24 மணி நேரம்தான் டைம்.!! ஈரான் தாக்குதல் எதிரொலி! தூதகரக அதிகாரிகள் வெளியேற சவுதி உத்தரவு!

ஈரான் தொடர்ந்து நடத்தி வரும் தாக்குதல்களுக்கு கடும் எதிர்ப்பு தெரிவித்துள்ள சவுதி அரேபியா, ஈரான் தூதரக ஊழியர்கள் 5 பேரை விரும்பத்தகாத நபர்களாக (Persona Non Grata) அறிவித்து, 24 மணி நேரத்துக்குள் நாட்டை விட்டு வெளியேற உத்தரவிட்டுள்ளது. இந்த நடவடிக்கை மத்திய கிழக்கில் பதற்றத்தை மேலும் அதிகரித்துள்ளது.

சவுதி அரேபியாவின் வெளியுறவு அமைச்சகம் வெளியிட்ட அறிக்கையில், “ஈரானின் தொடர்ச்சியான தாக்குதல்கள் சர்வதேச சட்டத்தையும், ஐக்கிய நாடுகள் பாதுகாப்பு சபையின் தீர்மானங்களையும் அப்பட்டமாக மீறுவதாகும். இஸ்லாமிய நம்பிக்கையின் அடிப்படைக் கொள்கைகளுக்கும் எதிரானவை” என்று கண்டனம் தெரிவித்துள்ளது.

வெளியுறவு அமைச்சரும் இளவரசருமான பைசல் பின் பர்ஹான் அல் சவுத், ஈரான் வளைகுடா நாடுகள் மீது தாக்குதலை நிறுத்தாவிட்டால் ராணுவ நடவடிக்கை எடுக்க வேண்டிய நிலை ஏற்படும் என ஏற்கனவே எச்சரித்திருந்தார்.

இதையும் படிங்க: ஈரானுக்கு எதிரான போரில் இலக்கை அடைய போறோம்! ஹார்முஸ் ஜலசந்தியை பாதுகாக்க அதிபர் ட்ரம்ப் அழைப்பு!

ஆனால் ஈரான் தனது தாக்குதல்களைத் தொடர்ந்து வருவதால் சவுதி அரேபியா இந்த கடுமையான நடவடிக்கையை எடுத்துள்ளது.

ராணுவத் தூதர் உட்பட 5 ஈரானிய தூதரக ஊழியர்களுக்கு 24 மணி நேர அவகாசம் அளிக்கப்பட்டுள்ளது. சவுதி அரேபியா தனது இறையாண்மை, பாதுகாப்பு மற்றும் தேசிய நலன்களைப் பாதுகாக்க அனைத்து நடவடிக்கைகளையும் எடுக்கும் என்றும், தாக்குதல்கள் தொடர்ந்தால் கடுமையான விளைவுகள் ஏற்படும் என்றும் எச்சரிக்கை விடுத்துள்ளது.

இந்த நடவடிக்கை ஈரான்-சவுதி உறவில் பெரும் விரிசலை ஏற்படுத்தியுள்ளது. ஏற்கனவே அமெரிக்கா-இஸ்ரேல்-ஈரான் இடையிலான போர் நான்காவது வாரத்தை எட்டியுள்ள நிலையில், சவுதி அரேபியாவின் இந்த அதிரடி முடிவு வளைகுடா பிராந்தியத்தை மேலும் சிக்கலான நிலைக்குத் தள்ளியுள்ளது.

ஈரானின் செயல்பாடுகள் தூதரக உறவுகளை மட்டுமல்ல, எதிர்கால உறவுகளையும் பாதிக்கும் என்று சவுதி அரேபியா தெரிவித்துள்ளது. மத்திய கிழக்கு அரசியல் இப்போது மிகவும் பதற்றமான கட்டத்தை எட்டியுள்ளது.

இதையும் படிங்க: அமெரிக்க கப்பல் மீது தாக்குதல்!! இந்தியர் மரணம்! ஈராக் கடற்பரப்பில் ஈரான் கோர தாண்டவம்!