நள்ளிரவில் அரங்கேறிய அபாயம்... நடுக்கடலில் தத்தளித்த உயிர்கள்... மெக்சிகோ படகு விபத்தில் 11 பேர் மாயம்...!

மெக்சிகோவின் பாஜா கலிபோர்னியா கடற்கரைக்கு அருகே உள்ள பசிபிக் பெருங்கடல் பகுதியில் 27 பயணிகளுடன் சென்ற படகு ஒன்று திடீரென கடலில் மூழ்கி விபத்துக்குள்ளானது. இந்த விபத்தில் கடலில் தத்தளித்துக் கொண்டிருந்த 16 பேரை அமெரிக்க கடலோர காவல்படையினர் அதிரடியாக மீட்டுள்ளனர். மேலும், காணாமல் போன 11 பேரைத் தேடும் பணி தீவிரமாக நடைபெற்று வருகிறது. 

நள்ளிரவில் வந்த அபாய அழைப்பு:

நள்ளிரவு சுமார் 1:00 மணியளவில், தங்களது படகு கடலில் மூழ்கிக் கொண்டிருப்பதாக படகில் இருந்தவர்கள் 'மே டே' என்ற சர்வதேச அவசர அபாய சிக்னலை அனுப்பியுள்ளனர். மெக்சிகோவின் என்செனாடா (Ensenada) நகருக்கு மேற்கே சுமார் 140 மைல் தொலைவில் இந்த விபத்து நேரிட்டுள்ளது.

இதையும் படிங்க: நாட்டையே உலுக்கிய சோகம்...!! - கங்கையில் கவிழ்ந்த படகு... சிறுவர்கள் உட்பட 13 பேர் பலி... !

உயிரைக் கையில் பிடித்து தத்தளித்த பயணிகள்:

தகவல் கிடைத்த உடனே சான் டியாகோவிலிருந்து அமெரிக்க கடலோர காவல்படையினர் ஹெலிகாப்டர் மற்றும் மீட்புக் கப்பல்களுடன் சம்பவ இடத்திற்கு விரைந்தனர். மீட்புக்குழுவினர் அங்கு சென்றபோது கடலில் படகு எதுவும் கண்ணில் படவில்லை; பயணிகள் மட்டுமே கடலில் மிதக்கும் பொருட்களையும், ஒருவரையொருவர் கைகளையும் பிடித்துக்கொண்டு உயிரைக் கையில் பிடித்தபடி தத்தளித்துக் கொண்டிருந்தனர். சுமார் 90 நிமிடப் போராட்டத்திற்குப் பிறகு 16 பேர் பத்திரமாக ஹெலிகாப்டர் மூலம் மீட்கப்பட்டனர்.

சுறா கடித்ததில் ஒருவர் காயம்:

மீட்கப்பட்ட அனைவரும் மெக்சிகோ நாட்டைச் சேர்ந்தவர்கள் என்பது அந்நாட்டு தூதரகம் மூலம் உறுதி செய்யப்பட்டுள்ளது. அவர்கள் சிகிச்சைக்காக சான் டியாகோ மருத்துவமனைகளில் அனுமதிக்கப்பட்டுள்ளனர். இவர்களில் இருவரது நிலைமை கவலைக்கிடமாக உள்ளதாகவும், கடலில் தத்தளித்தபோது சுறா மீன் கடித்ததில் காயமடைந்த ஒருவருக்கு தீவிர சிகிச்சை அளிக்கப்பட்டு வருவதாகவும் அதிகாரிகள் தெரிவித்துள்ளனர்.

மனிதக் கடத்தலா? 

விபத்துக்குள்ளான பகுதி, அமெரிக்காவிற்குள் சட்டவிரோதமாக குடியேறுபவர்களை ஏற்றிச் செல்லும் மனிதக் கடத்தல்காரர்கள் பயன்படுத்தும் முக்கிய வழித்தடமாகும். இதனால், இந்த விபத்தும் அதுபோன்றதொரு கடத்தல் முயற்சியின்போது நேரிட்டதா அல்லது மீன்பிடிப் படகா என்பது குறித்து மெக்சிகோ அதிகாரிகளுடன் இணைந்து அமெரிக்க கடலோர காவல்படையினர் விரிவான விசாரணை நடத்தி வருகின்றனர்.

இதையும் படிங்க: நடுக்கடலில் மூழ்கிய அகதிகள் படகு: 15 குழந்தைகள் உட்பட 109 பேர் பலி.. 116 பேரின் நிலை மர்மம்!