விண்வெளி நிலையத்தில் சிக்கிய சீன வீரர்கள்!! 204 நாட்களுக்கு பிறகு பூமி திரும்பினர்!

சீனாவின் டியாங்கோங் (Tiangong) விண்வெளி நிலையத்தில் விண்கல சேதத்தால் 9 நாட்கள் தாமதமடைந்து, 204 நாட்கள் தங்கிய மூன்று சீன விண்வெளி வீரர்கள், மாற்று விண்கலம் வழியாக நேற்று (நவம்பர் 14, 2025) பூமிக்கு பத்திரமாக திரும்பினர். விண்வெளி குப்பை (space debris) மோதியதால் ஷென்சோ-20 (Shenzhou-20) விண்கலத்தின் திரும்பும் கேப்சூலில் சிறு சேதங்கள் ஏற்பட்டன. 

இதனால் அவர்கள் ஷென்சோ-21 (Shenzhou-21) விண்கலத்தில் திரும்பினர். வடக்கு சீனாவின் இன்னர் மங்கோலியாவில் உள்ள டோங்பெங் (Dongfeng) தரையிறங்கும் தளத்தில் மாலை 4:40 மணிக்கு (பெய்ஜிங் நேரம்) பத்திரமாக தரையிறங்கினர். மூன்று வீரர்களும் நல்ல உடல் ஆரோக்கியத்தில் இருப்பதாக சீன விண்வெளி நிறுவனமான CMSA (China Manned Space Agency) தெரிவித்துள்ளது.

இந்த நிகழ்வு சீனாவின் விண்வெளி திட்டத்தில் ஒரு முக்கிய சவாலாகவும், வெற்றியாகவும் அமைந்துள்ளது. டியாங்கோங் விண்வெளி நிலையம், “வான இல்லம்” என்று பொருள்படும் இது, அமெரிக்கா மற்றும் பல்வேறு நாடுகள் இணைந்து நடத்தும் சர்வதேச விண்வெளி நிலையத்தை (ISS) தவிர, சீனா தனித்து உருவாக்கிய முதல் நிரந்தர விண்வெளி நிலையம். 

இதையும் படிங்க: ஆபாச படம் காண்பித்து ஓரினச்சேர்க்கை... 5 சிறுவர்களை சீரழித்த விடுதி போலி வார்டன் போக்சோவில் கைது...!

அமெரிக்காவின் தேசிய பாதுகாப்பு காரணங்களால் சீனா ISS-இல் பங்கேற்க அனுமதிக்கப்படாததால், 2021-ல் டியாங்கோங் தொடங்கப்பட்டது. இது சீனா-ரஷ்யா போன்ற நாடுகளுக்கான தனி விண்வெளி தளமாக விளங்குகிறது. ஆண்டுதோறும் ஆய்வுகளுக்கு மூன்று வீரர்கள் 6 மாதங்கள் தங்குவது வழக்கம்.

கடந்த ஏப்ரல் 24 அன்று ஷென்சோ-20 விண்கலத்தில் விண்வெளி வீரர்கள் சென் டோங் (Chen Dong - தளபதி), சென் ஜோங்ருய் (Chen Zhongrui), வாங் ஜீ (Wang Jie) ஆகியோர் டியாங்கோங் நிலையத்திற்கு சென்றனர். அங்கு 6 மாதங்கள் தங்கி, விண்வெளி நடை, அறிவியல் ஆய்வுகள், பராமரிப்பு பணிகள் போன்றவற்றை மேற்கொண்டனர். 

நவம்பர் 5 அன்று திட்டமிட்டபடி பூமிக்கு திரும்ப தயாரானபோது, விண்வெளி குப்பை மோதியதால் விண்கலத்தின் திரும்பும் கேப்சூலில் சிறு சீரிழிவுகள் ஏற்பட்டன. இது பாதுகாப்புக்கு ஆபத்தாக இருக்கலாம் என்று CMSA தீர்மானித்தது. எனவே, திரும்பல் 9 நாட்கள் தாமதமானது. இது சீன வீரர்களின் 204 நாட்கள் தங்கல், அந்நாட்டின் ஒரு குழுவுக்கான மிக நீண்ட காலம் என புதிய சாதனையாகும்.

இதையடுத்து, ஷென்சோ-21 விண்கலத்தில் சென்ற புதிய குழு (சாங் லூ, வு ஃபெய், சாங் ஹாங்ஜாங்) டியாங்கோங் நிலையத்திற்கு அக்டோபர் 31 அன்று வந்தது. ஆனால், ஷென்சோ-20 குழு திரும்ப, ஷென்சோ-21 விண்கலத்தைப் பயன்படுத்தியது. இதனால், ஷென்சோ-21 குழு தற்போது டியாங்கோங் நிலையத்தில் தங்கியுள்ளது. 

அவர்களுக்கான பூமி திரும்பி வரும் வாகனமாக ஷென்சோ-20 (சேதமடைந்தது) மட்டுமே உள்ளது. எனவே, அவசர சூழலில் பூமிக்கு திரும்புவது சவாலாக இருக்கும். CMSA, “ஷென்சோ-22 விண்கலத்தை ஏற்ற தேதியில் அனுப்புவோம்” என்று அறிவித்துள்ளது. ஷென்சோ-20 விண்கலம் விண்வெளியிலேயே விடப்பட்டு, சோதனைகளுக்கு பயன்படுத்தப்படும்.

இந்த சம்பவம் விண்வெளி குப்பை பிரச்சினையை மீண்டும் வெளிப்படுத்தியுள்ளது. உலகளவில் 36,000-க்கும் மேற்பட்ட குப்பை பொருட்கள் விண்வெளியில் சுற்றி வருவதாக NASA தெரிவிக்கிறது. இது விண்வெளி பயணங்களுக்கு ஆபத்தாக உள்ளது. சீனாவின் இந்த வெற்றி, அந்நாட்டின் விண்வெளி திட்டத்தின் வலிமையை உலகுக்கு நிரூபிக்கிறது. டியாங்கோங் நிலையம் 2030 வரை செயல்படும் என எதிர்பார்க்கப்படுகிறது. 2026-ல் பாகிஸ்தான் வீரரை அழைக்க திட்டமிட்டுள்ளது.

மூன்று வீரர்களும் பூமிக்கு திரும்பியதும், அவர்களுக்கு மருத்துவ பரிசோதனை செய்யப்பட்டது. அவர்கள் 204 நாட்கள் தங்கியது, சீனாவின் விண்வெளி வரலாற்றில் முதல் முறையாகும். இந்த நிகழ்வு சீன மக்களிடம் பெரும் மகிழ்ச்சியை ஏற்படுத்தியுள்ளது.

இதையும் படிங்க: உணவுப் பொருட்கள் மீதான வரி ரத்து! நிம்மதி பெருமூச்சு விடும் அமெரிக்க மக்கள்!