‘குழந்தை பெத்துக்கோங்க.. ரூ.53 லட்சம் வாங்கிக்கோங்க!’ சிங்கப்பூரின் வித்தியாசமான திட்டம் ஏன்?

சிங்கப்பூர் போன்ற வளர்ந்த நாடுகளில் மக்கள் தொகை சரிவு ஒரு பெரும் சவாலாக மாறி வருகிறது. அண்மையில் அங்கு பதிவான கருத்தரிப்பு விகிதம் வரலாற்றில் இல்லாத அளவுக்கு 0.87 ஆக சரிந்துள்ளது. இது ஒரு பெண்ணுக்கு சராசரியாக ஒரு குழந்தை கூட பிறக்காத நிலையைக் குறிக்கிறது. மனிதவளப் பற்றாக்குறை, முதியோர் எண்ணிக்கை அதிகரிப்பு போன்ற நீண்டகால பிரச்சினைகளை எதிர்கொள்ளும் இந்த சூழலில், பிரதமர் லாரன்ஸ் வாங் தேசிய தின உரையில் ஒரு முக்கிய அறிவிப்பை வெளியிட்டார்.

புதிய “எஸ்ஜி சைல்டு சப்போர்ட் பேக்கேஜ்” திட்டத்தின் கீழ், சிங்கப்பூர் குடிமகன் ஒவ்வொரு குழந்தைக்கும் பிறப்பிலிருந்து 17 வயது வரை சுமார் 70,000 சிங்கப்பூர் டாலர் (இந்திய ரூபாயில் ஏறக்குறைய 53 லட்சம்) நேரடி நிதி உதவி கிடைக்கும். இதில் பிறந்தவுடன் 10,000 டாலர் (சுமார் 7.5 லட்சம் ரூபாய்) பேபி கிஃப்ட் இரு தவணைகளாக வழங்கப்படும். 

அதன்பிறகு ஒவ்வொரு ஆண்டும் 2,000 டாலர் (சுமார் 1.5 லட்சம் ரூபாய்) என 16 ஆண்டுகளாக குழந்தை கிரெடிட்கள் பெற்றோர் கணக்கில் செலுத்தப்படும். இதனுடன் குழந்தை மேம்பாட்டுக் கணக்கு மானியம், உயர்கல்விக்கான கூடுதல் தொகை மற்றும் ஏற்கனவே உள்ள மெடிசேவ், எடுசேவ் போன்ற உதவிகளும் சேர்ந்து மொத்தம் கிட்டத்தட்ட 70,000 டாலர் ஆகிறது. முன்பு குழந்தைகளின் வரிசைப்படி வேறுபட்ட சலுகைகள் இருந்தன; இப்போது அனைத்து குழந்தைகளுக்கும் சமமான ஆதரவு உறுதி செய்யப்பட்டுள்ளது.

இதையும் படிங்க: உயிர்ம வேளாண்மையின் ஹீரோக்கள்! முதல்வர் கையால் நம்மாழ்வார் விருது..! இயற்கை விவசாயிகளுக்கு உயரிய அங்கீகாரம்..!

நிதி உதவியுடன் மட்டும் நிற்கவில்லை. குழந்தை பராமரிப்பு விடுப்பு அதிகரிக்கப்பட்டுள்ளது – ஒன்று முதல் மூன்று அல்லது அதற்கு மேற்பட்ட குழந்தைகள் இருந்தால் பெற்றோருக்கு 8 முதல் 12 நாட்கள் வரை கூடுதல் விடுப்பு. அரசு ஆதரவுடைய முழுநாள் பராமரிப்பு மையங்களில் மாதாந்திர கட்டணம் 2030-க்குள் 150 டாலராக குறைக்கப்படும். வீட்டுவசதிக்கும் சிறப்பு சலுகைகள்: பிடிஓ அடுக்குமாடி குடியிருப்புகளுக்கான வருமான வரம்பு உயர்த்தப்பட்டுள்ளது.

1970களில் “இரண்டு குழந்தைகளே போதும்” என்று குடும்பக் கட்டுப்பாட்டை வலியுறுத்திய அதே நாடு, இன்று குழந்தை பெற்று வளர்ப்பதற்கு முழு ஆதரவு தருவது வரலாற்றுத் திருப்பம். வாழ்க்கைச் செலவு, வேலை அழுத்தம் போன்ற காரணங்களால் குழந்தை பெறத் தயங்கும் இளைஞர்களுக்கு அரசு “நாங்கள் உங்களுடன் இருக்கிறோம்” என்று உறுதியளித்துள்ளது. 

இந்த நடவடிக்கைகள் பிறப்பு விகிதத்தை எவ்வளவு உயர்த்தும் என்பது காலப்போக்கில் தெரியும். ஆனால், எதிர்காலத்தைப் பாதுகாக்கும் முயற்சியாக உலகம் இதை உன்னிப்பாகக் கவனித்து வருகிறது.
 

இதையும் படிங்க: கான்பூரை உலுக்கிய விமான விபத்து! பயிற்சி விமானம் வயலில் விழுந்ததில் 2 பைலட்டுகள் பலி!