அதிமுகவிற்கு அமமுக முழு ஆதரவு! டிடிவி தினகரனை நேரில் சந்தித்த கே.பி.முனுசாமி, ஓ.எஸ்.மணியன்!

மதுராந்தகம் மற்றும் தாராபுரம் சட்டமன்றத் தொகுதி இடைத்தேர்தலில் போட்டியிடும் அதிமுக வேட்பாளர்களுக்கு அம்மா மக்கள் முன்னேற்றக் கழகம் (AMMK) தனது முழுமையான ஆதரவை வழங்கும் என்றும், அதிமுக வேட்பாளர்களின் வெற்றிக்காக அமமுக நிர்வாகிகள் தேர்தல் களத்தில் முழுமூச்சாகப் பாடுபடுவார்கள் என்றும் அக்கட்சியின் பொதுச்செயலாளர் டிடிவி தினகரன் அதிகாரப்பூர்வமாக அறிவித்துள்ளார்.

அக்டோபர் 6-ஆம் தேதி நடைபெறவுள்ள இடைத்தேர்தலில், தாராபுரம் (தனி) தொகுதியில் பானுமதியும், மதுராந்தகம் (தனி) தொகுதியில் கனிதா சம்பத்தும் அதிமுக சார்பில் அதிகாரப்பூர்வ வேட்பாளர்களாகக் களமிறக்கப்பட்டுள்ளனர். இதனைத் தொடர்ந்து தேர்தல் கூட்டணிகளை வலுப்படுத்த அதிமுக தலைமை தீவிரம் காட்டி வரும் சூழலில், சென்னை அடையாறில் உள்ள அமமுக தலைமை அலுவலகத்திற்கு அதிமுக துணைப் பொதுச்செயலாளர் கே.பி. முனுசாமி, அமைப்புச் செயலாளரும் முன்னாள் அமைச்சருமான ஓ.எஸ். மணியன், முன்னாள் அமைச்சர் அக்ரி எஸ்.எஸ். கிருஷ்ணமூர்த்தி ஆகியோர் நேரில் வருகை தந்தனர். அங்கு டிடிவி தினகரனைச் சந்தித்துப் பொன்னாடை அணிவித்த அதிமுக தூதுக்குழுவினர், இடைத்தேர்தலில் அதிமுக வேட்பாளர்களுக்கு ஆதரவு கோரிப் பேச்சுவார்த்தை நடத்தினர்.

இச்சந்திப்பைத் தொடர்ந்து செய்தியாளர்களைச் சந்தித்த டிடிவி தினகரன், நான் தேசிய ஜனநாயகக் கூட்டணியில் தொடர்ந்து நீடிக்கிறேன் என்பதை ஏற்கனவே பலமுறை திட்டவட்டமாகத் தெளிவுபடுத்திவிட்டேன். தாராபுரம் மற்றும் மதுராந்தகம் இடைத்தேர்தலில் வேட்புமனுத் தாக்கல் செய்வது மற்றும் தேர்தல் களப்பணிகள் தொடர்பாக அதிமுக நிர்வாகிகள் கலந்து பேசினார்கள். இது ஒரு மரியாதை நிமித்தமான சந்திப்பாகும். இந்த இடைத்தேர்தலில் போட்டியிடும் அதிமுக வேட்பாளர்களை அம்மா மக்கள் முன்னேற்றக் கழகம் மனப்பூர்வமாக ஆதரிக்கிறது; அதிமுக வேட்பாளர்கள் அபார வெற்றி பெற அமமுகவின் நிர்வாகிகள் மற்றும் தொண்டர்கள் களத்தில் தோளோடு தோள் நின்று கடுமையாகப் பாடுபடுவார்கள் என்று பிரகடனம் செய்தார்.

இதையும் படிங்க: புதிய எண்ணெய் கிணறுகள்.. கேள்விக்குறியாகும் மீனவர்கள் வாழ்க்கை.. TTV தினகரன் வார்னிங்..!!

பொதுவாக இடைத்தேர்தல்களில் ஆளும் கட்சிதான் எளிதில் வெற்றி பெறும் என்ற எழுதப்படாத விதி உள்ளதே என்று செய்தியாளர்கள் கேள்வி எழுப்பியதற்குப் பதிலளித்த அவர், அப்படியென்றால் ஆளும் கட்சியை எதிர்த்துப் போட்டியிட்டு ஆர்.கே. நகர் இடைத்தேர்தலில் சுயேச்சையாக நின்று நான் மகத்தான வெற்றி பெறவில்லையா? என்று சுட்டிக்காட்டினார். தொடர்ந்து ஆளும் தவெக அரசின் செயல்பாடுகள் மற்றும் முதலமைச்சர் விஜய் குறித்துக் கடுமையான விமர்சனத்தை முன்வைத்த டிடிவி தினகரன், முதலமைச்சர் விஜய் தன்னை ஒரு திரைப்பட நடிகராக மட்டுமே இன்னமும் காட்டிக் கொள்கிறாரே தவிர, ஒரு முழுமையான முதலமைச்சராகப் பொறுப்புணர்வோடு செயல்பட்டது போல் இதுவரை எங்கும் தெரியவில்லை என்று சாடினார்.

இதையும் படிங்க: பெரியார் கொள்கைத் தலைவரா.? தவெக நாடகம் அம்பலம்..! வெளுத்துவிட்ட TTV தினகரன்..!!