காங்கோவில் பயங்கரவாதிகள் தாக்குதல்.. பலி எண்ணிக்கை 89 ஆக உயர்வு..!!

மத்திய ஆப்பிரிக்க நாடான காங்கோ குடியரசில் உள்நாட்டுப்போர் பல ஆண்டுகளாக நடைபெற்று வருகிறது. அந்நாட்டில் பல்வேறு கிளர்ச்சி குழுக்களுக்கள் செயல்பட்டு வருகின்றன. அதேசமயம் காங்கோவில் பல்வேறு பயங்கரவாத குழுக்களும் செயல்பட்டு வருகின்றன. கிளர்ச்சி குழுக்கள், பயங்கரவாத குழுக்கள் அவ்வப்போது பொதுமக்கள் மீதும் பாதுகாப்புப்படையினர் மீதும் தாக்குதல் நடத்தி வருகின்றன.

இந்நிலையில் காங்கோ ஜனநாயகக் குடியரசின் கிழக்குப் பகுதியில் இஸ்லாமிய அரசு (ஐ.எஸ்.) இயக்கத்துடன் தொடர்புடைய பயங்கரவாதிகள் நடத்திய கொடூரத் தாக்குதலில் இதுவரை 89 பேர் உயிரிழந்ததாக உள்ளூர் அதிகாரிகள் தெரிவித்துள்ளனர். மேலும் பலி எண்ணிக்கை உயரக்கூடும் என அஞ்சப்படுகிறது. மேலும் இந்த தாக்குதலில் டிரக் ஒன்று தீப்பிடித்து எரிந்து நாசமானது.

இதையும் படிங்க: நைஜீரியா: ஊருக்குள் புகுந்த பயங்கரவாதிகள்.. 50க்கும் மேற்பட்டோர் படுகொலை..!!

வடக்கு கிவு மாகாணத்தில் உள்ள பெனி பிராந்தியத்தில் கடந்த செப்டம்பர் 8ம் தேதி அன்று நடந்த இந்தத் தாக்குதல், அப்பகுதியில் தொடரும் கிளர்ச்சியாளர் வன்முறையின் அப்பட்டமான எடுத்துக்காட்டாக உள்ளது. நியொடொ நகரில் இறுதிச்சடங்கு நிகழ்ச்சியில் பங்கேற்ற பொதுமக்கள் மீது பயங்கரவாதிகள் தாக்குதல் நடத்தியுள்ளனர். இந்த தாக்குதலை தொடர்ந்து அப்பகுதியில் பாதுகாப்புப்படையினர் குவிக்கப்பட்டுள்ளனர். 

இந்தத் தாக்குதல் இரவு நேரத்தில் நடைபெற்றதாகவும், ஆயுதமேந்திய பயங்கரவாதிகள் கிராமவாசிகள் மீது துப்பாக்கிச்சூடு நடத்தியதாகவும் தகவல்கள் தெரிவிக்கின்றன. இதில் பெண்கள், குழந்தைகள் உட்பட பலர் கொல்லப்பட்டனர். காங்கோவின் கிழக்குப் பகுதி நீண்ட காலமாக ஆயுதக் குழுக்களின் வன்முறைகளால் பாதிக்கப்பட்டுள்ளது. இந்தப் பகுதியில் அமைதியை மீட்டெடுக்க இராணுவ நிர்வாகம் 2021 முதல் செயல்பட்டு வந்தாலும், கிளர்ச்சியாளர்களின் தாக்குதல்கள் தொடர்கின்றன.

உள்ளூர் ஆளுநர் கார்லி நசான்சு காசிவிட இந்தத் தாக்குதலை கடுமையாகக் கண்டித்துள்ளார். பயங்கரவாதிகளுக்கு எதிராக கடுமையான நடவடிக்கைகள் எடுக்கப்படும் என அவர் உறுதியளித்தார். மேலும், பாதிக்கப்பட்ட குடும்பங்களுக்கு உதவி வழங்க அரசு முயற்சிகள் மேற்கொள்ளப்பட்டு வருவதாகவும் தெரிவிக்கப்பட்டுள்ளது. இந்தச் சம்பவம் காங்கோவில் பாதுகாப்பு நிலைமையின் நிலைகுலைவை மீண்டும் உணர்த்தியுள்ளது.

ஐ.நா. மற்றும் பிற சர்வதேச அமைப்புகள் இதற்கு கண்டனம் தெரிவித்துள்ளன. இப்பகுதியில் அமைதியை நிலைநாட்டுவதற்கு சர்வதேச ஆதரவு தேவை என உள்ளூர் தலைவர்கள் வலியுறுத்தியுள்ளனர். இதற்கு முன்னர், கடந்த ஜூலை மாதம் கொமாண்டா பகுதியில் உள்ள தேவாலயம் ஒன்றில் நடந்த தாக்குதலில் 38 பேர் கொல்லப்பட்டனர், இது இப்பகுதியில் வன்முறையின் தொடர்ச்சியை வெளிப்படுத்துகிறது.

காங்கோ அரசு மற்றும் இராணுவம் இத்தகைய தாக்குதல்களைத் தடுக்க கூடுதல் நடவடிக்கைகளை மேற்கொள்ள வேண்டிய அவசியம் உள்ளது. இந்தச் சம்பவம் உலகளவில் மனித உரிமைகள் மற்றும் பாதுகாப்பு குறித்த கவலைகளை மீண்டும் எழுப்பியுள்ளது.
 

இதையும் படிங்க: நைஜீரியா: ஊருக்குள் புகுந்த பயங்கரவாதிகள்.. 50க்கும் மேற்பட்டோர் படுகொலை..!!