மேற்காசிய போர் எல்லை மீறி சென்று விட்டது! கவலை தெரிவிக்கும் ஐ.நா! குட்டரெஸ் வேதனை!

மத்திய கிழக்கில் தீவிரமாகி வரும் போர்ச் சூழ்நிலை குறித்து ஐக்கிய நாடுகள் சபையின் பொதுச்செயலாளர் அன்டோனியோ குட்டரெஸ் (Antonio Guterres) கடும் எச்சரிக்கை விடுத்துள்ளார். உலகம் தற்போது மிகப்பெரிய போர் ஒன்றின் விளிம்பில் நின்று கொண்டிருக்கிறது என அவர் தனது அறிக்கையில் தெரிவித்திருப்பது சர்வதேச அளவில் பெரும் அதிர்வை ஏற்படுத்தியுள்ளது.

அவரது அறிக்கையில், ஈரான் தொடர்பான மோதல்கள் கட்டுப்பாட்டை மீறி விட்டதாகவும், இந்த நிலை தொடர்ந்தால் அது உலகளாவிய தாக்கங்களை ஏற்படுத்தும் என்றும் கூறப்பட்டுள்ளது. உயிரிழப்புகள் மற்றும் பொருளாதார பாதிப்புகள் அதிகரித்து வரும் நிலையில், உடனடியாக தாக்குதல்களை நிறுத்துவது அவசியம் என அவர் வலியுறுத்தியுள்ளார்.

மேலும், இந்த மோதலில் நேரடியாக தொடர்பில்லாத அண்டை நாடுகளின் மீது தாக்குதல் நடத்துவதை ஈரான் தவிர்க்க வேண்டும் என்றும் அவர் அறிவுறுத்தியுள்ளார். இத்தகைய நடவடிக்கைகள் மோதலை மேலும் தீவிரப்படுத்தும் அபாயம் உள்ளதாகவும் எச்சரித்துள்ளார். தற்போது போர் தீவிரப்படுத்தும் முயற்சிகளில் ஈடுபட வேண்டிய நேரமல்ல; மாறாக, ராஜதந்திரம் மற்றும் பேச்சுவார்த்தை வழியே தீர்வு காண வேண்டிய கட்டாய நிலை ஏற்பட்டுள்ளது என அவர் குறிப்பிட்டுள்ளார்.

இதையும் படிங்க: போரை நிறுத்த அதிபர் ட்ரம்பின் 15 அம்ச அமைதி ஒப்பந்தம்! ஈரான் விதிக்கும் கடுமையான நிபந்தனைகள்!

சர்வதேச சட்டங்களுக்கு முழுமையான மதிப்பளிப்பதன் அவசியத்தையும் அவர் வலியுறுத்தியுள்ளார். அனைத்து நாடுகளும் அமைதிப் பேச்சுவார்த்தை மேசைக்கு திரும்பி, பிரச்சினைக்கு தீர்வு காண முயற்சிக்க வேண்டும் என்றும் அவர் கேட்டுக்கொண்டுள்ளார்.

இதற்கிடையில், ஹார்முஸ் நீரிணை மூடப்பட்டிருப்பது உலக நாடுகளுக்கு புதிய சவாலாக உருவெடுத்துள்ளது. இந்த முக்கிய கடற்பாதை வழியாக நடைபெறும் எரிபொருள் மற்றும் உர விநியோகம் பாதிக்கப்பட்டதால், உலகளாவிய பொருளாதார நெருக்கடி உருவாகும் அபாயம் இருப்பதாகவும் அன்டோனியோ குட்டரெஸ் (Antonio Guterres) தனது அறிக்கையில் சுட்டிக்காட்டியுள்ளார்.

மொத்தத்தில், மத்திய கிழக்கில் நிலவும் பதற்றம் உலக அமைதிக்கே பெரிய அச்சுறுத்தலாக மாறி வரும் நிலையில், உடனடி போர் நிறுத்தமும், பேச்சுவார்த்தை தீர்வும் தான் நிலைமையை சமாளிக்க ஒரே வழி என ஐ.நா. வலியுறுத்தியுள்ளது.

இதையும் படிங்க: இக்கட்டில் இந்தியாவுக்கு கைகொடுத்த ரஷ்யா!! 6 கோடி கச்சா எண்ணெய் பேரல்கள் அனுப்ப ஒப்பந்தம்!