அமெரிக்க மேயர் தேர்தலில் முன்னிலை பெற்ற தமிழ்ப்பெண் நித்யா ராமன்! கரேன் பாஸுக்கு கடும் போட்டி!

வாஷிங்டன்: அமெரிக்காவின் லாஸ் ஏஞ்சல்ஸ் நகர மேயர் தேர்தலில், கேரளாவில் பிறந்த தமிழ்ப் பின்னணியைக் கொண்ட நித்யா ராமன் முன்னிலை பெற்றுள்ளார். தற்போதைய மேயர் கரேன் பாஸை விட அதிக ஆதரவைப் பெற்றுள்ளதாக வெளியாகியுள்ள கருத்துக்கணிப்பு, அமெரிக்க அரசியல் வட்டாரத்தில் கவனத்தை ஈர்த்துள்ளது. இருப்பினும், தேர்தல் முடிவுகள் இன்னும் வெளியாகவில்லை.

கேரளாவில் தமிழ் குடும்பத்தில் பிறந்த நித்யா ராமன், தனது ஆறு வயதில் அமெரிக்காவுக்குச் சென்றார். கல்வியில் சிறந்து விளங்கிய அவர், அமெரிக்காவின் புகழ்பெற்ற ஹார்வர்ட் பல்கலைக்கழகம் மற்றும் மாசசூசெட்ஸ் தொழில்நுட்பக் கழகத்தில் (எம்.ஐ.டி.) படித்துள்ளார். நகர்ப்புற வளர்ச்சி மற்றும் திட்டமிடல் தொடர்பான பணிகளில் கவனம் செலுத்திய அவர், பின்னர் அரசியலில் நுழைந்தார்.

2020ஆம் ஆண்டு லாஸ் ஏஞ்சல்ஸ் நகர கவுன்சில் தேர்தலில் போட்டியிட்டு வெற்றி பெற்ற நித்யா ராமன், 2024ஆம் ஆண்டிலும் மீண்டும் கவுன்சிலராகத் தேர்ந்தெடுக்கப்பட்டார். நகரின் உள்ளாட்சிப் பிரச்னைகள், வீடற்ற மக்களின் நிலை மற்றும் பொதுமக்களின் வாழ்க்கைத் தரத்தை மேம்படுத்துவது உள்ளிட்ட விவகாரங்களில் அவர் கவனம் செலுத்தி வந்துள்ளார்.

இதையும் படிங்க: மலேசிய நாடாளுமன்றத்தில் திருக்குறள் முழக்கம்! இணையத்தில் கவனம் ஈர்க்கும் பிரதமர் அன்வர் இப்ராஹிமின் பேச்சு!

இந்நிலையில், லாஸ் ஏஞ்சல்ஸ் நகர மேயர் பதவிக்கான போட்டியில் அவர் தற்போதைய மேயர் கரேன் பாஸை எதிர்கொள்கிறார். செப்டம்பர் 15 முதல் 20ஆம் தேதி வரை நடத்தப்பட்ட கலிபோர்னியா பல்கலைக்கழகத்தின் பெர்க்லி அரசு ஆய்வு நிறுவனம் மற்றும் லாஸ் ஏஞ்சல்ஸ் டைம்ஸ் இணைந்து நடத்திய கருத்துக்கணிப்பில், நித்யா ராமனுக்கு 39 சதவீத ஆதரவு கிடைத்துள்ளது.

கரேன் பாஸுக்கு 28 சதவீதம் பேர் ஆதரவு தெரிவித்துள்ளனர். இதனால், ராமன் 11 சதவீதப் புள்ளிகள் முன்னிலையில் இருப்பதாகக் கணக்கிடப்பட்டுள்ளது. இந்த ஆய்வில் 2,150 வாக்காளர்கள் பங்கேற்றனர். இருப்பினும், 33 சதவீத வாக்காளர்கள் யாருக்கு வாக்களிப்பது என்பதை இன்னும் முடிவு செய்யவில்லை. (ஆதாரம்: CBS Los Angeles)

லாஸ் ஏஞ்சல்ஸ் நகரில் வீடற்றவர்களின் எண்ணிக்கை அதிகரிப்பது முக்கியப் பிரச்னையாக உள்ளது. இதைச் சுட்டிக்காட்டிய நித்யா ராமன், மக்கள் மலிவு விலையில் வாழக்கூடிய வகையில் நகரத்தை மேம்படுத்துவதும், அனைவருக்கும் வாய்ப்புகளை உருவாக்குவதும் தனது நோக்கம் எனத் தெரிவித்துள்ளார்.

கருத்துக்கணிப்பில் முன்னிலை பெற்றிருந்தாலும், மூன்றில் ஒரு பங்குக்கும் அதிகமான வாக்காளர்கள் இன்னும் முடிவெடுக்காததால் போட்டி தொடர்கிறது. நவம்பர் 3ஆம் தேதி நடைபெறவுள்ள தேர்தலில் வாக்காளர்களின் இறுதி முடிவு என்னவாக இருக்கும் என்பது எதிர்பார்ப்பை ஏற்படுத்தியுள்ளது.

இதையும் படிங்க: ஹார்முஸ் ஜலசந்தியில் கப்பல்களுக்கு கட்டணம் வசூலிக்க எதிர்ப்பு?! ஈரானுக்கு எதிராக களமிறங்கிய 60 நாடுகள்!