விருத்தாசலமா? விருகம்பாக்கமா? குழம்பி தவிக்கும் பிரேமலதா? தேமுதிக சார்பில் போட்டி எங்கே?

தமிழக சட்டசபை தேர்தல் 2026-இல் தே.மு.தி.க. கூட்டணியில் இடம் பெற்றுள்ள நிலையில், பொதுச்செயலர் பிரேமலதா விஜயகாந்த் தொகுதி தேர்வில் குழப்பத்தில் உள்ளார். விருகம்பாக்கம் அல்லது விருத்தாசலம் – எந்த தொகுதியில் போட்டியிடுவது என்ற முடிவை இன்னும் எடுக்க முடியாமல் தவித்து வருகிறார்.

தி.மு.க. கூட்டணியில் இரட்டை இலக்க தொகுதிகளை தே.மு.தி.க. எதிர்பார்க்கிறது. குறிப்பாக விருகம்பாக்கம் தொகுதியை வலியுறுத்தி கேட்டு வருகிறது. மறைந்த விஜயகாந்த் வீடு சாலிகிராமத்தில் உள்ள இத்தொகுதியில் திரைப்பட ஊழியர்கள் அதிகம் வசிக்கின்றனர். 

அவர்களின் ஓட்டுகள் தே.மு.தி.க.வுக்கு உறுதுணையாக இருக்கும் என கருதப்படுகிறது. 2011-இல் அதிமுக கூட்டணியில் தே.மு.தி.க. சார்பில் பார்த்தசாரதி வெற்றி பெற்ற தொகுதி இது. எனவே மீண்டும் அத்தொகுதியை தர வேண்டும் என தே.மு.தி.க. வலியுறுத்துகிறது.

இதையும் படிங்க: கோவில்பட்டி தொகுதிக்கு குறி! தனிச்சின்னத்தில் போட்டி! சட்டசபையை எதிர்ந்நோக்கி காத்திருக்கும் வைகோ!

ஆனால் தி.மு.க. தரப்பில், விருகம்பாக்கத்தில் அதிமுக வேட்பாளராக களமிறங்க உள்ள முன்னாள் கவர்னர் வி.என். ரவியை எதிர்த்து பார்த்தசாரதி போட்டியிட்டால் வெற்றி சிரமம் என கருதுகிறது. பிரேமலதா அல்லது அவரது மகன் விஜய பிரபாகரன் இருவரில் ஒருவர் போட்டியிட்டால் மட்டுமே வெற்றி உறுதி என்பதால், தி.மு.க. தலைமை அவர்களில் ஒருவரை விருகம்பாக்கத்தில் நிறுத்த விரும்புகிறது.

ஆனால் பிரேமலதா விருத்தாசலம் தொகுதியில்தான் போட்டியிட விரும்புகிறார். விஜயகாந்த் கட்சி தொடங்கிய முதல் தேர்தலில் வெற்றி பெற்ற தொகுதி இது. தனக்கும் வெற்றி கிடைக்கும் என அவர் நம்புகிறார். தற்போது அத்தொகுதி காங்கிரஸ் வசம் உள்ளது. 

இதற்கிடையே அதிமுக கூட்டணியில் பாமக எம்எல்ஏ சிவக்குமார் விருத்தாசலத்தில் போட்டியிட விரும்புவதாகவும், முன்னாள் அமைச்சர் சி.வி. சண்முகம் மயிலம் தொகுதிக்கு மாறுவதாகவும் தகவல்கள் வெளியாகியுள்ளன. பாமக போட்டியிட்டால் விருத்தாசலத்தில் சுலபமாக வெற்றி பெறலாம் என பிரேமலதா கருதுவதால், அத்தொகுதியை பிடிவாதமாக கேட்டு வருகிறார்.

மொத்தத்தில் விருகம்பாக்கமா, விருத்தாசலமா என்ற குழப்பத்தில் பிரேமலதா இருப்பதாக அவரது கட்சியினர் தெரிவிக்கின்றனர். தொகுதி இறுதி முடிவு எப்போது வெளியாகும் என அரசியல் வட்டாரங்கள் ஆவலுடன் எதிர்பார்த்து வருகின்றன. தே.மு.தி.க.வின் இந்த தொகுதி கோரிக்கை தி.மு.க. கூட்டணி பேச்சுவார்த்தையில் முக்கிய சிக்கலாக எழுந்துள்ளது.
 

இதையும் படிங்க: வேட்பாளர் தேர்வில் களம் இறங்கும் ராகுல்காந்தி! 28 சீட்டு யாருக்கு? கலக்கத்தில் காங்கிரசார்!