மத்திய கிழக்கு போர்: உலகப் பொருளாதாரத்தில் பெரும் அதிர்வலை..!! இந்திய பாஸ்மதி அரிசி விலை வீழ்ச்சி..!!

மத்திய கிழக்கில் தற்போது நிலவும் போர் பதற்றம் உலகப் பொருளாதாரத்தில் கடுமையான அதிர்வலைகளை ஏற்படுத்தி வருகிறது. குறிப்பாக, அமெரிக்கா-இஸ்ரேல் கூட்டணியின் ஈரான் மீதான தாக்குதல்களும், ஈரானின் பதிலடியும் எண்ணெய் சந்தையை பெரிதும் பாதித்துள்ளன. ஹார்முஸ் நீரிணை வழியாக செல்லும் உலக எண்ணெய் விநியோகத்தில் சுமார் 20 சதவீதம் பாதிக்கப்பட்டுள்ளதால், பிரெண்ட் கச்சா எண்ணெய் விலை கடந்த சில நாட்களில் 10-15 சதவீதம் வரை உயர்ந்து, ஒரு பீப்பாய் $80-85 வரை சென்றுள்ளது. இது உலகளவில் எரிசக்தி விலைகளை தீவிரமாக உயர்த்தியுள்ளது.

இந்தியா போன்ற எண்ணெய் இறக்குமதியை அதிகம் சார்ந்துள்ள வளரும் நாடுகளுக்கு இது பெரும் சுமையாக அமைந்துள்ளது. பொருளாதார நிபுணர்களின் கூற்றுப்படி, எண்ணெய் விலை ஒரு டாலர் உயரும் போதெல்லாம் இந்தியாவுக்கு கூடுதலாக சுமார் 2 பில்லியன் டாலர் செலவு ஏற்படுகிறது. இதனால் அந்நியச் செலாவணி கையிருப்பு பாதிக்கப்படுவதுடன், உள்நாட்டில் பணவீக்க அழுத்தமும் அதிகரிக்கிறது.

போக்குவரத்து, உற்பத்தி உள்ளிட்ட பல துறைகளில் செலவுகள் உயர்வதால் பொதுமக்களின் வாழ்வாதாரமும் பாதிக்கப்படும் அபாயம் உள்ளது. இதன் தாக்கம் எண்ணெய் மட்டுமின்றி, இந்தியாவின் முக்கிய ஏற்றுமதிப் பொருளான பாஸ்மதி அரிசி வர்த்தகத்தையும் கடுமையாக பாதித்துள்ளது. உலகின் மிகப்பெரிய பாஸ்மதி அரிசி ஏற்றுமதியாளரான இந்தியா, தனது ஏற்றுமதியில் 70 சதவீதத்திற்கும் மேல் மத்திய கிழக்கு நாடுகளுக்கு (சவுதி அரேபியா, ஈரான், ஐக்கிய அரபு எமிரேட்ஸ் உள்ளிட்டவை) அனுப்புகிறது.

இதையும் படிங்க: 26 கட்சிகள்.. உருவான மெகா கூட்டணி..!! திமுக கூட்டணியில் தொகுதிகள் பங்கீடு உத்தேச பட்டியல் ரெடி..!!

போர் காரணமாக கப்பல் போக்குவரத்து பாதைகள் பாதுகாப்பற்றதாக மாறியுள்ளன. ஹார்முஸ் நீரிணை மூடப்பட்டதால், கப்பல்கள் தாக்குதல் அச்சத்தால் பயணிக்க மறுக்கின்றன. காப்பீட்டு பிரீமியம் மற்றும் போர் அபாயக் கட்டணங்கள் பல மடங்கு உயர்ந்துள்ளன. இதனால் சரக்கு போக்குவரத்து கட்டணம் 15-20 சதவீதத்திற்கும் மேல் அதிகரித்துள்ளது. எரிபொருள் விலை உயர்வும் இதை மேலும் தீவிரப்படுத்தியுள்ளது.

இந்திய அரிசி ஏற்றுமதியாளர்கள் கூட்டமைப்பு (AIREA) தகவலின்படி, சுமார் 4 லட்சம் டன் பாஸ்மதி அரிசி தற்போது பாதிக்கப்பட்டுள்ளது. இதில் 2 லட்சம் டன் இந்தியத் துறைமுகங்களில் தேங்கியுள்ளது; மற்றொரு 2 லட்சம் டன் நடுக்கடலில் பயணத்தின் நடுவே சிக்கியுள்ளது. புதிய ஏற்றுமதி ஒப்பந்தங்கள் முற்றிலும் நின்றுவிட்டன. இதனால் உள்நாட்டு சந்தையில் பாஸ்மதி அரிசி விலை கடந்த சில நாட்களில் 10 சதவீதம் வரை சரிந்துள்ளது. ஏற்றுமதியாளர்களின் முதலீடு முடங்கி, நிதி நெருக்கடி ஏற்பட்டுள்ளது.

துறைமுக சேமிப்புக் கட்டணங்கள், அபராதங்கள் போன்றவை கூடுதல் சுமையாக உள்ளன.இந்நிலையில், ஏற்றுமதியாளர்கள் மத்திய அரசிடம் பல்வேறு கோரிக்கைகளை வைத்துள்ளனர். துறைமுகங்களில் தேங்கிய சரக்குகளுக்கான சேமிப்புக் கட்டணங்களை தள்ளுபடி செய்ய வேண்டும். இந்த சூழலை "தவிர்க்க முடியாத சக்தி" (force majeure) என அறிவித்து அபராதங்களை தவிர்க்க வேண்டும். கொரோனா காலத்தில் வழங்கப்பட்டது போல, வங்கிகள் மூலம் கூடுதல் கடன் வசதிகள், கடன் திருப்பிச் செலுத்தும் கால அவகாசம் வழங்க வேண்டும்.

இதன்மூலம் ஏற்றுமதி ஒப்பந்தங்களை பாதுகாக்கவும், விவசாயிகளின் நலனை உறுதி செய்யவும் முடியும்.இந்த போர் பதற்றம் நீடித்தால், இந்தியாவின் எரிசக்தி பாதுகாப்பு, அந்நியச் செலாவணி இருப்பு, ஏற்றுமதி வருவாய் ஆகியவை மேலும் பாதிக்கப்படும். எனவே, மத்திய அரசு உடனடியாக தலையிட்டு, ஏற்றுமதியாளர்களுக்கு நிவாரணங்கள் அறிவிப்பது அவசியமாகிறது. இல்லையெனில், விவசாயிகள் முதல் ஏற்றுமதியாளர்கள் வரை பெரும் இழப்பை சந்திக்க நேரிடும்.

இதையும் படிங்க: போராடும் வருவாய் துறை ஊழியர்கள்.. அடக்கு முறையை ஏவும் திமுக... டிடிவி தினகரன் கண்டனம்..!!