அத்தனை அதிகாரங்களை பயன்படுத்தி நெருக்கடி கொடுத்தார் ட்ரம்ப்! அமைதி ஒப்பந்தம் குறித்து கமேனி விமர்சனம்!
போர்நிறுத்த ஒப்பந்தத்தை எட்ட அனைத்து அதிகாரங்களையும் பயன்படுத்தி அமெரிக்க அதிபர் டிரம்ப் நெருக்கடி கொடுத்ததாக ஈரான் உச்ச தலைவர் மொஜ்தபா கமேனி விமர்சித்துள்ளார்.
by
டெஹ்ரான்: ஈரான் புதிய உச்ச தலைவராக பொறுப்பேற்ற மொஜ்தபா கமேனி, அமெரிக்க அதிபர் டொனால்ட் டிரம்ப் மீது கடும் விமர்சனம் தெரிவித்துள்ளார். போர்நிறுத்த ஒப்பந்தத்தை எப்படியாவது எட்ட வேண்டும் என விரக்தியுடன் அமெரிக்கா அனைத்து வகையான அதிகார நெருக்கடிகளையும் பயன்படுத்தியதாக அவர் குற்றம் சாட்டினார்.
கடந்த பிப்ரவரி 28-ம் தேதி அமெரிக்கா - இஸ்ரேல் படைகள் இணைந்து ஈரான் மீது நடத்திய தாக்குதலில் முன்னாள் உச்ச தலைவர் அயதுல்லா அலி கமேனி கொல்லப்பட்டார். அதன் பின்னர் அவரது மகன் மொஜ்தபா கமேனி புதிய உச்ச தலைவராக பொறுப்பேற்றார். இதுவரை பொது வெளியில் தோன்றாத மொஜ்தபா, ஈரான் அரசு தொலைக்காட்சியில் வாசிக்கப்பட்ட செய்திக் குறிப்பில் தனது கருத்தை வெளிப்படுத்தியுள்ளார்.
அந்த அறிக்கையில், “இந்த ஒப்பந்தத்தை எப்படியாவது முடித்துவிட வேண்டும் என்ற விரக்தியில் டிரம்ப் அனைத்து வகையான அதிகார நெருக்கடிகளையும் பயன்படுத்தினார். அமெரிக்காவுடனான இந்த ஒப்பந்தம் குறித்து எனக்கு மாறுபட்ட கருத்துகள் உள்ளன. இருப்பினும், ஈரான் நலன் மற்றும் உரிமைகளை பாதுகாப்பதாக அதிபர் மசூத் பெசெஷ்கியான் அளித்த உறுதியான உத்தரவாதத்தின் அடிப்படையில் இந்த ஒப்பந்தத்துக்கு ஒப்புதல் அளித்தேன்” என மொஜ்தபா கமேனி தெரிவித்துள்ளார்.
இதையும் படிங்க: நீங்கள் குழப்பமடைவீர்கள்! அதிபர் ட்ரம்ப் மீண்டும் விஷமத்தனம்! அமெரிக்கா-ஈரான் அமைதி ஒப்பந்தம் கையெழுத்தாகுமா?
ஈரான் அதிபர் மசூத் பெசெஷ்கியான் தான் டெஹ்ரானில் இருந்தபடி மின்னணு முறையில் ஒப்பந்தத்தில் கையெழுத்திட்டார். உச்ச தலைவரின் ஒப்புதலுக்குப் பிறகு இந்த ஒப்பந்தம் அமலுக்கு வரும் என எதிர்பார்க்கப்படுகிறது.
ஈரான் மீதான தாக்குதலுக்குப் பிறகு ஏற்பட்ட போர் நிலைக்கு முற்றுப்புள்ளி வைக்கும் வகையில் இந்த ஒப்பந்தம் கையெழுத்தானது. ஆனால், டிரம்ப் தரப்பு வலியுறுத்திய நெருக்கடிகளால் ஒப்பந்தம் விரைவில் முடிவுக்கு வந்ததாக மொஜ்தபா கமேனியின் அறிக்கை சுட்டிக்காட்டுகிறது.
இந்த விமர்சனம் சர்வதேச அரசியல் வட்டாரத்தில் பெரும் கவனத்தை ஈர்த்துள்ளது. ஈரான் - அமெரிக்கா இடையேயான உறவுகள் எப்படி முன்னேறும் என்பதை உலக நாடுகள் உன்னிப்பாக கவனித்து வருகின்றன. மொஜ்தபா கமேனியின் முதல் பொது அறிக்கையாக இது பார்க்கப்படுவதால், ஈரான் உள்நாட்டு மற்றும் வெளியுறவு கொள்கையில் அவரது தாக்கம் எப்படி இருக்கும் என்பதும் ஆர்வத்தை ஏற்படுத்தியுள்ளது.
ஈரான் மக்கள் மத்தியில் ஒப்பந்தம் குறித்த கலவையான எதிர்வினைகள் தெரிவிக்கப்படும் நிலையில், புதிய உச்ச தலைவரின் இந்த நிலைப்பாடு முக்கியத்துவம் பெறுகிறது.
இதையும் படிங்க: நான் இல்லையினா இஸ்ரேல்னு ஒருநாடே இருந்திருக்காது! ஒபாமா செஞ்சதை நான் மாத்தினேன்! அதிபர் ட்ரம்ப் அதிரடி!
