கஞ்சா தமிழகம்... சீரழியும் சமூகம்..! மீண்டும் உங்கள் ஆட்சியா? நயினார் கண்டனம்..!

திமுக ஆட்சியில் சட்டம் ஒழுங்கு சரியில்லை என்ற குற்றச்சாட்டு தொடர்ந்து முன்வைக்கப்பட்டு வருகிறது. அதிமுக, பாஜக உள்ளிட்ட எதிர்க்கட்சிகள் சமீபத்தில் நடக்கும் பிரச்சினைகளை சுட்டிக்காட்டி திமுக ஆட்சியில் சட்டம் ஒழுங்கு சரிவரையில்லை என்றும் முதலமைச்சர் ஸ்டாலின் மீதும் குற்றம் சாட்டி வருகின்றனர்.

இந்த நிலையில், திமுக ஆட்சியில் தமிழகம் கஞ்சா மயமாக மாறி வருவதாக தமிழக பாஜக தலைவர் நயினார் நாகேந்திரன் தெரிவித்துள்ளார். திருவள்ளூர் மாவட்டம் திருத்தணியில் கல்லூரி மாணவர்கள் இருவரை கஞ்சா போதை கும்பல் ஒன்று பட்டாக் கத்தி கொண்டு கொடூரமாகத் தாக்கியிருப்பது மிகுந்த அதிர்ச்சியளிக்கிறது என்று நயினார் நாகேந்திரன் கூறினார். 

வடமாநிலத் தொழிலாளி, சேலை வியாபாரி, கல்லூரி இளைஞர்கள் எனத் தொடர்ச்சியாகப் பொதுமக்கள் அனைவரும் போதை கும்பலின் கொலைவெறித் தாக்குதலில் பலிகடாவாகி வருவது கஞ்சாவின் கைப்பிடியில் திருவள்ளூர் சிக்கியிருப்பதைத் தெள்ளத் தெளிவாகப் படம் பிடித்துக் காட்டுகிறது என்று கூறினார். அதிலும், தொடர்ந்து இது போன்ற கோர நிகழ்வுகளில் ஈடுபடுவது, போதை மருந்தின் ஆதிக்கத்தில் உள்ள இளைஞர்கள் தான் என்பதை உற்று நோக்கையில் எதிர்காலத்தைக் குறித்த அச்சம் எழுவதைத் தவிர்க்க இயலவில்லை என்று தெரிவித்தார்.

இதையும் படிங்க: ஒரு டிக்கெட் ரூ.7,500? நடுத்தர மக்கள் வயித்தெறிச்சல் சும்மா விடாது... நயினார் கண்டனம்..!

உண்மையில், திருத்தணியில் நடக்கும் போதை வன்முறைகள் ஒரு சிறு துளியே என்றும் தமிழகம் முழுவதும் டாஸ்மாக், கள்ளச்சாராயம் மற்றும் போதைப் பொருள் புழக்கத்தால் நடக்கும் வன்முறைகளும் குற்றங்களும் இதைக்காட்டிலும் வரைமுறையற்றது எனவும் தெரிவித்துள்ளார். ஃபோட்டோஷூட் திமுக ஆட்சியில் போதைக் கலாச்சாரத்தால் தமிழக இளைஞர்கள் கண் முன்னே சீரழிந்து போவதையும், சட்டம் ஒழுங்கு சிதைந்து பாதுகாப்பு பறிபோவதையும் கண்ணாரக் கண்ட தமிழக மக்கள் திமுகவை இனி என்றும் ஆட்சி அரியணையில் அமர்த்தமாட்டார்கள் என்றும் உறுதிப்பட தெரிவித்தார்.

இதையும் படிங்க: ஆட்டு மந்தையில் ஓநாய்..! பெண்கள் பாதுகாப்பை சூறையாடும் திமுக... நயினார் தாக்கு..!