வெள்ளை மாளிகையின் AI ஆலோசகர் ஸ்ரீராம் கிருஷ்ணன்..!! இம்மாத இறுதியில் பதவி விலகல்..!!

டொனால்ட் டிரம்ப் தலைமையிலான அமெரிக்க நிர்வாகத்தில் செயற்கை நுண்ணறிவு (AI) துறையின் மூத்த கொள்கை ஆலோசகராகப் பணியாற்றி வந்த இந்திய வம்சாவளியைச் சேர்ந்த ஸ்ரீராம் கிருஷ்ணன், இந்த மாத இறுதியில் தனது பதவியிலிருந்து விலகப் போவதாக அறிவித்துள்ளார். கடந்த 18 மாதங்களாக டிரம்ப் நிர்வாகத்தில் தீவிரமாக ஈடுபட்டு, அமெரிக்காவின் தேசிய ஏஐ கொள்கையையும், ‘அமெரிக்க ஏஐ செயல் திட்டம்’ உள்ளிட்ட முக்கிய முயற்சிகளையும் வடிவமைப்பதில் முக்கியப் பங்கு வகித்த அவர், இனி வெள்ளை மாளிகைக்கு வெளியே இருந்து ஆலோசகராகத் தொடர்ந்து பணியாற்ற உள்ளார்.

தனது எக்ஸ் (முன்பு ட்விட்டர்) பக்கத்தில் பதிவிட்ட ஸ்ரீராம் கிருஷ்ணன், “இந்த மாத இறுதியில் வெள்ளை மாளிகையில் எனது பொறுப்பிலிருந்து விலகுகிறேன். சிறிது கால இடைவெளிக்குப் பிறகு, அமெரிக்கா எதிர்கொள்ளும் ஏஐ சவால்களுக்கு தீர்வு காணும் புதிய திட்டங்களில் ஈடுபட உள்ளேன்” என்று குறிப்பிட்டார். அமெரிக்க மக்களுக்கு சேவை செய்தது தனக்கு பெரும் பாக்கியம் என்றும், அதற்கான வாய்ப்பு கிடைத்ததற்கு நன்றியுடன் இருப்பதாகவும் அவர் தெரிவித்தார். 

மேலும், “முதன்மையாகவும், எல்லாவற்றுக்கும் மேலாகவும், அதிபர் டொனால்ட் டிரம்ப் கீழ் பணியாற்றியதை பெருமையாகக் கருதுகிறேன். அவரது தலைமை இல்லையென்றால் ஏஐ பந்தயத்தில் அமெரிக்கா முன்னிலையில் இருந்திருக்காது” என்று பாராட்டினார். ஸ்ரீராம் கிருஷ்ணன் தனது பணிக்காலத்தில் பல முக்கிய திட்டங்களை முன்னெடுத்துள்ளார். அமெரிக்காவின் ஏஐ உள்கட்டமைப்பு வலுப்படுத்தல், தொழில்நுட்பப் போட்டித்தன்மை அதிகரிப்பு, சர்வதேச ஒத்துழைப்பு ஆகியவற்றில் கவனம் செலுத்தினார். தன்னுடன் இணைந்து பணியாற்றிய சக ஊழியர்கள் அனைவருக்கும் நன்றி தெரிவித்த அவர், அவர்களின் ஒத்துழைப்பின்றி இந்தச் சாதனைகள் சாத்தியமாகியிருக்காது என்று குறிப்பிட்டார்.

இதையும் படிங்க: மலை உச்சியில் தீபம் ஏற்றியே தீருவோம்! நீதிமன்ற தீர்ப்பை சுட்டிக்காட்டி தமிழக அரசுக்கு தமிழிசை விடுத்த எச்சரிக்கை!

வெள்ளை மாளிகை ஏஐ மற்றும் கிரிப்டோ பிரிவுத் தலைவர் டேவிட் சாக்ஸ், ஸ்ரீராம் பதவி விலகினாலும் வெளியில் இருந்து ஆலோசகராக அரசுக்கு தொடர்ந்து ஆதரவு அளிப்பார் என்று உறுதிப்படுத்தினார். இந்திய வம்சாவளியைச் சேர்ந்த ஸ்ரீராம், தொழில்நுட்பத் துறையில் நீண்ட அனுபவம் கொண்டவர். மைக்ரோசாஃப்ட், ட்விட்டர் (இப்போது எக்ஸ்), யாஹூ, பேஸ்புக் (மெட்டா), ஸ்நாப் உள்ளிட்ட உலகின் முன்னணி நிறுவனங்களில் முக்கியப் பொறுப்புகளில் பணியாற்றியுள்ளார். அவரது நிபுணத்துவம் அமெரிக்க ஏஐ கொள்கையை வலுப்படுத்த உதவியுள்ளது.

டிரம்ப் நிர்வாகம் ஏஐ துறையில் அமெரிக்காவை உலகத் தலைவராக நிலைநிறுத்தும் நோக்கில் பல்வேறு நடவடிக்கைகளை எடுத்து வரும் நிலையில், ஸ்ரீராம் கிருஷ்ணனின் பங்களிப்பு குறிப்பிடத்தக்கது. அவரது விலகல் ஏஐ துறையில் புதிய சகாப்தத்தை உருவாக்கும் மாற்றங்களுக்கு வழிவகுக்கும் என்று அரசியல் மற்றும் தொழில்நுட்ப வட்டாரங்கள் பார்க்கின்றன. அமெரிக்க-சீன ஏஐ போட்டியில் அமெரிக்கா முன்னிலை வகிக்க வேண்டும் என்பதில் ஸ்ரீராம் தொடர்ந்து ஆர்வம் காட்டி வருகிறார்.

இதையும் படிங்க: மோடி தலைமையில் மாறும் அமைச்சரவை! தூக்கியடிக்கப்படும் அமைச்சர்கள்! யார்? யார்? சீட்டு கிழிவது கன்பார்ம்?!