போரை நிறுத்த இதுவே சரியான நேரம்!! அமெரிக்கா, இஸ்ரேலுக்கு ஐ.நா கோரிக்கை!

மத்திய கிழக்கில் அமெரிக்கா மற்றும் இஸ்ரேல் இணைந்து ஈரான் மீது கடந்த பிப்ரவரி 28 முதல் நடத்தி வரும் தாக்குதல்கள் கட்டுப்பாட்டை மீறி செல்வதாக ஐக்கிய நாடுகள் சபையின் பொதுச்செயலாளர் ஆன்டோனியோ குட்டரெஸ் தெரிவித்துள்ளார். போரை உடனடியாக நிறுத்துவதற்கு இதுவே சரியான நேரம் என்று அவர் வலியுறுத்தியுள்ளார்.

பெல்ஜியம் தலைநகர் பிரஸ்ஸல்ஸில் ஐரோப்பிய யூனியன் நாடுகளின் பிரதிநிதிகள் கூடிய ஆலோசனைக் கூட்டத்துக்குப் பிறகு நிருபர்களிடம் பேசிய குட்டரெஸ், “இந்தப் போர் அப்பாவி மக்களுக்கு பெரும் துயரத்தை ஏற்படுத்தியுள்ளது. போரின் விளைவுகள் இப்போது போர்க்களத்தைத் தாண்டி உலகம் முழுவதும் பரவி வருகின்றன. எரிசக்தி விலை உயர்வு, பொருளாதார நெருக்கடி உள்ளிட்ட பல்வேறு பாதிப்புகள் ஏற்பட்டுள்ளன. குறிப்பாக வளர்ச்சியடையாத நாடுகள் மிக மோசமான நிலைக்குத் தள்ளப்படும்” என்று கவலை தெரிவித்தார்.

மேலும் அவர், “போரைத் தொடர்வதைவிட தூதரக ரீதியிலான பேச்சுவார்த்தை மற்றும் அமைதி முயற்சிகளுக்கு இப்போதுதான் சரியான நேரம். அமெரிக்கா மற்றும் இஸ்ரேல் இந்த உண்மையை உணர்ந்து உடனடியாக போரை நிறுத்த வேண்டும்” என்று வலியுறுத்தினார்.

இதையும் படிங்க: அமெரிக்காவின் தேசிய பயங்கரவாத தடுப்பு அதிகாரி ராஜினாமா! அதிபர் ட்ரம்புக்கு பெரும் பின்னடைவு!

கடந்த மூன்று வாரங்களாக நீடித்து வரும் இந்த மோதல் காரணமாக மேற்காசியப் பகுதியில் பதற்றம் உச்சத்தை எட்டியுள்ளது. கச்சா எண்ணெய் விலை பீப்பாய் ஒன்றுக்கு 114 டாலரைத் தொட்டுள்ள நிலையில், உலக நாடுகள் பெரும் அச்சத்தில் உள்ளன. குறிப்பாக இந்தியா உள்ளிட்ட எரிசக்தி இறக்குமதியை நம்பியுள்ள நாடுகள் கடும் பாதிப்பை எதிர்நோக்கியுள்ளன.

ஐநா பொதுச்செயலாளரின் இந்த அறிக்கை சர்வதேச அளவில் முக்கியத்துவம் பெற்றுள்ளது. போர் மேலும் நீடித்தால் உலகப் பொருளாதாரம் மிகப் பெரிய சரிவை சந்திக்கும் என்ற அச்சம் வலுத்து வருகிறது. அமைதிப் பேச்சுவார்த்தைகளை விரைவாகத் தொடங்க வேண்டும் என்ற குரல் உலக அரங்கில் வலுப்பெற்று வருகிறது.

இந்தியா உள்ளிட்ட பல நாடுகள் ஏற்கெனவே அமைதிக்கு ஆதரவு தெரிவித்து வரும் நிலையில், ஐநா தலைவரின் எச்சரிக்கை மேலும் அழுத்தத்தை அதிகரித்துள்ளது.

இதையும் படிங்க: கவலையே படாதீங்க! கச்சா எண்ணெய் விலை வீழ்ச்சியடையும்! போர் விரைவில் முடியும் என்கிறார் அதிபர் ட்ரம்ப்!