வங்கதேசத்தில் பிப்.,12-ல் பொதுத்தேர்தல்!! பார்வையாளராக பங்கேற்குமாறு இந்தியாவுக்கு அழைப்பு!

வங்கதேசத்தில் வரும் பிப்ரவரி 12-ம் தேதி பொதுத்தேர்தல் நடைபெற உள்ளது. இது அந்நாட்டின் 13-வது நாடாளுமன்ற தேர்தல் ஆகும். அதே நாளில் ஜூலை தேசிய சாசனம் (July National Charter) குறித்த பொதுவாக்கெடுப்பும் (referendum) நடக்கிறது. இந்த தேர்தல் ஷேக் ஹசீனா ஆட்சி கவிழ்ந்த பிறகு நடக்கும் முதல் பெரிய தேர்தல் என்பதால் உலக அளவில் கவனம் பெற்றுள்ளது.

வங்கதேச இடைக்கால அரசின் தலைவர் நோபல் பரிசு பெற்ற முகமது யூனுஸ் இந்த தேர்தல் மற்றும் வாக்கெடுப்பில் சர்வதேச பார்வையாளராக (international observer) பங்கேற்குமாறு இந்தியாவுக்கு அழைப்பு விடுத்துள்ளார். இந்த அழைப்பு பல நாடுகளுக்கும் அனுப்பப்பட்டுள்ளது. ஆனால் இந்தியா இதுவரை தனது பார்வையாளர் குழுவை அனுப்புவது குறித்து முடிவெடுக்கவில்லை.

வங்கதேசத்தில் 300 தொகுதிகளுக்கு 50-க்கும் மேற்பட்ட அரசியல் கட்சிகளை சேர்ந்த சுமார் 2,000 வேட்பாளர்கள் போட்டியிடுகின்றனர். ஹசீனாவின் ஆவாமி லீக் கட்சி தேர்தலில் போட்டியிட தடை விதிக்கப்பட்டுள்ளது. இதனால் பாங்க்லாதேஷ் நேஷனலிஸ்ட் கட்சி (BNP) முன்னிலை பெறும் என்று எதிர்பார்க்கப்படுகிறது.

இதையும் படிங்க: சொன்னபடி பிப்., 12ல் தேர்தல் நடக்கும்!! வங்கதேச இடைக்கால அரசு அறிவிப்பு!! அதிகரிக்கும் பதற்றம்!

இடைக்கால அரசு வெளியிட்ட அறிக்கையின்படி, இதுவரை 330 சர்வதேச பார்வையாளர்கள் தங்கள் வருகையை உறுதி செய்துள்ளனர். இஸ்லாமிய ஒத்துழைப்பு அமைப்பு (OIC), ஐரோப்பிய ஒன்றியம் (EU), காமன்வெல்த் உள்ளிட்ட 6 சர்வதேச அமைப்புகள் பார்வையாளர்களை அனுப்ப ஒப்புக்கொண்டுள்ளன. 16 நாடுகளில் இருந்து 57 பேர், பல்வேறு அமைப்புகளை சேர்ந்த 32 தனிநபர்கள் வருகை தர உள்ளனர். மலேசியா, துருக்கி போன்ற நாடுகளும் அடங்கும்.

முகமது யூனுஸ் அலுவலக அறிக்கை கூறுவது: "2024 ஜனவரி 7-ம் தேதி நடந்த சர்ச்சைக்குரிய தேர்தலை விட இம்முறை சர்வதேச பார்வையாளர்களின் எண்ணிக்கை இரு மடங்கு அதிகமாக இருக்கும்." இது தேர்தலை சுதந்திரமாகவும், நியாயமாகவும் நடத்துவதற்கு உதவும் என்று யூனுஸ் நம்புகிறார்.

இந்தியாவின் தயக்கத்துக்கு காரணம்: வங்கதேசத்தில் ஹிந்துக்களுக்கு எதிரான வன்முறை சம்பவங்கள் அதிகரித்து வருவதால் மத்திய அரசு அதிருப்தியில் உள்ளது. ஹசீனா இந்தியாவில் தஞ்சம் அடைந்துள்ளார். இந்தியா தேர்தலில் பங்கேற்பது குறித்து இன்னும் முடிவு செய்யவில்லை. ஆனால் இந்த தேர்தல் வங்கதேசத்தின் எதிர்காலத்தை தீர்மானிக்கும் முக்கிய தருணம். யூனுஸ் அரசு இதை "புதிய வங்கதேசத்தின் அடித்தளம்" என்று அழைக்கிறது.

இதையும் படிங்க: தேசத்துரோக வழக்கில் ஷேக் ஹசீனாவுக்கு சிக்கல்! ஜனவரி 21ல் குற்றச்சாட்டு பதிவு!!