மத்திய அமைச்சர் ஜார்ஜ் குரியன் ராஜினாமா! ஜனாதிபதி மாளிகை ஏற்பு! விரைவில் அமைச்சரவை மாற்றம்!

மத்திய அமைச்சர் ஜார்ஜ் குரியன் தனது பதவியை ராஜினாமா செய்துள்ளார். ஜனாதிபதி மாளிகை இந்த ராஜினாமாவை ஏற்றுக்கொண்டதாக அதிகாரப்பூர்வமாக அறிவித்துள்ளது. கேரளாவைச் சேர்ந்த மூத்த பாஜ தலைவரான ஜார்ஜ் குரியன், சிறுபான்மையினர் நலன் மற்றும் மீன்வளத் துறை இணை அமைச்சராகப் பொறுப்பு வகித்து வந்தார்.

ராஜ்யசபா எம்.பி.யாக அவரது பதவிக்காலம் முடிவடைந்ததைத் தொடர்ந்து அவர் மத்திய அமைச்சர் பதவியிலிருந்து விலகியுள்ளார். பாஜக கட்சி தொடங்கப்பட்ட காலம் முதல் தீவிரமாகச் செயல்பட்டு வரும் மூத்த தலைவர்களில் ஜார்ஜ் குரியனும் ஒருவர். கேரள அரசியலில் பாஜகவை வலுப்படுத்துவதில் முக்கியப் பங்கு வகித்தவர் என்ற பெயரும் அவருக்கு உண்டு.

இந்த ராஜினாமா மத்திய அமைச்சரவையில் பெரிய மாற்றம் வரப் போவதற்கான முன்னோட்டமாகப் பார்க்கப்படுகிறது. பல மாதங்களாக மத்திய அமைச்சரவை மாற்றி அமைக்கப்படும் என்று செய்திகள் வெளியாகி வந்த நிலையில், தமிழ்நாடு, மேற்கு வங்கம் உள்ளிட்ட மாநிலங்களில் நடைபெற்ற சட்டமன்றத் தேர்தல் மற்றும் ராஜ்யசபா தேர்தல் முடிவுகளுக்குப் பிறகு இந்த மாற்றம் எதிர்பார்க்கப்படுகிறது.

இதையும் படிங்க: 12 ஆண்டுகால பாஜக ஆட்சியில் ஒரு ஊழல் குற்றச்சாட்டு கூட இல்லை.. மத்திய அமைச்சர்  பெருமிதம்!

மத்திய அரசு வட்டாரங்கள் தெரிவிக்கும் தகவலின்படி, தேர்தல் முடிவுகள் அனைத்தும் நிறைவடைந்துள்ளதால், பிரதமர் நரேந்திர மோடி தலைமையில் விரைவில் அமைச்சரவை மறுசீரமைப்பு நடைபெற உள்ளது. அந்த மாற்றத்தின் முதல் அறிகுறியாகவே ஜார்ஜ் குரியனின் ராஜினாமா அமைந்துள்ளது என்கின்றனர்.

ஜார்ஜ் குரியன் கேரளாவில் பாஜகவின் முகமாக நீண்ட காலமாகக் காணப்படுபவர். கிறிஸ்தவ சமூகத்தைச் சேர்ந்த அவர், சிறுபான்மையினர் மத்தியில் பாஜகவின் செல்வாக்கை அதிகரிக்க முயற்சி எடுத்தவர். அவரது ராஜினாமாவுக்கு பின்னால் புதிய முகங்களுக்கு வாய்ப்பு அளிக்கும் உத்தியா அல்லது கேரளாவில் பாஜகவை வலுப்படுத்தும் அடுத்தகட்ட திட்டமா என்பது விரைவில் தெளிவாகும்.

இந்த ராஜினாமா மத்திய அரசியல் வட்டாரத்தில் பரபரப்பை ஏற்படுத்தியுள்ளது. அடுத்த சில நாட்களில் பல அமைச்சர்கள் பதவி மாற்றம் அல்லது புதிய அமைச்சர்கள் நியமனம் குறித்த அறிவிப்புகள் வெளியாகலாம் என எதிர்பார்க்கப்படுகிறது. பாஜக தலைமை இந்த மாற்றத்தின் மூலம் அடுத்த லோக்சபா தேர்தலை மனதில் வைத்து வியூகம் வகுக்கும் என அரசியல் பார்வையாளர்கள் கருதுகின்றனர்.

ஜார்ஜ் குரியனின் சேவைக்கு பாஜக தலைவர்கள் பாராட்டு தெரிவித்து வரும் நிலையில், அவரது அடுத்த அரசியல் பயணம் என்னவாக இருக்கும் என்பதும் ஆர்வத்தை ஏற்படுத்தியுள்ளது.

இதையும் படிங்க: மத்திய அமைச்சர் சுரேஷ் கோபியுடன் தொலைபேசியில் பேசிய முதல்வர் விஜய்.. தமிழக வளர்ச்சி குறித்து  ஆலோசனை!