பாஜகவால் அதிமுகவின் வாக்கு வங்கி சிதையும்! காஞ்சிபுரத்தில் கார்த்தி சிதம்பரம் எம்.பி பேட்டி!

காஞ்சிபுரம் காந்தி சாலையில் அமைந்துள்ள வரலாற்றுப் புகழ்பெற்ற அருள்மிகு ஸ்ரீ வழக்கத்தீஸ்வரர் கோவிலுக்கு இன்று நாடாளுமன்ற உறுப்பினர் கார்த்தி சிதம்பரம் தனது குடும்பத்தாருடன் வருகை தந்தார். நீதிமன்ற வழக்குகளில் சிக்கித் தவிப்பவர்கள் மற்றும் நீண்ட காலப் பிரச்சினைகளால் அவதிப்படுபவர்கள் இக்கோவிலில் விளக்கேற்றி வழிபட்டால் சாதகமான தீர்ப்பும், விடுதலையும் கிடைக்கும் என்பது ஐதீகம். அந்த வகையில், சுவாமி தரிசனம் செய்த கார்த்தி சிதம்பரம், தனது கோரிக்கைகளைக் கடிதமாக எழுதி, அதனைச் சன்னதி முன்புள்ள உண்டியலில் போட்டுத் தனது நேர்த்திக்கடனைச் செலுத்தினார். கோவிலைச் சுற்றி வலம் வந்து மனமுருகப் பிரார்த்தனை செய்த அவர், தரிசனத்திற்குப் பிறகு செய்தியாளர்களைச் சந்தித்தார்.

அப்போது தமிழகத்தின் தற்போதைய அரசியல் சூழல் குறித்துப் பேசிய அவர், "தமிழகத்தில் திமுக தலைமையிலான கூட்டணி மிகவும் கட்டுக்கோப்பாகவும், கொள்கை ரீதியாகவும் வலுவாக உள்ளது. இந்தக் கூட்டணிக்குள் விரிசல் ஏற்பட்டுள்ளதாக அதிமுக பொதுச்செயலாளர் எடப்பாடி பழனிசாமி தொடர்ந்து கூறி வருகிறார். ஆனால், உண்மையில் எங்களது கூட்டணி குறித்து அவர் கவலைப்பட வேண்டிய அவசியம் இல்லை. அதிமுகவின் தற்போதைய நிலையை அவர் முதலில் உணர வேண்டும். குறிப்பாக, பாஜகவுடன் கூட்டணி அமைப்பதால் அதிமுகவிற்கு எவ்வித லாபமும் இல்லை. மாறாக, பாஜகவின் பிடியில் சிக்கினால் அதிமுகவிற்கு வழக்கமாக வரும் வாக்குகள் கூட வராமல் போகும் சூழலே ஏற்படும். பாஜகவால் அதிமுகவின் வாக்கு வங்கி சிதைவதுதான் மிச்சம்" எனத் தெரிவித்தார்.

முன்னதாக, கார்த்தி சிதம்பரம் வருகையையொட்டி காஞ்சிபுரம் மாவட்ட மற்றும் மாநகர காங்கிரஸ் நிர்வாகிகள் அவருக்கு உற்சாக வரவேற்பு அளித்தனர். மாநகராட்சி துணை மேயர் குமரகுருநாதன், மாநகரத் தலைவர் நாதன், முன்னாள் மாவட்டத் தலைவர் வழக்கறிஞர் ஜி.வி. மதியழகன், மாநிலச் செயற்குழு உறுப்பினர் பத்மநாபன் உள்ளிட்ட முக்கிய நிர்வாகிகள் மலர்க்கொத்து கொடுத்து பொன்னாடை அணிவித்து வரவேற்றனர். இந்த நிகழ்வில் மாநில வழக்கறிஞர் பிரிவு பொதுச் செயலாளர் குருராஜ், மாவட்டத் தலைவர் கதிரவன், சிறுபான்மை பிரிவு மாவட்ட தலைவர் முருகன், சாந்தகுமார் மற்றும் நூற்றுக்கணக்கான காங்கிரஸ் தொண்டர்கள் கலந்து கொண்டனர். 2026 சட்டமன்றத் தேர்தல் நெருங்கும் வேளையில், வழக்கத்தீஸ்வரர் கோவிலில் கார்த்தி சிதம்பரம் மேற்கொண்ட இந்த ஆன்மீகப் பயணம் மற்றும் அரசியல் விமர்சனம் தமிழக அரசியல் களத்தில் பரபரப்பை ஏற்படுத்தியுள்ளது.

இதையும் படிங்க: “திமுக தாமதித்தால் மனக்கசப்புதான் மிஞ்சும்!” கார்த்தி சிதம்பரம் எம்.பி. எச்சரிக்கை!

இதையும் படிங்க: “கமல்ஹாசன் உரைக்கு கோனார் உரை தேடும் பாஜக!” புதுச்சேரியில் திருமாவளவன் விமர்சனம்!