திருவாரூரில் கோர விபத்து: அரசு - தனியார் பேருந்துகள் மோதல்: 10-க்கும் மேற்பட்டோர் படுகாயம்!

திருவாரூர் மாவட்டம் கோட்டூர் அருகே இன்று (டிசம்பர் 7) அரசுப் பேருந்து ஒன்றும், தனியார் பேருந்து ஒன்றும் நேருக்கு நேர் மோதிய கோர விபத்தில், 10க்கும் மேற்பட்ட பயணிகள் படுகாயமடைந்துள்ளனர். இந்த விபத்துச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.

இதையும் படிங்க: பொது சொத்து சேதம்: விவசாய சங்க தலைவர் பி.ஆர். பாண்டியனுக்கு 13 ஆண்டுகள் சிறை தண்டனை!

திருத்துறைப்பூண்டியிலிருந்து மன்னார்குடி நோக்கிப் பயணிகளை ஏற்றிக்கொண்டு வந்த அரசுப் பேருந்தும், அதே சமயம் மன்னார்குடியிலிருந்து திருத்துறைப்பூண்டி நோக்கிப் பயணிகளை ஏற்றிக்கொண்டு சென்ற தனியார் பேருந்தும், கோட்டூர் என்னும் இடத்தில் எதிர்பாராதவிதமாக நேருக்கு நேர் மோதி விபத்துக்குள்ளானது. விபத்தின் தீவிரத்தால் பேருந்துகளின் முன்பகுதி பலத்த சேதமடைந்தது. இந்த விபத்தில் பேருந்துகளில் பயணித்த 10க்கும் மேற்பட்ட பயணிகள் காயமடைந்தனர். இதில் சிலருக்கு எலும்பு முறிவுகளும் ஏற்பட்டுள்ளதாகவும் தகவல் வெளியாகியுள்ளது.

காயமடைந்தவர்களைக் கண்ட அக்கம் பக்கத்தினர் மற்றும் அருகில் இருந்த பொதுமக்கள் உடனடியாகச் செயல்பட்டு, மீட்புப் பணிகளில் ஈடுபட்டனர். அவர்கள் காயமடைந்தவர்களை மீட்டு, மன்னார்குடி மாவட்ட அரசுத் தலைமை மருத்துவமனைக்கும் மற்றும் திருத்துறைப்பூண்டி அரசு மருத்துவமனைக்கும் சிகிச்சைக்காக விரைந்து கொண்டு சென்றனர். அங்கு அவர்களுக்கு மருத்துவர்கள் தீவிர சிகிச்சை அளித்து வருகின்றனர்.

இதையும் படிங்க: தென்காசியை உலுக்கிய கோர விபத்து..!! தனியார் பேருந்தின் உரிமம் ரத்து..!! கலெக்டர் அதிரடி உத்தரவு..!!

விபத்து குறித்து அறிந்த திருத்துறைப்பூண்டி சட்டமன்ற உறுப்பினர் மாரிமுத்து, உடனடியாக மருத்துவமனைக்கு நேரில் சென்று காயமடைந்தவர்களைச் சந்தித்து ஆறுதல் கூறினார். மேலும், அவர்களுக்குச் சரியான சிகிச்சை அளிக்க வேண்டியது குறித்து மருத்துவமனை அதிகாரிகளிடம் கேட்டுக்கொண்டார். இந்த விபத்து தொடர்பாகக் கோட்டூர் காவல்துறை வழக்குப் பதிவு செய்துள்ளது. விபத்துக்கான சரியான காரணம், ஓட்டுநர்களின் கவனக்குறைவா அல்லது வேறு ஏதேனும் பிரச்சினையா என்பது குறித்துத் தீவிர விசாரணை நடத்தி வருகின்றனர்.

இந்தச் சாலை விபத்தானது, திருவாரூர் - மன்னார்குடி தேசிய நெடுஞ்சாலையில் சிறிது நேரம் போக்குவரத்து நெரிசலை ஏற்படுத்தியது. இருப்பினும், காவல்துறையினர் உடனடியாகச் சென்று விபத்துக்குள்ளான பேருந்துகளை அப்புறப்படுத்திப் போக்குவரத்தைச் சீர் செய்தனர். இந்தச் சம்பவம் அப்பகுதி மக்களிடையே மிகுந்த சோகத்தையும் பரபரப்பையும் ஏற்படுத்தியுள்ளது.