எச்-1பி விசா கட்டண உயர்வு தொடரும்.. மேலும் ஓராண்டுக்கு நீட்டித்த அமெரிக்கா..!! டிரம்ப் அதிரடி!!
இந்த உயர்வு, குறிப்பாக வெளிநாட்டிலிருந்து புதிதாக வரும் தொழிலாளர்களுக்கு மட்டுமே பொருந்தும்.
- Sat, 19 Sep 2026 18:22:47 IST
by
Shanthi M.
- #
அமெரிக்க அதிபர் டொனால்ட் டிரம்ப் நிர்வாகம், எச்-1பி விசா திட்டத்தில் வெளிநாட்டு திறன்மிக்க தொழிலாளர்களை அமெரிக்காவிற்கு அழைத்து வரும் நிறுவனங்கள் மீது விதிக்கப்பட்ட உயர்ந்த கட்டணத்தை மேலும் ஓராண்டுக்கு நீட்டித்துள்ளது. இந்த முடிவு, வெள்ளை மாளிகையின் அறிவிப்பு மூலம் அதிகாரப்பூர்வமாக வெளியிடப்பட்டுள்ளது.
கடந்த 2025 செப்டம்பர் 19 அன்று பிறப்பிக்கப்பட்ட அதிபர் ஆணையின் கீழ், புதிய எச்-1பி விசா மனுக்களுக்கு 1 லட்சம் அமெரிக்க டாலர் (சுமார் 95 லட்சம் ரூபாய்) கட்டணம் செலுத்த வேண்டும் என நிபந்தனை விதிக்கப்பட்டது. இதற்கு முன் இந்த கட்டணம் சில ஆயிரம் டாலர்களாக மட்டுமே இருந்தது. இந்த உயர்வு, குறிப்பாக வெளிநாட்டிலிருந்து புதிதாக வரும் தொழிலாளர்களுக்கு மட்டுமே பொருந்தும்.
அமெரிக்காவிற்குள் ஏற்கனவே படித்துக் கொண்டிருக்கும் மாணவர்கள் அல்லது தற்போதைய விசா நீட்டிப்புகளுக்கு இது பொருந்தாது. தேசிய நலன் சார்ந்த விதிவிலக்குகளும் வழங்கப்பட்டுள்ளன. பல்வேறு மாநில அரசுகள் மற்றும் வணிக அமைப்புகள் இந்த கட்டண உயர்வை எதிர்த்து நீதிமன்றங்களில் வழக்கு தொடர்ந்தன. சில மாவட்ட நீதிமன்றங்கள் இதை சட்டவிரோதமானதாகக் கருதி தடை விதித்தன.
இதையும் படிங்க: இந்திய ஊழியர்களுக்கு ஷாக்.. H-1B விசா புதுப்பிப்பின் 60 நாள் அவகாசம் இனி இல்லையா? அதிரடி காட்டும் டிரம்ப்!!
அமெரிக்க அரசு மேல்முறையீடு செய்துள்ளதால் வழக்குகள் இன்னும் நிலுவையில் உள்ளன. இருந்தபோதிலும், அதிபர் டிரம்ப் இந்தக் கட்டுப்பாட்டை செப்டம்பர் 21, 2027 வரை நீட்டித்துள்ளார். வெள்ளை மாளிகை வெளியிட்ட அறிக்கையில், இந்த நடவடிக்கையால் பெரிய தகவல் தொழில்நுட்ப நிறுவனங்களின் எச்-1பி பதிவுகளில் 92 சதவீத குறைவு ஏற்பட்டுள்ளதாகக் குறிப்பிடப்பட்டுள்ளது.
இதனால் அமெரிக்க பொருளாதாரம் மற்றும் தேசிய பாதுகாப்பு பாதுகாக்கப்படுவதாகவும், அமெரிக்க ஊழியர்கள் மற்றும் பட்டதாரிகளுக்கு வேலைவாய்ப்பு வாய்ப்புகள் அதிகரிக்கும் எனவும், தேவைப்படும்போது மிக உயர்ந்த திறன் கொண்ட வெளிநாட்டு தொழிலாளர்களை மட்டுமே நிறுவனங்கள் பணியமர்த்துவது உறுதி செய்யப்படும் எனவும் தெரிவிக்கப்பட்டுள்ளது.
எச்-1பி விசா திட்டத்தில் இந்தியர்கள் பெரும்பான்மையாக பயனடைகின்றனர். இந்த நீட்டிப்பு, அவுட்சோர்சிங் நிறுவனங்கள் மீதான கடுமையான கண்காணிப்புடன் இணைந்து, அமெரிக்கத் தொழிலாளர்களைப் பாதுகாக்கும் முயற்சியாகப் பார்க்கப்படுகிறது. அதே நேரத்தில், தகவல் தொழில்நுட்பத் துறையில் திறன்மிக்க தொழிலாளர் தேவையை எதிர்கொள்ளும் நிறுவனங்களுக்கு கூடுதல் சுமையாக அமையலாம் என வணிக வட்டாரங்கள் கருத்து தெரிவிக்கின்றன.
இதையும் படிங்க: அமெரிக்க மிரட்டலுக்கு பணிய மாட்டோம்: வர்த்தக நலன்களை பாதுகாக்க இந்தியா உறுதி!
