இனிமேல் கப்பல்களுக்கு சேதம் ஏற்பட்டால் ஈரான் பணத்தில் இருந்து இழப்பீடு... டிரம்பின் அதிரடி அறிவிப்பு!

மேற்காசியாவில் நீடித்து வரும் போர் பதற்றம் சர்வதேச கடல் வர்த்தகத்தையும் கடுமையாக பாதித்து வரும் நிலையில், அமெரிக்க அதிபர் டொனால்டு டிரம்ப் வெளியிட்டுள்ள புதிய அறிவிப்பு உலக நாடுகளின் கவனத்தை ஈர்த்துள்ளது. இனிமேல் கப்பல்கள், சரக்குகள் மற்றும் அதனுடன் தொடர்புடைய சொத்துகளுக்கு ஏற்படும் சேதங்களுக்கு இழப்பீடு வழங்க, அமெரிக்க கட்டுப்பாட்டில் உள்ள ஈரான் நிதி பயன்படுத்தப்படும் என்று அவர் தெரிவித்துள்ளார்.

அமெரிக்கா மற்றும் ஈரான் இடையிலான பதற்றம் அண்மைக் காலமாக அதிகரித்துள்ளது. அமைதி ஒப்பந்தம் முறிந்ததைத் தொடர்ந்து இரு நாடுகளுக்கும் இடையிலான மோதல் தீவிரமடைந்ததாக தகவல்கள் வெளியாகியுள்ளன. இதன் பின்னணியில், உலகின் முக்கிய எண்ணெய் போக்குவரத்து வழித்தடங்களில் ஒன்றான ஹார்முஸ் ஜலசந்தி வழியாக செல்லும் கப்பல்களுக்கு பாதுகாப்பு சவால்கள் உருவாகியுள்ளன. அந்த வழித்தடத்தில் பயணிக்கும் சில கப்பல்கள் மீது தாக்குதல் நடத்தப்பட்டதாக சர்வதேச அளவில் தகவல்கள் வெளியாகி வருகின்றன.

இந்த சூழலில், கப்பல்கள் மீது தாக்குதல் தொடர்ந்தால் ஈரானின் முக்கிய உள்கட்டமைப்புகள் மீது அமெரிக்கா நடவடிக்கை எடுக்கலாம் என்று டிரம்ப் ஏற்கனவே எச்சரித்திருந்தார்.

இதையும் படிங்க: இந்தியா உட்பட 17 நாடுகளுக்கு 10% வரி! அமெரிக்கா அதிபர் ட்ரம்ப் அதிரடி! விலை உயரும் ஆபத்து?

தற்போது அவர் வெளியிட்டுள்ள புதிய சமூக வலைதளப் பதிவில், "மறு அறிவிப்பு வரும் வரை கப்பல்கள், சரக்குகள் அல்லது அதனுடன் தொடர்புடைய சொத்துகளுக்கு ஏற்படும் அனைத்து சேதங்களுக்கும் அமெரிக்காவின் கட்டுப்பாட்டில் உள்ள ஈரான் நிதியிலிருந்து இழப்பீடு வழங்கப்படும். இந்த இழப்பீடு பெரிய தொகையாக இருக்கலாம். இருப்பினும் இதுவே நியாயமான நடைமுறை" என்று குறிப்பிட்டுள்ளார்.

எனினும், எந்த வகையான கப்பல்கள், எந்த நாடுகளைச் சேர்ந்த நிறுவனங்கள் அல்லது எந்த சம்பவங்கள் இந்த இழப்பீட்டு திட்டத்தில் இடம்பெறும் என்பது குறித்து டிரம்ப் விரிவான விளக்கத்தை அளிக்கவில்லை. அதேபோல், அமெரிக்கக் கட்டுப்பாட்டில் உள்ள ஈரான் சொத்துகளை இவ்வாறு பயன்படுத்துவதற்கான சட்ட நடைமுறைகள் குறித்தும் அதிகாரப்பூர்வ தகவல் வெளியாகவில்லை.

மேற்காசியாவில் நிலவும் பதற்றம் காரணமாக உலகளாவிய எண்ணெய் விநியோகம், கடல் போக்குவரத்து மற்றும் காப்பீட்டு செலவுகள் மீது தாக்கம் ஏற்படும் என்ற அச்சம் ஏற்கனவே நிலவி வருகிறது. இந்த நிலையில், டிரம்பின் புதிய அறிவிப்பு அமெரிக்கா–ஈரான் உறவில் மேலும் பதற்றத்தை அதிகரிக்கக்கூடும் என சர்வதேச அரசியல் மற்றும் பொருளாதார ஆய்வாளர்கள் கருதுகின்றனர். இந்த விவகாரத்தில் அமெரிக்கா மற்றும் ஈரான் அரசுகளின் அடுத்தகட்ட நடவடிக்கைகள் உலக வர்த்தகச் சந்தைகளால் உன்னிப்பாக கவனிக்கப்பட்டு வருகின்றன.

இதையும் படிங்க: ஹார்முஸ் ஜலசந்தியில் கப்பலை தாக்கினால் ஈரான் மின் நிலையங்களில் வெடிகுண்டு வீசுவோம்: டிரம்ப் மிரட்டல்!