மேற்காசிய போர் பதற்றம்! அதிகரிக்கும் எரிபொருள் தட்டுப்பாடு! முதல் நாடாக அவசரநிலையை பிரகடனப்படுத்தியது பிலிப்பைன்ஸ்!

மணிலா: மேற்காசியாவில் அமெரிக்கா-இஸ்ரேல்-ஈரான் இடையே நடைபெற்று வரும் போர் உலகம் முழுவதும் எரிபொருள் நெருக்கடியை ஏற்படுத்தியுள்ள நிலையில், பிலிப்பைன்ஸ் நாடு அவசரநிலை பிரகடனப்படுத்தியுள்ளது. போர் தொடங்கிய பிறகு இத்தகைய அவசரநிலையை அறிவித்த முதல் நாடு பிலிப்பைன்ஸ் ஆகும்.

கிட்டத்தட்ட ஒரு மாதமாக நீடிக்கும் இந்தப் போரில் ஈரான் ஹார்முஸ் ஜலசந்தியை மூடியதால், உலக அளவில் கச்சா எண்ணெய் விநியோகம் பெரிதும் பாதிக்கப்பட்டுள்ளது. இதனால் சர்வதேச சந்தையில் எண்ணெய் விலை கடுமையாக உயர்ந்துள்ளது.

பிலிப்பைன்ஸ் தனது எண்ணெய் தேவையில் 98 சதவீதத்தை வளைகுடா நாடுகளில் இருந்தே இறக்குமதி செய்கிறது. போர் காரணமாக ஏற்பட்ட தட்டுப்பாட்டால் அங்கு பெட்ரோல் மற்றும் டீசல் விலை இரண்டு மடங்குக்கும் மேல் உயர்ந்துவிட்டது.

இதையும் படிங்க: பேச்சுவார்த்தையை விரும்பும் ஈரான்? படைகளை அனுப்பும் US?! மேற்காசியாவில் தொடரும் போர் பதற்றம்!!!

இந்த நெருக்கடியை சமாளிக்க, பிலிப்பைன்ஸ் அதிபர் பெட்டினாண்ட் மார்கோஸ் ஜூனியர் அவசரநிலை உத்தரவில் கையெழுத்திட்டுள்ளார். இந்த உத்தரவின்படி, அரசுக்கு எரிபொருளை நேரடியாக வெளிநாடுகளில் இருந்து கொள்முதல் செய்ய அதிகாரம் வழங்கப்பட்டுள்ளது.

எரிபொருள், உணவு, மருந்து உள்ளிட்ட அத்தியாவசியப் பொருட்களின் விநியோகத்தை கண்காணிக்க சிறப்புக் குழு ஒன்றும் அமைக்கப்பட்டுள்ளது. இந்த அவசரநிலை ஒரு ஆண்டு காலம் அமலில் இருக்கும்.

இந்த நடவடிக்கைக்கு பிலிப்பைன்ஸின் முக்கிய தொழிலாளர் அமைப்பான கிலுசாங் மாயோ யூனோ கடும் விமர்சனம் தெரிவித்துள்ளது. “எண்ணெய் நெருக்கடியை சமாளிப்பதில் அரசு முழுமையாக தோல்வியடைந்துவிட்டது” என்று அவர்கள் குற்றம் சாட்டியுள்ளனர்.

ஹார்முஸ் ஜலசந்தியின் மூடல் உலகப் பொருளாதாரத்தை பெரிதும் பாதித்துள்ளது. இந்தியா உள்ளிட்ட பல நாடுகள் ஈரானுக்கு அழுத்தம் கொடுத்து ஜலசந்தியை உடனடியாக திறக்க வலியுறுத்தி வருகின்றன. ஆனால் இதுவரை ஈரான் தரப்பில் உறுதியான பதில் வரவில்லை.

பிலிப்பைன்ஸில் இப்போது பெட்ரோல் நிலையங்களில் நீண்ட வரிசைகள் காணப்படுகின்றன. பல இடங்களில் எரிபொருள் விலை உயர்வால் போக்குவரத்து பாதிக்கப்பட்டுள்ளது. விவசாயம், தொழில் உள்ளிட்ட துறைகளும் இந்த நெருக்கடியால் கடும் சிரமத்துக்கு உள்ளாகியுள்ளன.

உலக நாடுகள் பலவும் இந்த எரிபொருள் தட்டுப்பாட்டால் அச்சத்தில் உள்ளன. பிலிப்பைன்ஸ் அவசரநிலை அறிவித்திருப்பது, மேற்காசியப் போர் உலக அளவில் ஏற்படுத்தியுள்ள தீவிர பாதிப்பை தெளிவாகக் காட்டுகிறது. இந்தியாவும் தனது எண்ணெய் இறக்குமதியை பாதுகாக்க பல்வேறு முயற்சிகளில் ஈடுபட்டு வருகிறது.

போர் விரைவில் முடிவுக்கு வந்து, ஹார்முஸ் ஜலசந்தி மீண்டும் திறக்கப்பட்டால் மட்டுமே உலகம் முழுவதும் எரிபொருள் நெருக்கடி தீரும் என எதிர்பார்க்கப்படுகிறது.

இதையும் படிங்க: 3 வார போரில் அமெரிக்கா வெற்றி! ட்ரம்ப் மார்தட்டல்!! அணு ஆயுதம் வைத்திருக்க போவதில்லை என ஈரான் ஒப்புதல்?!!