கியூபா..!! உதவிக்கரம் நீட்டும் அமெரிக்கா..!!