பொருளாதார ஒத்துழைப்பில் வலுவான பாதை.. புதிய உச்சம் தொட்ட இந்தியா-ஆஸ்திரேலிய உறவு..!!

இந்திய பிரதமர் நரேந்திர மோடி மற்றும் ஆஸ்திரேலிய பிரதமர் அந்தோனி அல்பனீஸ் இணைந்து எடுத்துக்கொண்ட செல்ஃபி, சமூக ஊடகங்களில் பெரும் வரவேற்பைப் பெற்றுள்ளது. இந்தியா-ஆஸ்திரேலியா தலைமை நிர்வாக அதிகாரிகள் (CEO) மன்றம் மற்றும் பொருளாதார சாலைவரைபட வர்த்தக வரவேற்பு நிகழ்ச்சியின் போது எடுக்கப்பட்ட இந்தப் புகைப்படம், இரு நாடுகளுக்கும் இடையிலான நெருக்கமான நட்பு மற்றும் வளர்ந்து வரும் மூலோபாய கூட்டாண்மையை அழகாகப் பிரதிபலிக்கிறது.

நிகழ்ச்சியில் உரையாற்றிய பிரதமர் மோடி, தற்போதைய உலகப் பொருளாதார சூழல் நிச்சயமற்ற தன்மை, விநியோகச் சங்கிலி இடர்கள் மற்றும் எரிசக்தி நெருக்கடிகளால் சவால்களை எதிர்கொண்டுள்ள நிலையில், இந்தியாவும் ஆஸ்திரேலியாவும் “இயற்கையான மற்றும் நம்பகமான கூட்டாளிகள்” என்று வலியுறுத்தினார். இரு நாடுகளும் பரஸ்பர நலன்களை முன்னிட்டு பல்வேறு துறைகளில் ஒத்துழைப்பை ஆழப்படுத்த வேண்டும் என அவர் அழைப்பு விடுத்தார்.

சுத்தமான எரிசக்தி, உள்கட்டமைப்பு மேம்பாடு, செயற்கை நுண்ணறிவு (AI), கல்வி மற்றும் தொழில்நுட்பப் பரிமாற்றம் உள்ளிட்ட முக்கிய துறைகளில் இரு நாடுகளும் இணைந்து செயல்பட வேண்டும் என்று மோடி தெரிவித்தார். 2022-ல் விரைவாக முடிவடைந்த இந்தியா-ஆஸ்திரேலியா பொருளாதார ஒத்துழைப்பு மற்றும் வர்த்தக ஒப்பந்தம் (ECTA) இரு தரப்பு வர்த்தகத்தை கணிசமாக உயர்த்தியுள்ளது. இந்த ஒப்பந்தத்துக்குப் பிறகு இந்தியாவின் ஆஸ்திரேலியாவுக்கு ஏற்றுமதி இரட்டிப்பாக அதிகரித்துள்ளதாக அவர் சுட்டிக்காட்டினார். தற்போது விரிவான பொருளாதார ஒத்துழைப்பு ஒப்பந்தம் (CECA) நோக்கி பேச்சுவார்த்தைகள் முன்னேறி வருவதும் குறிப்பிடத்தக்கது.

இதையும் படிங்க: ராமாயணம், மகாபாரத பாரம்பரியத்தில் வேரூன்றிய நட்பு! இந்தோனேசிய பார்லிமெண்டில் பிரதமர் மோடி பெருமிதம்!

பசுமை ஹைட்ரஜன், சூரிய மின்சக்தி, காற்றாலை மற்றும் நீர்மின் திட்டங்கள் உள்ளிட்ட புதுப்பிக்கத்தக்க எரிசக்தித் துறையில் இந்தியா வேகமான முன்னேற்றம் கண்டு வருகிறது. 2030-க்குள் 500 ஜிகாவாட் புதுப்பிக்கத்தக்க மின்சார உற்பத்தித் திறனை எட்டவும், 2070-க்குள் நெட்-சீரோ உமிழ்வு இலக்கை அடையவும் இந்தியா உறுதிபூண்டுள்ளது. அணுசக்தித் துறையில் தனியார் முதலீட்டை ஊக்குவிக்கும் வகையில் புதிய கொள்கைகள் அறிமுகப்படுத்தப்பட்டுள்ளன. 2047-க்குள் 100 ஜிகாவாட் அணுமின் உற்பத்தியை இலக்காகக் கொண்டுள்ள இந்தியாவுக்கு, ஆஸ்திரேலியாவின் யுரேனியம் வளங்கள் மிகவும் உதவியாக இருக்கும் என மோடி நம்பிக்கை தெரிவித்தார்.

உள்கட்டமைப்புத் துறையில் பெரும் வாய்ப்புகள் இருப்பதாகவும் அவர் குறிப்பிட்டார். தினசரி சுமார் 34 கிலோமீட்டர் தேசிய நெடுஞ்சாலைகள் மற்றும் 8 கிலோமீட்டருக்கும் மேற்பட்ட ரயில்வே பாதைகள் அமைக்கப்படும் இந்தியாவில், துறைமுகங்கள், விமான நிலையங்கள், நகர்ப்புற மேம்பாடு உள்ளிட்ட திட்டங்களுக்கு ஆஸ்திரேலிய முதலீட்டாளர்கள் பங்களிக்கலாம். செயற்கை நுண்ணறிவு, குவாண்டம் கம்ப்யூட்டிங், செமிகண்டக்டர் மற்றும் டிஜிட்டல் உள்கட்டமைப்பு ஆகிய எதிர்காலத் தொழில்நுட்பங்களில் இரு நாடுகளும் இணைந்து உலகளாவிய தீர்வுகளை உருவாக்க முடியும் என்றார். இதற்காக இந்திய அரசு பல பில்லியன் டாலர் நிதியை ஒதுக்கியுள்ளது.

ஆஸ்திரேலிய ஓய்வூதிய நிதிகளின் 4 டிரில்லியன் டாலர் சொத்துகள் இந்தியாவின் நிலையான மற்றும் பாதுகாப்பான முதலீட்டுச் சூழலில் நம்பிக்கையுடன் ஈடுபடலாம் என்று மோடி அழைப்பு விடுத்தார். கல்வித் துறையில் டீக்கின் மற்றும் வொல்லொங்கோங் பல்கலைக்கழகங்கள் குஜராத்தின் GIFT சிட்டியில் வளாகங்கள் தொடங்கியிருப்பது முக்கிய மைல்கல்லாகும். மாணவர் பரிமாற்றத்தை திறமையாளர் கூட்டாண்மையாக மாற்ற வேண்டும் என அவர் வலியுறுத்தினார்.

உரையின் இறுதியில், இரு நாடுகளின் உறவு தலைநகரங்களுக்கு அப்பால் மாநிலங்கள், நகரங்கள், பல்கலைக்கழகங்கள் மற்றும் தொழில் துறைகளுக்கு விரிவடைய வேண்டும் என்று பிரதமர் மோடி அழைப்பு விடுத்தார். இந்தியா-ஆஸ்திரேலியா உறவுகள் இனி “மாநிலத்துக்கு மாநிலம், துறைக்குத் துறை” என்ற அடிப்படையில் புதிய உயரங்களைத் தொடும் என எதிர்பார்க்கப்படுகிறது.

இதையும் படிங்க: 70 லட்சம் ஏழைகளை வறுமைக்கு தள்ளாதீங்க! பிரதமர் மோடிக்கு முதலமைச்சர் விஜய் கடிதம்!