செம்ம ஷாக்..! போன உயிரை மீட்டு வந்த பள்ளம்..!! மூளைச்சாவு அடைந்த பெண் குணமடைந்த அதிசயம்..!!

உத்தரப்பிரதேச மாநிலத்தில், கடந்த பிப்ரவரி மாதத்தில் நிகழ்ந்த ஒரு அதிசய சம்பவம் பெரும் வியப்பையும் விவாதத்தையும் ஏற்படுத்தியுள்ளது. பீலிபீத் மாவட்டத்தில் வசிக்கும் 50 வயதான வினிதா சுக்லா என்ற பெண், திடீரென உடல்நிலை சரியில்லாமல் போனதால் ஏற்பட்ட இந்த சம்பவம், மருத்துவ அறிவியலின் எல்லைகளையே கேள்விக்குள்ளாக்கியுள்ளது. வினிதா சுக்லா, பீலிபீத் மாவட்ட நீதிமன்றத்தில் மூத்த உதவியாளராக பணியாற்றி வந்தவர்.

இவர் தனது வீட்டில் வீட்டு வேலைகளைச் செய்து கொண்டிருந்தபோது திடீரென மயங்கி விழுந்தார். உடனடியாக அவரை மருத்துவமனைக்கு அழைத்துச் சென்றனர். அங்கு அவரது நிலை மிகவும் மோசமாக இருந்ததால், உயர் சிகிச்சைக்காக பரேலியில் உள்ள ஒரு தனியார் மருத்துவமனைக்கு மாற்றப்பட்டார். பரேலியில் இரண்டு நாட்கள் வென்டிலேட்டரில் வைத்து சிகிச்சை அளிக்கப்பட்டது. ஆனால் அவரது உடலில் எந்த அசைவும் இல்லை.

கண்களின் பார்வை பரவியது, மூளைச் செயல்பாடு முற்றிலும் நின்றுவிட்டதாக மருத்துவர்கள் கண்டறிந்தனர். கிளாஸ்கோ கோமா ஸ்கேல் 3 என்று குறைந்தபட்ச அளவில் இருந்தது. இறுதியாக, மருத்துவர்கள் அவரை மூளைச் சாவு அடைந்ததாக தெரிவித்தனர். அவரது கணவர் குல்தீப் குமார் சுக்லா மற்றும் குடும்பத்தினர் மிகுந்த வருத்தத்துடன் ஆம்புலன்ஸில் ஏற்றி பீலிபீத் நோக்கி புறப்பட்டனர். வீட்டில் இறுதிச் சடங்குகளுக்கான ஏற்பாடுகள் தொடங்கிவிட்டன. ஆனால், பரேலி-ஹரித்வார் தேசிய நெடுஞ்சாலை (NH-74) யில் ஹாஃபிஸ்கஞ்ச் அருகே ஆம்புலன்ஸ் ஒரு ஆழமான பள்ளத்தில் விழுந்து கடுமையான அதிர்ச்சியை ஏற்படுத்தியது.

இதையும் படிங்க: இந்தியாவில் முதன்முறையாக கருணைக்கொலை... உச்சநீதிமன்றம் அனுமதி..! முழு விவரம்..!!

அந்த அதிர்ச்சியில் வினிதா திடீரென மூச்சு விடத் தொடங்கினார். உடலில் அசைவு ஏற்பட்டது. உடனடியாக குல்தீப் தனது குடும்பத்தினரிடம் தொடர்பு கொண்டு, இறுதிச் சடங்கு ஏற்பாடுகளை நிறுத்துமாறு கூறினார். ஆம்புலன்ஸைத் திருப்பி, பீலிபீத் நகரில் உள்ள நியூரோசிட்டி மருத்துவமனைக்கு அழைத்துச் சென்றனர். அங்கு 14 நாட்கள் தீவிர சிகிச்சை அளிக்கப்பட்டது. படிப்படியாக வினிதாவின் நிலை மேம்பட்டது. மூளைச் செயல்பாடு திரும்பியது. இப்போது அவர் வீட்டுக்கு நலமுடன் திரும்பியுள்ளார். இந்த சம்பவம் பெரும் ஆச்சரியத்தை ஏற்படுத்தி உள்ளது. 

இதையும் படிங்க: கேஸ் சிலிண்டர் ரீஃபில் புக்கிங்கில் சிக்கல்..!! வொர்க் ஆகாத நம்பர்..!! ஏஜென்சிகளுக்கு படையெடுக்கும் மக்கள்..!!