மேற்குவங்காளத்தில் ஆக்சனில் இறங்கிய பாஜக! சட்டவிரோதமாக குடியேறிய வங்கதேசத்தினர் 18 பேர் கைது!
மேற்கு வங்கத்தில் சட்டவிரோதமாக குடியேறிய 6 குழந்தைகள் உட்பட வங்கதேசத்தினர் 18 பேரை போலீசார் கைது செய்தனர்.
by
மேற்கு வங்கத்தில் சட்டவிரோத குடியேற்றத்திற்கு எதிராக நடைபெற்று வரும் நடவடிக்கைகளின் ஒரு பகுதியாக, வங்கதேசத்தைச் சேர்ந்த 18 பேர் கைது செய்யப்பட்ட சம்பவம் பரபரப்பை ஏற்படுத்தியுள்ளது. கைது செய்யப்பட்டவர்களில் 6 குழந்தைகளும் இருப்பதாக போலீசார் தெரிவித்துள்ளனர்.
தெற்கு 24 பர்கானாஸ் மாவட்டத்தில் இந்த நடவடிக்கை மேற்கொள்ளப்பட்டது. போலீசாருக்கு கிடைத்த ரகசியத் தகவலின் அடிப்படையில், நேற்று இரவு சிறப்பு சோதனை நடத்தப்பட்டது. அப்போது சந்தேகத்திற்கிடமான முறையில் தங்கி இருந்த 18 பேரை போலீசார் பிடித்து விசாரணை மேற்கொண்டனர். முதற்கட்ட விசாரணையில், அவர்கள் அனைவரும் வங்கதேசத்தைச் சேர்ந்தவர்கள் என்பது தெரியவந்ததாக அதிகாரிகள் கூறியுள்ளனர்.
மேலும், முகவர்களின் உதவியுடன் எல்லைப் பாதுகாப்பு வேலியைத் தாண்டி சட்டவிரோதமாக இந்தியாவிற்குள் நுழைந்ததாகவும், பின்னர் மேற்கு வங்கத்தின் பல பகுதிகளில் தங்கி வாழ்ந்ததாகவும் அவர்கள் ஒப்புக்கொண்டுள்ளதாக தகவல்கள் தெரிவிக்கின்றன. கைது செய்யப்பட்டவர்கள் கடந்த மூன்றரை ஆண்டுகளாக குல்தாலி பகுதியில் வசித்து வந்ததாகவும், அவர்களில் சிலர் உள்ளூர் செங்கல் சூளைகளில் வேலை செய்து வந்ததாகவும் விசாரணையில் தெரியவந்துள்ளது.
இதையும் படிங்க: சுவெந்து அதிகாரி உதவியாளர் மரணத்தில் கூலிப்படை தொடர்பு? தனிப்படை விசாரணை தீவிரம்!
தற்போது அவர்களிடம் இருந்து கைப்பற்றப்பட்ட ஆவணங்கள் மற்றும் அடையாள விவரங்கள் முழுமையாக சரிபார்க்கப்பட்டு வருகின்றன. விசாரணை முடிந்த பிறகு அவர்கள் தற்காலிக தடுப்பு மையங்களுக்கு மாற்றப்படுவார்கள் என்றும், பின்னர் வங்கதேச அதிகாரிகளுடன் ஒருங்கிணைந்து அவர்களை சொந்த நாட்டிற்கு திருப்பி அனுப்புவதற்கான நடைமுறைகள் தொடங்கப்படும் என்றும் அதிகாரிகள் தெரிவித்துள்ளனர்.
இதற்கிடையில், நாட்டின் பல்வேறு பகுதிகளிலும் சட்டவிரோத குடியேற்றத்திற்கு எதிரான நடவடிக்கைகள் தீவிரப்படுத்தப்பட்டுள்ளன. குறிப்பாக நேற்று இரவு குஜராத் மாநிலம் ஆமதாபாத்தில் போலீசார் மற்றும் குற்றப்பிரிவு அதிகாரிகள் இணைந்து நடத்திய சோதனையில், சட்டவிரோதமாக இந்தியாவில் தங்கி இருப்பதாக சந்தேகிக்கப்படும் 290-க்கும் மேற்பட்ட வங்கதேச நாட்டினரை காவலில் எடுத்து விசாரணை மேற்கொண்டு வருகின்றனர்.
மேற்கு வங்கம் மற்றும் குஜராத் மாநிலங்களில் ஒரே நேரத்தில் நடைபெற்ற இந்த நடவடிக்கைகள், சட்டவிரோத குடியேற்ற விவகாரத்தை மீண்டும் தேசிய அளவில் விவாதப் பொருளாக மாற்றியுள்ளன. எல்லைப் பாதுகாப்பை வலுப்படுத்தவும், சட்டவிரோதமாக நாட்டில் தங்கியிருப்பவர்களை கண்டறியவும் அதிகாரிகள் தொடர்ந்து கண்காணிப்பு நடவடிக்கைகளை மேற்கொண்டு வருகின்றனர்.
இதையும் படிங்க: மேற்குவங்கத்தில் முதல்வராகிறார் சுவேந்து அதிகாரி!! மே 9ல் பதவிஏற்பு! மோடி சூசகமாக சொன்ன தகவல்!
