உள்நாட்டு வன்முறைக்கும் இந்தியாவுக்கும் சம்பந்தமில்லை!! வெள்ளைக் கொடி காட்டும் கனடா!! இதுதான் காரணமா?!

புதுடெல்லி: கனடா பிரதமர் மார்க் கார்னி நாளை (பிப்ரவரி 27, 2026) இந்தியாவுக்கு வருகை தர உள்ளார். இவரது பயணத்திற்கு முன்னதாக, கனடா அரசு முக்கிய அறிக்கை ஒன்றை வெளியிட்டுள்ளது. கனடாவில் நடக்கும் வன்முறை சம்பவங்களில் இந்தியாவுக்கு எந்த தொடர்பும் இல்லை என்று அங்குள்ள மூத்த அதிகாரிகள் தெரிவித்துள்ளனர். இது இரு நாடுகளுக்கும் இடையிலான உறவை மேலும் வலுப்படுத்தும் நல்ல சமிக்ஞையாக பார்க்கப்படுகிறது.

கனடாவில் முன்னாள் பிரதமர் ஜஸ்டின் ட்ரூடோ ஆட்சி காலத்தில், காலிஸ்தான் பயங்கரவாதி ஹர்தீப் சிங் நிஜ்ஜார் கொலை விவகாரத்தில் இந்தியா தொடர்புடையது என்று குற்றச்சாட்டப்பட்டது. இதை இந்தியா முழுமையாக மறுத்தது. 

கனடா தனது நிலத்தில் காலிஸ்தானி பயங்கரவாதிகளுக்கு அடைக்கலம் கொடுப்பதாகவும் இந்தியா தொடர்ந்து குற்றம் சாட்டியது. இதனால் இரு நாடுகளுக்கும் இடையே தூதரக உறவு பாதிக்கப்பட்டது. தூதர்கள் நாடு கடத்தப்பட்டனர். வர்த்தக பேச்சுவார்த்தைகள் நிறுத்தப்பட்டன.

இதையும் படிங்க: முடிவுக்கு வருகிறது மனஸ்தாபம்! இந்தியா வருகிறார் கனடா பிரதமர்! காலிஸ்தான் சர்ச்சைக்கு முற்றுப்புள்ளி!

ஆனால், மார்க் கார்னி பிரதமரான பிறகு (மார்ச் 2025) உறவு சீரடைந்தது. இப்போது கனடா அரசு அதிகாரிகள் பிரபல ஊடகங்களிடம் கூறியுள்ளனர்: "கனடாவில் நடக்கும் வன்முறை சம்பவங்களில் இந்தியாவுக்கு தொடர்பு இல்லை. 

அத்தகைய செயல்பாடுகள் இனி தொடராது என்று நம்புகிறோம். தேசிய பாதுகாப்பு ஆலோசகர்கள் இடையேயான பேச்சுவார்த்தை உள்ளிட்ட வலுவான தூதரக தொடர்புகள் உள்ளன." இது இந்தியாவின் நிலைப்பாட்டை உறுதிப்படுத்தும் வகையில் உள்ளது.

கார்னியின் இந்திய பயணம் (பிப்ரவரி 27 முதல் மார்ச் 2 வரை) மும்பையில் தொடங்கி டெல்லியில் தொடரும். மும்பையில் வணிக நிகழ்ச்சிகள், CEOக்கள் சந்திப்பு நடைபெறும். டெல்லியில் பிரதமர் நரேந்திர மோடியுடன் உயர்மட்ட பேச்சுவார்த்தை நடக்கும். 

எண்ணெய், இயற்கை எரிவாயு, செயற்கை நுண்ணறிவு (AI), வர்த்தகம், முதலீடு, பாதுகாப்பு உள்ளிட்ட துறைகளில் ஒத்துழைப்பை வலுப்படுத்துவது முக்கிய நோக்கம். இந்தியா-கனடா FTA பேச்சுவார்த்தைகளை மீண்டும் தொடங்குவது, அணு மின்சக்தி, கனிம வளங்கள் போன்றவற்றில் ஒப்பந்தங்கள் எதிர்பார்க்கப்படுகின்றன.

இந்த பயணம் 2023-ல் ஏற்பட்ட பதற்றத்திற்கு பிறகு இரு நாடுகளுக்கும் இடையிலான உறவை மீட்டெடுக்கும் முக்கிய வாய்ப்பாக உள்ளது. காலிஸ்தான் விவகாரத்தில் கனடாவின் புதிய அணுகுமுறை இந்தியாவுக்கு வரவேற்பை பெற்றுள்ளது. வர்த்தகம், தொழில்நுட்பம், பாதுகாப்பு ஆகியவற்றில் புதிய அத்தியாயம் தொடங்கும் என எதிர்பார்க்கப்படுகிறது.

இதையும் படிங்க: முடிவுக்கு வருகிறது மனஸ்தாபம்! இந்தியா வருகிறார் கனடா பிரதமர்! காலிஸ்தான் சர்ச்சைக்கு முற்றுப்புள்ளி!