அயோத்தி ராமர் கோயில் நன்கொடை முறைகேடு..!! உத்தவ் சிவசேனா கடும் விமர்சனம்..!!

அயோத்தி ராமர் கோயில் மேம்பாட்டுக்காக ராமஜென்மபூமி அறக்கட்டளைக்கு பக்தர்களிடமிருந்து குவிந்த பொன், வெள்ளி, நகைகள் உள்ளிட்ட நன்கொடைகளில் பெரும் முறைகேடு நடைபெற்றுள்ளதாக எழுந்த குற்றச்சாட்டுகள் பெரும் பரபரப்பை ஏற்படுத்தியுள்ளன. இதை விசாரிக்க உத்தரப் பிரதேசத்தில் ஆளும் பாஜக அரசு சிறப்பு விசாரணைக் குழு அமைத்துள்ளது. இந்நிலையில், உத்தவ் தாக்கரேவின் சிவசேனா கட்சியின் அதிகாரப்பூர்வ இதழான ‘சாம்னா’ இந்த விவகாரத்தை கடுமையாக விமர்சித்து தலையங்கம் வெளியிட்டுள்ளது.

சாம்னாவின் தலையங்கத்தில், “ராமர் கோயில் மேம்பாடு என்ற பெயரில் உண்மையில் என்ன நடக்கிறது? கடவுளின் உண்டியலையே கொள்ளையடிப்பது என்பதை நாடே இப்போது நேரில் காண்கிறது” என்று குறிப்பிடப்பட்டுள்ளது. மேலும், அயோத்திக்கு வந்த தங்கம், வெள்ளி, நகைகள் உள்ளிட்ட நன்கொடைகள் பகிரங்கமாக கொள்ளையடிக்கப்பட்டுள்ளதாகவும், இது பழங்காலத்தில் கஜினி முகமது சோமநாதர் கோயிலை கொள்ளையடித்ததைப் போன்ற செயல் என்றும் ஒப்பிடப்பட்டுள்ளது. “அன்று கஜினி முகமது செய்ததை இன்று பாஜக செய்கிறது” என சாம்னா குற்றம் சாட்டியுள்ளது. இந்தச் சம்பவம் நாட்டில் சட்டம் ஒழுங்கு முழுமையாக சீர்குலைந்துவிட்டதை வெளிப்படுத்துவதாகவும் அந்த இதழ் வலியுறுத்தியது.

இதற்கிடையில், மத்திய உள்துறை அமைச்சர் அமித் ஷா சமீபத்தில் மகாராஷ்டிராவின் கோல்காபூரில் நடைபெற்ற பொதுக்கூட்டத்தில் பேசியபோது, உத்தவ் தாக்கரே காங்கிரஸ் கட்சியின் மடியில் அமர்ந்திருப்பதாகக் கடுமையாக விமர்சித்திருந்தார். இதற்கு உடனடி பதிலடி கொடுத்துள்ள சாம்னா, “கடந்த பத்தாண்டுகளில் நாட்டின் பல முக்கிய கோயில்களில் கொள்ளைகள் நடைபெற்றுள்ளன. அந்த கொள்ளையர்கள் அனைவரும் பாஜகவுக்குள், அமித் ஷாவின் மடியில்தான் அமர்ந்திருக்கிறார்கள்” என்று தாக்குதல் நடத்தியது.

இதையும் படிங்க: புதிய நடுவர் மன்றம்..!! நம்பிக்கை இல்ல.. பேரவையில் அமைச்சர் ஆதவ் அர்ஜுனா உரை..!

மேலும், “இந்திய சுதந்திரப் போராட்டத்தில் எந்தப் பங்களிப்பும் இல்லாத இந்த அரசியல்வாதிகள், தாக்கரேவை நோக்கி விரல் நீட்டுகிறார்கள். இது அமித் ஷாவின் மோசமடைந்து வரும் மனநல நிலையையே காட்டுகிறது” என்று சாம்னா கூர்மையாக விமர்சித்துள்ளது. இந்த விவகாரம் அயோத்தி ராமர் கோயில் திட்டத்தின் நம்பகத்தன்மையை பாதிக்கும் வகையில் உள்ளது. 

பல லட்சம் பக்தர்களின் பக்தி உணர்வுடன் வந்த நன்கொடைகள் முறையாகப் பயன்படுத்தப்படுகின்றனவா என்பது குறித்து தீவிர விசாரணை தேவை என்ற குரல்கள் எழுந்துள்ளன. பாஜக தரப்போ, இந்தக் குற்றச்சாட்டுகளை அரசியல் உள்நோக்கம் கொண்டவை என்று மறுக்கும் வாய்ப்பு உள்ளது. எனினும், சிறப்பு விசாரணைக் குழுவின் அறிக்கை வரும் வரை இந்தப் பிரச்சினை தொடர்ந்து அரசியல் விவாதங்களுக்கு வழிவகுக்கும் என எதிர்பார்க்கப்படுகிறது. 
 

இதையும் படிங்க: சி.எம். பிறந்தநாளில் இப்படியா?... ஸ்தம்பித்தது தமிழகம்... மதுரை, நெல்லை, ஈரோட்டில் விஜய்க்கு எதிராக போராட்டம்...!