அதிரடி ரெய்டு... K.N. நேரு மீது பாய்ந்த வழக்கு... லஞ்ச ஒழிப்புத்துறை நடவடிக்கை..!

முன்னாள் நகராட்சி நிர்வாகத்துறை அமைச்சர் கே.என்.நேரு உள்ளிட்ட பன்னிரண்டு பேர் மீது லஞ்ச ஒழிப்புத்துறை வழக்குப்பதிவு செய்துள்ளது. இந்த வழக்கு நகராட்சி நிர்வாகம் மற்றும் குடிநீர் வழங்கல் துறையில் நடைபெற்றதாகக் கூறப்படும் முறைகேடுகள் தொடர்பானது. திமுக ஆட்சிக் காலத்தில் அந்தத் துறையில் பல்வேறு ஒப்பந்தங்கள் வழங்கப்பட்டபோதும், பணியிட நியமனங்களிலும் பெரும் அளவில் லஞ்சம் கைமாறியதாகப் புகார்கள் எழுந்தன. அமலாக்கத்துறை முன்னதாக நடத்திய விசாரணைகளில் கிடைத்த ஆதாரங்களின் அடிப்படையில் இந்த நடவடிக்கை மேற்கொள்ளப்பட்டுள்ளது.

அமலாக்கத்துறை ஆவணங்களின்படி, நகராட்சி ஒப்பந்தங்களில் ஒப்பந்த மதிப்பில் 7.5 சதவீதம் முதல் 10 சதவீதம் வரை கமிஷன் வசூலிக்கப்பட்டதாகக் குற்றம் சாட்டப்பட்டுள்ளது. சுகாதாரத் தொழிலாளர் குடியிருப்புகள், சாலைப் பணிகள், நபார்டு திட்டங்கள் உள்ளிட்ட பல்வேறு ஒப்பந்தங்களில் இந்த முறைகேடு நடைபெற்றதாகக் கூறப்படுகிறது. மொத்தத்தில் சுமார் ஆயிரத்து இருபது கோடி ரூபாய் அளவிற்கு லஞ்சம் பெறப்பட்டதாக அந்த ஆதாரங்கள் சுட்டிக்காட்டுகின்றன. இந்தப் பணம் கட்சி நிதி என்ற பெயரில் வசூலிக்கப்பட்டு, உறவினர்கள் மற்றும் நெருங்கியவர்கள் வழியாகக் கையாளப்பட்டதாகவும் குறிப்பிடப்பட்டுள்ளது.

பணியிட நியமன விவகாரத்திலும் தனித்த புகார் உள்ளது. நகராட்சித் துறையில் இரண்டாயிரத்து ஐந்நூற்று முப்பத்தெட்டு பணியிடங்கள் நிரப்பப்பட்டபோது, பல இடங்களுக்கு இருபத்தைந்து லட்சம் முதல் முப்பத்தைந்து லட்சம் ரூபாய் வரை லஞ்சம் பெறப்பட்டதாக அமலாக்கத்துறை ஆதாரங்கள் தெரிவிக்கின்றன. தேர்வு முறைகளில் தலையீடு செய்யப்பட்டு விரும்பியவர்களுக்கு நியமனம் அளிக்கப்பட்டதாகவும் குற்றம் சாட்டப்பட்டுள்ளது. இந்தப் புகார்களின் அடிப்படையில் சென்னை உயர்நீதிமன்றம் முன்னதாக வழக்குப்பதிவு செய்ய உத்தரவிட்டிருந்தது. அதன்பிறகு லஞ்ச ஒழிப்புத்துறை கே.என்.நேரு, அவரது சகோதரர்கள் கே.என்.ரவிச்சந்திரன் மற்றும் கே.என்.மணிவண்ணன் உள்ளிட்டோர் மீது வழக்குப்பதிவு செய்தது.இந்த வழக்கைத் தொடர்ந்து லஞ்ச ஒழிப்புத்துறை அதிகாரிகள் பரவலான சோதனையைத் தொடங்கினர்.

இதையும் படிங்க: விடிந்ததுமே இப்படியா?... கே.என்.நேரு வீட்டிற்கு ஓடோடி சென்ற அன்பில் மகேஷ்... திருச்சியில் குவியும் திமுகவினர்...!

திருச்சி தில்லைநகரில் உள்ள கே.என்.நேருவின் இல்லத்தில் காலை முதலே சோதனை நடைபெற்றது. அங்கு சுமார் பத்து அதிகாரிகள் உள்ளே சென்று ஆவணங்களையும் பிற பொருட்களையும் ஆய்வு செய்தனர். அதேநேரம் சென்னை, கோவை உள்ளிட்ட பகுதிகளில் அவரது சகோதரர் ரவிச்சந்திரன் தொடர்புடைய வீடுகள், அலுவலகங்கள் மற்றும் பிற இடங்களிலும் ஒரே நேரத்தில் சோதனை நடத்தப்பட்டது. மொத்தம் பத்தொன்பது இடங்களில் இந்த நடவடிக்கை மேற்கொள்ளப்பட்டதாகத் தெரிகிறது.ரவிச்சந்திரன் தொடர்புடைய இடங்களில் சோதனை நடந்தபோது அதிகாரிகள் பணம் எண்ணும் இயந்திரத்தை எடுத்துச் சென்றனர். பெரிய அளவில் ரொக்கப் பரிவர்த்தனைகள் நடைபெற்றிருக்கலாம் என்ற சந்தேகத்தின் அடிப்படையில் இந்த ஏற்பாடு செய்யப்பட்டதாகக் கருதப்படுகிறது. சோதனையின் போது ஆவணங்கள், மின்னணு சாதனங்கள் மற்றும் பிற சான்றுப் பொருட்கள் பறிமுதல் செய்யப்பட்டன. 

இதையும் படிங்க: #BREAKING விடிந்ததுமே கே.என்.நேருவுக்கு இறங்கிய பேரிடி... ஒரே நேரத்தில் 10 இடங்களில் களமிறங்கிய லஞ்ச ஒழிப்புத்துறை...!