ஜார்க்கண்டில் கேட்ட துப்பாக்கிச் சத்தம்.. 2 மாவோயிஸ்டுகள் சுட்டுக்கொலை.. CRPF வீரர் வீரமரணம்..!
ஜார்க்கண்ட் மாநிலத்தில் நடத்தப்பட்ட என்கவுன்டரில் 2 மாவோயிஸ்டுகள் சுட்டுக்கொல்லப்பட்டனர்.
by
இந்தியாவின் சத்தீஷ்கர், மகாராஷ்டிரா, ஜார்க்கண்ட், ஒடிசா, மத்தியப் பிரதேசம் உள்ளிட்ட மாநிலங்களில் நக்சலைட்டுகள் மற்றும் மாவோயிஸ்டுகளின் ஆதிக்கம் தொடர்ந்து பாதுகாப்பு அச்சுறுத்தலாக உள்ளது. இந்த மாநிலங்களில், குறிப்பாக பழங்குடியினர் வாழும் அடர்ந்த காட்டுப் பகுதிகளும், தொலைதூர கிராமங்களும் மாவோயிஸ்டுகளின் செல்வாக்கு மையங்களாக உள்ளன.
இவர்கள் அரசுக்கு எதிராக ஆயுதப் போராட்டம் நடத்தி, உள்ளூர் மக்களை அச்சுறுத்துவதுடன், பாதுகாப்புப் படைகளை குறிவைத்து தாக்குதல்களை அரங்கேற்றி வருகின்றனர். சத்தீஷ்கரின் பஸ்தர் பகுதி மாவோயிஸ்டுகளின் முக்கிய கோட்டையாக உள்ளது. இங்கு அடிக்கடி பாதுகாப்புப் படைகளுக்கும் மாவோயிஸ்டுகளுக்கும் இடையே துப்பாக்கிச் சண்டைகள் நடைபெறுகின்றன.
இதையும் படிங்க: டென்னிஸ் வீராங்கனையின் உயிரை பறித்த ரீல்ஸ் மோகம்.. தந்தை செய்த கொடூர செயல்..!
இந்நிலையில் ஜார்க்கண்ட் மாநிலம், போகாரோ மாவட்டத்தில் உள்ள பிர்ஹோர்டரா காட்டுப் பகுதியில் ஜூலை 16ம் தேதியான இன்று அதிகாலை 5:45 மணியளவில் பாதுகாப்புப் படைகளுக்கும் மாவோயிஸ்டுகளுக்கும் இடையே நடந்த துப்பாக்கிச் சண்டையில் இரண்டு மாவோயிஸ்டுகள் கொல்லப்பட்டனர். இந்த மோதலில் மத்திய ரிசர்வ் காவல் படையின் (CRPF) உயர்மட்ட கோப்ரா-209 பட்டாலியனைச் சேர்ந்த ஒரு வீரரும் உயிரிழந்தார். வீரமரணமடைந்த எல்லைப்பாதுகாப்புப்படை வீரர் அசாம் மாநிலத்தை சேர்ந்தவர் என்பது குறிப்பிடத்தக்கது.
மாவோயிஸ்டுகள் அப்பகுதியில் இருப்பதாக வந்த உளவுத்தகவலின் அடிப்படையில், ஜார்க்கண்ட் காவல்துறையும், CRPF படைகளும் இணைந்து இந்த நடவடிக்கையை மேற்கொண்டன. கோமியா காவல் நிலைய எல்லைக்குட்பட்ட இந்தப் பகுதியில், தேடுதல் வேட்டையின்போது மாவோயிஸ்டுகள் பாதுகாப்பு படைகள் மீது தாக்குதல் நடத்தினர்.
பதிலடியாக நடந்த துப்பாக்கிச் சண்டையில், ஒரு மாவோயிஸ்ட் சீருடையிலும், மற்றொருவர் சாதாரண உடையிலும் இருந்தனர். சம்பவ இடத்திலிருந்து ஒரு ஏ.கே-47 துப்பாக்கி மீட்கப்பட்டது. இந்த நடவடிக்கை, மாவோயிஸ்டுகளுக்கு எதிரான தீவிரமான பிரச்சாரத்தின் ஒரு பகுதியாகும்.
ஜார்க்கண்ட் காவல்துறை, இந்த ஆண்டு இறுதிக்குள் மாநிலத்தை மாவோயிஸ்டு செல்வாக்கிலிருந்து முழுமையாக விடுவிக்க இலக்கு வைத்துள்ளது. இந்த ஆண்டு மட்டும் 16 மாவோயிஸ்டுகள் கொல்லப்பட்டு, 10 பேர் சரணடைந்துள்ளனர்.
மத்திய உள்துறை அமைச்சர் அமித் ஷா, 2026ம் ஆண்டு மார்ச் மாதத்திற்குள் நாட்டை மாவோயிஸ்டு அச்சுறுத்தலில் இருந்து விடுவிக்க வேண்டும் என்று கூறியுள்ளார். தற்போது, மற்ற மாவோயிஸ்டுகளைத் தேடி அப்பகுதியில் தேடுதல் நடவடிக்கை தொடர்கிறது. இந்தச் சம்பவம், மாவோயிஸ்டு அச்சுறுத்தலை ஒழிக்க அரசின் உறுதியை மீண்டும் வலியுறுத்துகிறது.
இதையும் படிங்க: சத்தீஸ்கர் வனப்பகுதியில் பாதுகாப்பு படை வேட்டை.. 2 பெண் நக்சலைட்டுகள் சுட்டுக்கொலை..
